ຕັດສິນຈຳຄຸກ 12 ປີ ຄະດີສອງຄົນຮ້າຍຮ່ວມກັນຄາດຕະກຳແຟນໃໝ່

ຄະດີຮັກສາມເສົ້າທີ່ແຟນສາວຮ່ວມກັບແຟນເກົ່າ ຄາດຕະກຳແຟນໃໝ່ ຄະດີດັງກາງປີ2017 ເຫດການເກີດຂື້ນ ໃນວັນທີ່ 09 ເມສາ 2017 ຜ່ານການດຳເນີນຄະດີຂັ້ນ ສືບສວນ – ສອບສວນ ຂອງເຈົ້າໜ້າທີ່ ປກສ ເປັນເວລາປີກ່ວາກໍໄດ້ ສະຫຼຸບ ສຳນວນຄະດີສົ່ງໃຫ້ອົງການໄອຍະການປະຊາຊົນ ນະຄອນຫຼວງ ວຽງຈັນ ສັ່ງຟ້ອງສານປະຊາຊົນຂັ້ນຕົ້ນ ນະຄອນຫຼວງວຽງຈັນ ຕັດສິນໃນອາທິດທີ່ຜ່ານ ໂດຍຈຳເລີຍທັງສອງຊື່: ນາງ ອ້ອມໃຈ ອາຍຸ 20 ປີ ແລະ ທ້າວ ເພັດສາຄອນ ອາຍຸ 24 ປີ.

ອົງການໄອຍະການປະຊາຊົນ ນະຄອນຫຼວງວຽງຈັນ ໄດ້ຖະ ແຫຼງເຫດການ ແລະ ເນື້ອໃນຂອງສຳນວນຄະດີດັ່ງກ່າວນີ້ວ່າ: ຜູ້ເສຍຊີວິດ ຊື່: ທ້າວ ໃຫຍ່ ອາຍຸ 26 ປີ ພັກຢູ່ບ້ານຊ້າງຄູ້ ເມືອງ ໄຊທານີ ນະຄອນຫຼວງວຽງຈັນ ໄດ້ຄົບຫາເປັນແຟນກັບ ນາງ ອ້ອມໃຈ ໂດຍຮູ້ຈັກກັນຕິດຕໍ່ກັນທາງວີແຊັດໄດ້ປະມານ 3 ເດືອນ ໃນໄລຍະຄົບຫາກັນທັງສອງແມ່ນມັກມີປາກສຽງກັນຕະຫຼອດຍ້ອນ ທ້າວ ໃຫຍ່ ມີນິໄສໂມໂຫ ແລະ ມັກໃຊ້ຄຳເວົ້າຂົ່ມຂູ່ ຈຶ່ງເຮັດໃຫ້ນາງ ອ້ອມໃຈ ຂໍເລີກ ແຕ່ ທ້າວ ໃຫຍ່ ບໍ່ຍອມພ້ອມ ທັງສົ່ງຂໍ້ ຄວາມ ຂົ່ມຂູ່ຫຼາຍຢ່າງ, ຈົນເກີດມີເຫດຂ້າຕະກຳຂື້ນໃນວັນທີ 9 ເມສາ 2017 ເວລາ ປະມານ 21:00 ໂມງ, ໃນວັນທີ່ເກີດເຫດ ທ້າວ ໃຫຍ່ ໄດ້ແຊັດຫາ ນາງ ອ້ອມໃຈ ວ່າຈະພາໄປຫຼີ້ນແຕ່ ນາງ ອ້ອມໃຈ ບໍ່ໄປ ຈາກນັ້ນ ທ້າວ ໃຫຍ່ ໄດ້ຂຽນຂໍ້ຄວາມມາຂູ່ວ່າຈະທຳຮ້າຍຮ່າງກາຍ ດ້ວຍເຫດນີ້ນາງ ອ້ອມໃຈ ຈຶ່ງບອກໃຫ້ ທ້າວ ເພັດສາຄອນ ມາຮັບ ເອົາໄປຫຼີ້ນຢູ່ຫ້ອງແຖວຂອງ ທ້າວ ເພັດສາຄອນ ຈາກນັ້ນ ທ້າວ ໃຫຍ່ ໄດ້ນຳໄປຫາຢູ່ຫ້ອງແຖວ ແລ້ວໄດ້ເອົາມີດຍາວປະມານ 30 ຊັງຕີແມັດ ອອກມາຂົ່ມຂູ່ທັງສອງ ໃນຄະນະກຳລັງຜິດຖຽງກັນນັ້ນ ທ້າວ ເພັດສາຄອນ ໄດ້ພາ ນາງ ອ້ອມໃຈ ແລ່ນອອກຈາກຫ້ອງ ແຕ່ທ້າວ ໃຫຍ່ ນຳໄປ ທ້າວ ເພັດສາຄອນ ໄດ້ຈັບເອົາ ດີນບ໋ອກ ປູພື້ນແກວ່ງຖືກເອີກຂອງ ທ້າວ ໃຫຍ່ ຈົນເຮັດໃຫ້ຜູ້ກ່ຽວລົ້ມລົງ ແລ້ວ ທ້າວ ເພັດສາຄອນ ໄດ້ເອົາມີດທີ່ ທ້າວ ໃຫຍ່ ນຳມາແທງ ໃສ່ບໍລິເວນລຳຕົວ ແລະ ຄໍ ໃນເວລານັ້ນ ນາງ ອ້ອມໃຈ ກໍໄດ້ເອົາ ກ້ອນດີນບ໋ອກຕີທີ່ຫົວຕື່ມອີກເຮັດໃຫ້ທ້າວ ໃຫຍ່ ເສຍຊີວິດ ຈາກນັ້ນ, ຈຳເລີຍທັງສອງໄດ້ນຳເອົາສົບ ຂອງຜູ້ຕາຍໄປ ໃສ່ລົດ ຕູ້ສະຕຣາແລັກສີປອນ ທະບຽນ ກລ 1133 ກຳແພງນະຄອນ ທີ່ຜູ້ຕາຍຂັບມາ ແລ້ວທັງສອງໄດ້ຂັບຂີ່ລົດຂອງ ຜູ້ຕາຍໄປຕາມ ເສັ້ນທາງເລກທີ 13A ຮອດເຂດຂົວຂ້າມນ້ຳລີກ ໄດ້ລ້ຽວເຂົ້າທາງ ສວນຢາງພາລາປະມານ 20-30 ແມັດແລ້ວນຳສົບໄປຝັງດີນເພື່ອ ອຳພາງຄະດີ ຫຼັງຈາກຝັງສຳເລັດເປັນທີ່ຮຽບຮ້ອຍແລ້ວ ທັງສອງ ຈຳເລີຍໄດ້ພາກັນຂັບຂີ່ລົດໄປຮອດກາສີພໍດີນ້ຳມັນລົດຫມົດ ຈຶ່ງໄດ້ ຈອດລົດໃວ້ແຄມທາງ ຈາກນັ້ນກໍພາກັນຂີ່ລົດໂດຍສານໄປ ເມືອງ ພູຄູນ ເພື່ອໄປຊອກກົດເງິນ ແລ້ວນຳເງິນໄປຊື້ນ້ຳກາຊວນກັບມາ ຈູດລົດຕູ້ຄັນດັ່ງກ່າວ ຈາກນັ້ນ, ຈຶ່ງພາກັນຈ້າງລົດກັບມາ ນະຄອນ ຫຼວງວຽງຈັນ ແລະຖືກເຈົ້າໜ້າທີ່ ປກສ ກັກຕົວໄປດຳເນີນຄະດີໃນ ວັນທີ່ 28 ເມສາ 2017.

