ປະທານປະເທດ ເນັ້ນຂະແໜງການກ່ຽວຂ້ອງ ຊອກວິທີແກ້ໄຂເພື່ອບໍ່ໃຫ້ໜີ້ສິນເພີ່ມຂຶ້ນ

ກະຊວງ​ການ​ເງິນ ຮ່ວມ​ກັບ​ກະຊວງ​ແຜນການ ແລະ ການ​ລົງທຶນ ຈັດ​ກອງ​ປະຊຸມ​ແນະນຳ​ການຈັດ​ຕັ້ງ​ປະຕິບັດ​ແຜນ​ພັດທະນາເສດຖະກິດ-ສັງຄົມ ແລະ ແຜນງົບປະມານ​ແຫ່ງ​ລັດ ປະຈຳ​ປີ 2018 ຂຶ້ນ​ວັນ​ທີ 27 ທັນວາ 2017 ຢູ່​ຫໍ​ປະຊຸມ​ແຫ່ງ​ຊາດ ເປັນປະທານ​ຮ່ວມ​ຂອງ​ທ່ານ ສົມ​ດີ ດວງ​ດີ ຮອງ​ນາຍົກລັດຖະມົນຕີ ລັດຖະມົນຕີ​ກະຊວງ​ການ​ເງິນ ແລະ ທ່ານ ສຸພັນ ແກ້ວ​ມີ​ໄຊ ລັດຖະ​ມົນຕີ​ກະຊວງ​ແຜນການ ແລະ ການ​ລົງທຶນ ໃຫ້​ກຽດ​ເຂົ້າ​ຮ່ວມຂອງ​ທ່ານ ບຸນ​ຍັງ ວໍລະ​ຈິດ ປະທານ​ປະເທດ ທ່ານ​ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ ບັນດາ​ລັດຖະມົນຕີ ເຈົ້າແຂວງ ແລະ ຂະແໜງການ​ກ່ຽວຂ້ອງ​ທັງສູນ​ກາງ ແລະ ທ້ອງຖິ່ນ.

ທ່ານ ສົມ​ດີ ດວງ​ດີ ກ່າວ​ວ່າ: ກອງ​ປະຊຸມ​ຄັ້ງ​ນີ້​ໄດ້​ພ້ອມ​ກັນ​ຕີ​ລາຄາ​ການຈັດຕັ້ງ​ປະຕິບັດ​ແຜນ​ງົບປະມານ​ແຫ່ງ​ລັດ ປີ 2017 ປຶກສາ​ຫາລືທິດ​ທາງ​ແຜນການ ປີ 2018 ຮັບ​ຟັງ​ເຜີຍແຜ່​ຮ່າງ​ຄຳແນະນຳ​ກ່ຽວ​ກັບ​ການຈັດຕັ້ງ​ປະຕິບັດ​ ວຽກ​ງານ​ສາມ​ສ້າງ​ຂອງ​ຂະແໜງ​ການ​ເງິນ ຮ່າງ​ຂໍ້​ຕົກລົງ​ວ່າດ້ວຍ​ການ​ເງິນ​ບ້ານ ແລະ ບັນຫາສຳຄັນ​ຈຳນວນ​ໜຶ່ງ ການຈັດຕັ້ງປະຕິບັດ​ແຜນ​ພັດທະນາ​ເສດ​ຖະກິດ-ສັງຄົມ ແລະ ແຜນ​ງົບ​ປະມານ​ແຫ່ງ​ລັດ​ໃນ​ໄລຍະ​ຜ່ານ​ມາ ມີ​ຄວາມ​ຫຍຸ້ງຍາກ​ຫຼາຍ​ດ້ານແຕ່​ພາຍ​ໃຕ້​ການ​ຊີ້​ນຳ-ນຳພາຢ່າງ​ໃກ້ຊິດ​ຂອງ​ພັກ-ລັດ ແລະ ຄວາມ​ເອົາໃຈໃສ່​ຂອງ​ຂະແໜງການ​ຂັ້ນ​ສູນ​ກາງ ແລະ ທ້ອງຖິ່ນ ຈຶ່ງ​ເຮັດ​ໃຫ້​ເສດຖະກິດ​ຍັງ​ຂະຫຍາຍ​ຕົວຢ່າງ​ຕໍ່​ເນື່ອງ ແລະ ມີບາດກ້າວ​ຫັນປ່ຽນ​ຢ່າງ​ຕັ້ງໜ້າເສດຖະກິດ​ມະຫາ​ພາກ​ມີ​ຄວາມໜັ້ນ​ທ່ຽງ ແລະ ສະ​ເຖຍ​ລະ​ພາບຍອດ​ຜະລິດ​ຕະ​ພັນ​ພາຍ​ໃນ​ເຕີບໂຕ​ປະມານ 6,8% ຕໍ່​ປີ ສະເລ່ຍ​ຕໍ່ຄົນ​ຕໍ່​ປີ​ບັນລຸ ປະມານ 19,77 ລ້ານ​ກີບ ອັດຕາ​ເງິນ​ເຟີ້​ຢູ່​ໃນ​ລະດັບ​ຕ່ຳ ແລະ ອັດຕາ​ແລກປ່ຽນເໜັງ​ຕີງ​ໃນ​ລະດັບ​ທີ່​ຄຸ້ມ​ຄອງ​ ໄດ້ການ​ລົງທຶນ​ຕ່າງປະເທດ​ສືບຕໍ່ເພີ່ມ​ຂຶ້ນ​ຢ່າງ​ຕໍ່​ເນື່ອງ ການ​ຮ່ວມມື​ກັບ​ພາກ​ພື້ນ ແລະ ສາກົນ​ມີ​ທ່າຕັ້ງໜ້າ​ດີ​ຂຶ້ນໃນ 11 ເດືອນ​ກວ່າ ຜ່ານ​ມາ​ປະຕິບັດ​ລາຍ​ຮັບໄດ້ 84,94% ຂອງ​ແຜນການ​ປີ ໃນ​ນີ້ ລາຍ​ຮັບ​ພາຍ​ໃນ 87,71% ສ່ວນລາຍ​ຈ່າຍ ປະຕິບັດ​ໄດ້ 84,4% ແຕ່​ຜ່ານ​ການ​ຄົ້ນຄວ້າ​ຄວາມ​ສາມາດ​ການ​ເກັບ​ລາຍ​ຮັບ ແລະ ປະຕິ​ບັດ​ລາຍ​ຈ່າຍ​ງົບປະມານ ປີ 2017 ຍັງ​ທ້າ​ທາຍ​ສູງ ເນື່ອງຈາກ​ລາຍ​ຮັບ​ງົບປະມານ​ບໍ່​ໃຫ້ຫຼຸດ 95% ລາຍ​ຈ່າຍ 95,2% ບວກ​ກັບ​ຄວາມ​ຈຳເປັນ​ທີ່​ຕ້ອງ​ໄດ້ຊຳລະ​ຕົ້ນ​ທຶນ​ເງິນ​ກູ້​ຢືມ​ພາຍ​ໃນ ແລະ ຕ່າງປະເທດ ເຫັນ​ວ່າ​ແຫຼ່ງທຶນ​ສາມາດ​ລະດົມ​ໄດ້ ໃນ​ປີ 2017 ຍັງ​ບໍ່​ພຽງພໍ ນອກ​ນີ້ 9 ແຂວງ​ກໍ່​ບໍ່​ສາມາດ​ເກັບ​ໄດ້​ຕາມແຜນ 370 ຕື້​ກີບ.

