ຈັບຍິງ ອາຍຸ 62 ປີ ໃຊ້ເຮືອນເປັນບ່ອນມົ້ວສຸມຢາເສບຕິດ

ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງ ອຸດົມໄຊ ຈັບນາງ ໄມທາວ ອາຍຸ 62 ປີ ບ້ານໂຮມສຸກ ເມືອງໄຊ ແຂວງອຸດົມ ໄຊ ພ້ອມຢາບ້າຄາມື 25 ເມັດ ທີ່ນໍາ ໃຊ້ເຮືອນເປັນບ່ອນມົ້ວສຸມຢາເສບຕິດ ມາດໍາເນີນຄະດີ.
ເຈົ້າໜ້າທີ່ວິຊາສະເພາະໃຫ້ຮູ້ວ່າ: ເຮືອນຫຼັງດັ່ງກ່າວຢູ່ໃນເປົ້າໝາຍຕິດຕາມຂອງເຈົ້າໜ້າທີ່ມາໄດ້ໄລຍະໜຶ່ງ ເພາະ ເຈົ້າຂອງເຮືອນມີພຶດຕິກໍາສົງໄສນໍາໃຊ້ເປັນບ່ອນມົ້ວສຸມຢາເສບຕິດ; ຈາກນັ້ນ, ຈຶ່ງໄດ້ສົ່ງເຈົ້າໜ້າທີ່ຕິດຕາມຢ່າງ ໃກ້ຊິດເຫັນວ່າມີຂໍ້ມູນຫຼັກຖານພຽງພໍ ໃນວັນ ທີ 6 ມີນາ 2018 ຈຶ່ງວາງແຜນເຂົ້າຈັບຕົວເຈົ້າຂອງເຮືອນ ພ້ອມ ຢາບ້າຢູ່ຈໍານວນດັ່ງກ່າວ.


ກ່ອນໜ້ານັ້ນ ໃນວັນທີ 4 ມີນາ 2018 ເຈົ້າໜ້າທີ່ວິຊາສະເພາະ ປກສ ເມືອງນາໝໍ້ ແຂວງອຸດົມໄຊ ໄດ້ຮັບການ ລາຍງານຈາກແຫຼ່ງຂ່າວວ່າ: ຈະມີກຸ່ມຄົນ ບໍ່ດີຈໍານວນໜຶ່ງ ມີການລັກລອບຂົນສົ່ງ ຢາເສບຕິດຕາມເສັ້ນທາງ. ຈາກນັ້ນ, ກອງບັນຊາການ ປກສ ເມືອງ ຈຶ່ງໄດ້ບັນຈຸ ແລະ ຈັດວາງກຳລັງວິຊາສະເພາະລົງຕັ້ງຈຸດສະກັດຕາມເສັ້ນ ທາງ ຄາດວ່າກຸ່ມຄົນດັ່ງກ່າວຈະຜ່ານມາ, ຕໍ່ມາໃນເວລາປະມານ 9:00 ໂມງ ຂອງວັນດຽວກັນ ພົບເຫັນລົດຈັກ ຊູຊຸກິ ສີຟ້າດຳ ປ້າຍທະບຽນ ຍມ 2014 ກຳແພງນະຄອນ ຈໍານວນໜຶ່ງຄັນ, ເຊິ່ງກົງກັບແຫຼ່ງຂ່າວລາຍງານ ເຈົ້າໜ້າທີ່ ຈຶ່ງຢຸດລົດ ແລະ ຂໍກວດກາ ຜູ້ຂັບຂີ່ຊື່ ທ້າວ ອາເມົ້າ ອາຍຸ 21 ປີ ຢູ່ບ້ານໂຮງໄຊ ເມືອງນາໝໍ້ ແຂວງ ອຸດົມໄຊ ພົບຢາເສບຕິດທີ່ຊຸກເຊື່ອງໄວ້ໃນເບາະລົດ ມີຢາບ້າຈຳນວນ 528 ເມັດ ນໍ້າໜັກ 52,6 ກຼາມ, ເຮໂຣ ອິນ 1 ແທ່ງ ນໍ້າໜັກ 380 ກຼາມ ແລະ ຢາຝິ່ນ 2 ກ້ອນ, ນໍ້າໜັກ 900 ກຼາມ. ຈາກນັ້ນ, ຈຶ່ງຄຸມຕົວຜູ້ຖືກຫາ ໃນຂໍ້ຫາ ຄ້າ-ຂາຍຢາເສບຕິດ-ມີຢາເສບຕິດໄວ້ ໃນຄອບຄອງ.


ນອກນັ້ນ, ໃນຄັ້ງວັນທີ 20 ກຸມພາ 2018 ເຈົ້າໜ້າທີ່ຍັງໄດ້ກັກຕົວ ທ້າວ ທຸລະນີ ຫຼື ຫຼ້າ ອາຍຸ 28 ປີ ບ້ານນໍ້າແຊ ເມືອງນາໝໍ້ ພ້ອມຢາບ້າຈຳນວນ 40 ເມັດ, ນໍ້າໜັກ 3,7 ກຼາມ ຢູ່ໃນຖົງເສື້ອຂອງຜູ້ກ່ຽວຖືກຈັບໄດ້ໃນຂະນະທີ່ກຳ ລັງຈະໄປຂາຍໃຫ້ກັບພວກມົ້ວສຸມຢູ່ບ້ານ ໃກ້ຄຽງ. ຕໍ່ພວກຖືກຫາທັງ 3 ຄົນ ເຈົ້າໜ້າທີ່ທີ່ກ່ຽວຂ້ອງພວມດຳເນີນ ການສືບສວນ-ສອບສວນຂະຫຍາຍຜົນຫາ ຜູ້ຮ່ວມຂະບວນການໃນຄັ້ງນີ້ ເພື່ອນຳຈັບຕົວມາດຳເນີນຄະດີຕາມ ລະບຽບກົດ ໝາຍບ້ານເມືອງຕໍ່ໄປ.

Be the first to comment

Leave a Reply

Your email address will not be published.


*