ຜ່ານການຄົ້ນຄ້ວາບັນດາຂໍ້ມູນຫຼັກຖານ ແລະ ເອກະສານຕ່າງໆ ທີ່ມີໃນສຳນວນຄະດີຢ່າງລະອຽດຖີ່ຖ້ວນ, ຮອບດ້ານ ແລະ ພາວະ ວິໄສ ແລ້ວເຫັນວ່າ: ຈຳເລີຍທັງສອງຄົນ ໄດ້ກະທຳຜິດຕໍ່ກົດໝາຍ ອາຍາທີ່ແຕະຕ້ອງຊີວິດກຽດສັກສີ ແລະ ຄວາມຍຸຕິທຳຂອງ ສາທາ ລະນະລັດ ປະຊາທິປະໄຕ ປະຊາຊົນລາວ ຕາມກົດໝາຍອາຍາຢ່າງ ແທ້ຈິງ: ສະນັ້ນ ຄະນະສານອາຍາ ສານປະຊາຊົນຂັ້ນຕົ້ນ ນະຄອນ ຫຼວງວຽງຈັນ ເຫັນຄວນຕັດອິດສະລະພາບ ທ້າວ ເພັດສາຄອນ ໃຫ້ ຈຳຄຸກ 12 ປີ, ປັບໃໝ່ ເງິນ 4.500.000 ກີບ ແລະ ຕັດອິດສະລະ ພາບ ນາງ ອ້ອມໃຈ ໃຫ້ຈຳຄຸກ 11 ປີ, ປັບໃໝ່ເງິນ 3.500.000 ກີບ.

©ນສພ ລາວພັດທະນາ

Be the first to comment

Leave a Reply

Your email address will not be published.


*