ທວງໜີ້ແບບໃດໃຫ້ໄດ້ທັງ “ເງິນ” ໄດ້ທັງ “ໃຈ” ຄົນຖືກທວງ

ມິດຕະພາບທີ່ດີກໍ່ຕົວຂຶ້ນໂດຍຕ້ອງອາໄສເວລາອັນດົນນານແຕ່ຄວາມແຕກແຍກຖືກກໍ່ຕົວຂຶ້ນພຽງເວລາສັ້ນໆພ້ອມດ້ວຍເຫດຜົນເລື່ອງໜີ້ສິນ, ສະນັ້ນ ເຮົາຈະມີວິທີແບບໃດເພື່ອທວງໜີ້ກັບໝູ່ໃຫ້ໄດ້ທັງເງິນ, ໄດ້ທັງໃຈລູກໜີ້

1. ຕ້ອງໃຈກ້າ, ເງິນຂອງເຮົາຕ້ອງເອົາຄືນໃຫ້ໄດ້: ຫຼາຍຄົນຈະບໍ່ກ້າເອີ່ຍປາກທວງໜີ້ໂດຍສະເພາະກັບໝູ່ທີ່ສະໜິດເພາະຢ້ານກະທົບເຖິງມິດຕະພາບ ແລະ ຄວາມສຳພັນ. ສະນັ້ນ ເຮົາຕ້ອງຄິດວ່າ: ການໃຫ້ຢືມເງິນກໍຄືການເຮັດທຸລະກິດຢ່າງໜ້ອຍຖ້າບໍ່ມີກຳໄລ (ດອກເບ້ຍ) ເຮົາກໍຕ້ອງໄດ້ທຶນຄືນ.

2. ໃຫ້ກຽດລູກໜີ້ສະເໝີທັງຕໍ່ໜ້າ ແລະ ລັບຫຼັງ: ບໍ່ວ່າລູກໜີ້ຈະເປັນໃຜສິ່ງສຳຄັນຕ້ອງໃຫ້ກຽດເຂົາເຈົ້າສະເໝີເພາະການເປັນໜີ້ບໍ່ໄດ້ໝາຍຄວາມວ່າຄົນໆນັ້ນຈະຖືກຫຼຸດສັກສີຄວາມເປັນຄົນລົງ, ຖ້າຄິດຈະທວງໜີ້ກໍຄວນເຮັດໃຫ້ເປັນແບບສ່ວນຕົວ ແລະ ທວງຢ່າງສຸພາບແຕ່ຕ້ອງໜັກແໜ້ນໃນຈຸດຢືນຂອງເຮົາ.

3. ຕັ້ງສະຕິຄິດໃຫ້ດີກ່ອນເວົ້າ: ຕ້ອງສ້າງບັນຍາກາດທີ່ດີເພື່ອຫຼຸດຄວາມເຄັ່ງຄຽດໃຫ້ກັບລູກໜີ້, ຖ້າຫາກເປັນເງິນຈຳນວນຫຼາຍບໍລິບົດການໂອ້ລົມກໍຕ້ອງເພີ່ມການຍ້ອງຍໍເພື່ອເປັນການໃຫ້ກຳລັງໃຈລູກໜີ້ໃນການໃຊ້ໜີ້ໃຫ້ກັບເຮົາ.

4. ເຕືອນສະຕິລູກໜີ້ເພາະເຮົາກໍຕ້ອງໃຊ້ເງິນ: ລູກໜີ້ບາງຄົນກໍເປັນຄົນຂີ້ລືມບໍ່ມີເຈດຕະນາຜິດສັນຍາແຕ່ຢ່າງໃດ. ຖ້າລູກໜີ້ຢືມເງິນເປັນເວລາດົນເກີນໄປເຮົາກໍຕ້ອງຫາເຫດຜົນເພື່ອອ້າງເຖິງຄວາມຈຳເປັນທີ່ເຮົາຕ້ອງໃຊ້ເງິນ ແລະ ລົມກັນແບບກົງໄປກົງມາ.

5. ຫຼຸດຄວາມອຶດອັດໃຈດ້ວຍທາງເລືອກໃໝ່: ເປີດໃຈລົມກັນເລື່ອງຖານະການເງິນຂອງລູກໜີ້ເພື່ອຂະຫຍາຍເວລາຊຳລະໜີ້ອອກໄປໃຫ້ເໝາະສົມໂດຍມີກຳນົດເວລາທີ່ແນ່ນອນ, ຖ້າບໍ່ສະດວກຊຳລະເປັນເງິນກ້ອນກໍໃຫ້ແບ່ງຈ່າຍເປັນງວດແທນ, ແຕ່ຢ່າຫຼຸດໜີ້ໃຫ້ເດັດຂາດເພາະຈະສ້າງຄວາມຊິນເຄີຍໃຫ້ລູກໜີ້.

6. ຫາຕົວຊ່ວຍ: ເມື່ອປະຕິບັດມາທັງໝົດ 5 ວິທີແຕ່ຍັງບໍ່ໄດ້ຜົນເຮົາຕ້ອງຫາຕົວຊ່ວຍໃນການເຈລະຈາ, ເຊິ່ງຈະເປັນຄົນທີ່ລູກໜີ້ໃຫ້ຄວາມເຄົາລົບ ແລະ ນັບຖືເຊັ່ນ: ພໍ່, ແມ່, ຄົນໃນຄອບຄົວຂອງລູກໜີ້.

7. ທາງສຸດທ້າຍກົດໝາຍຊ່ວຍໄດ້ສະເໝີ: ກ່ອນອື່ນຕ້ອງແຈ້ງໃຫ້ເຂົາເຈົ້າຮູ້ວ່າ: ເຮົາກຳລັງຈະດຳເນີນການທາງກົດໜາຍ, ຖ້າຫາກລູກໜີ້ຍັງໃຫ້ການປະຕິເສດຕໍ່ການຊຳລະໜີ້ເຮົາກໍເລີ່ມດຳເນີນການໄດ້ທັນທີ, ຖ້າຫາກມີການໂອ້ລົມຜ່ານທາງຂໍ້ຄວາມ, ມີໃບສັນຍາກູ້ຢືມເງິນສິ່ງເຫຼົ່ານີ້ສາມາດໃຊ້ເປັນຫຼັກຖານໃນທາງກົດໝາຍໄດ້.

ສຳລັບຄຳແນະນຳຕ່າງໆເຮົາບໍ່ສາມາດຮັບປະກັນໄດ້ວ່າເຈົ້າໜີ້ຈະສາມາດໄດ້ເງິນຄືນທັງໝົດ ແຕ່ຄຳແນະນຳທີ່ດີທີ່ສຸດຄື: ຖ້າຢາກຮັກສາມິດຕະພາບ ແລະ ຄວາມສຳພັນໃຫ້ດີຕໍ່ໄປຈົ່ງຢ່າໃຫ້ໝູ່ເພື່ອນຢືມເງິນຢ່າງເດັດຂາດ, ສ່ວນລູກໜີ້ກໍຢ່າພະຍາຍາມຫຼີກໜີເພາະມັນເປັນສິ່ງທີ່ເປັນໄປບໍ່ໄດ້, ຕ້ອງເອົາໃຈເພິ່ນມາໃສ່ໃຈໂຕ ແລະ ຄວນຫາເງິນມາໃຊ້ໜີ້ໃຫ້ໄວທີ່ສຸດ.

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *