ບໍລິຄຳໄຊ ເຮັດແທ້ ອອກຄຳສັ່ງຫ້າມປ່ອຍເງິນກູ້ນອກລະບົບ

ເພື່ອເຮັດໃຫ້ການຄຸ້ມຄອງລັດ, ຄຸ້ມຄອງສັງຄົມຫັນເຂົ້າສູ່ລະບຽບກົດໝາຍຢ່າງເຂັມງວດ, ຮັບປະກັນຄວາມສະຫງົບ – ຄວາມເປັນລະບຽບຮຽບຮ້ອຍທົ່ວສັງຄົມ, ເຮັດໃຫ້ປະກົດການຫຍໍ້ທໍ້ໃນສັງຄົມຫຼຸດຜ່ອນລົງເທື່ອລະກ້າວ.
ເຈົ້າແຂວງໆບໍລິຄຳໄຊ ອອກຄຳສັ່ງ ສະບັບເລກທີ 001/ຂບຊ ລົງວັນທີ 1 ກຸມພາ 2018 ວ່າດ້ວຍການສະກັດກັ້ນການປ່ອຍກູ້ເງິນນອກລະບົບ ແລະ ການປາບປາມຫວຍເຖື່ອນ.
ເຖິງທ່ານເຈົ້າເມືອງ 7 ຕົວເມືອງ, ກອງບັນຊາການ ປກຊ – ປກສ ແຂວງ, ພະແນກການ, ອົງການຈັດຕັ້ງມະຫາຊົນ, ຫ້ອງການ, ລັດວິສາຫະກິດ, ບໍລິສັດ ຕະຫຼອດຮອດປະຊາຊົນບັນດາເຜົ່າພາຍໃນແຂວງບໍລິຄຳໄຊ.
ໃຫ້ທ່ານເຈົ້າເມືອງ 7 ເມືອງ, ກອງບັນຊາການ ປກຊ – ປກສ ແຂວງ, ພະແນກການອ້ອມຂ້າງແຂວງ ຈົ່ງໄດ້ພ້ອມກັນສະກັດກັ້ນການປ່ອຍເງິນກູ້ນອກລະບົບ ແລະ ປາບປາມການຊື້ – ຂາຍຫວຍເຖື່ອນ ເຊິ່ງໄລຍະຜ່ານມາເຫັນວ່າມີການປ່ອຍເງິນກູ້ນອກລະບົບ ແລະ ປະກົດການຊື້ – ຂາຍຫວຍເຖື່ອນໄດ້ແຜ່ລາມຫຼາຍໃນສັງຄົມ ເຊິ່ງໄດ້ສ້າງຜົນສະທ້ອນອັນບໍ່ດີຫຼາຍດ້ານຕໍ່ສະພາບເສດຖະກິດ – ສັງຄົມ ແລະ ເຮັດໃຫ້ສັງຄົມບໍ່ມີຄວາມສະຫງົບ.
ມອບໃຫ້ກອງບັນຊາການ ປກສ ແຂວງ ສົມທົບກັບກອງບັນຊາການ ປກສ ເມືອງ ແລະ ພາກສ່ວນທີ່ກ່ຽວຂ້ອງເກັບກຳສະຖິຕິເປົ້າໝາຍຕົວຈິງກ່ຽວກັບການເຄື່ອນໄຫວຂອງບຸກຄົນ, ກຸ່ມຄົນພາຍໃນເມືອງຂອງຕົນທີ່ມີການປະພຶດດັ່ງກ່າວ, ຖ້າພົບເຫັນຕ້ອງໄດ້ນຳໃຊ້ມາດຕະການຕາມລະບຽບກົດໝາຍຕໍ່ຜູ້ກະທຳຜິດ.
ໃຫ້ພະແນກການເງິນແຂວງ ສົມທົບກັບກອງບັນຊາການ ປກສ ແຂວງ ແລະ ພາກສ່ວນທີ່ກ່ຽວຂ້ອງກວດກາ ແລະ ຄຸ້ມຄອງ ຫ້າມບໍ່ໃຫ້ມີການປ່ອຍເງິນກູ້ນອກລະບົບ ແລະ ປາບປາມການຊື້ – ຂາຍຫວຍເຖື່ອນພາຍໃນແຂວງ, ຖ້າພົບເຫັນກໍລະນີມີຜູ້ລະເມີດແມ່ນໃຫ້ດຳເນີນຄະດີຕາມກົດໝາຍ ແລະ ລະບຽບການຢ່າງເຂັ້ມງວດ

Be the first to comment

Leave a Reply

Your email address will not be published.


*