ສຳລັບ​ແຜນ​ພັດທະນາ​ເສດ​ຖະກິດ-ສັງຄົມ​ແຫ່ງ​ຊາດ ປີ 2018 ຈະ​ສູ້​ຊົນ​ໃຫ້ GDP ເພີ່ມ​ຂຶ້ນ​ໃນລະດັບ 7% ເສດຖະກິດ​ມະຫາພາກ​ມີ​ສະ​ເຖຍ​ລະ​ພາບ​ໂດຍ​ພື້ນຖານ ສືບຕໍ່​ສຸມ​ໃສ່​ການ​ພັດທະນາຊົນນະບົດ ແລະ ແກ້​ໄຂ​ຄວາມທຸກ​ຍາກ ເພື່ອ​ເຮັດ​ໃຫ້ການ​ພັດທະ​ນາ​ກ້າວ​ເຂົ້າ​ໄປ​ສູ່​ຄຸນະພາບທີ່ແທ້​ຈິງ ການຈັດຕັ້ງ​ປະຕິບັດໂຄງການ​ລົງທຶນ​ຂອງ​ລັດ​ຕ້ອງຈັດ​ສັນ​ທຶນ​ຕາມ​ໂຄງ​ປະກອບ​ທີ່ລະບຸ​ໄວ້ ​ໃນ​ມະຕິ​ຂອງ​ສະພາ​ແຫ່ງຊາດ ສ່ວນ​ແຜນ​ງົບປະມານແຫ່ງ​ລັດ ປີ 2018 ຍັງ​ສືບຕໍ່​ສູ້​ຊົນແກ້​ໄຂ​ຄວາມ​ຫຍຸ້ງຍາກ​ດ້ານ​ງົບປະມານ ແລະ ຫັນປ່ຽນ​ໃໝ່ ໂດຍການ​ກ້າວ​ສູ່​ການ​ປະຕິ​ຮູບ​ການຄຸ້ມ​ຄອງ​ການ​ເງິນ​ພາກ​ລັດ​ຢ່າງຕັ້ງໜ້າ ຫັນ​ເປັນ​ທັນ​ສະໄໝ​ຢ່າງທັນ​ການ ແລະ ກວ້າງຂວາງ ເຮັດໃຫ້ການ​ເກັບ​ລາຍ​ຮັບ ແລະ ປະຕິບັດ​ລາຍ​ຈ່າຍ​ງົບປະມານ​ມີ​ປະສິດທິ​ຜົນ ແລະ ເຂັ້ມ​ງວດ​ກວ່າເກົ່າ ແນໃສ່​ເຮັດ​ໃຫ້​ເສດຖະກິດແຫ່ງ​ຊາດ​ເຕີບ​ໂຕ​ຕາມ​ຄາດໝາຍ​ທີ່​ວາງ​ໄວ້​ຢ່າງ​ໜ້ອຍ 7% ຫຼື ເທົ່າ​ກັບ 149.471 ຕື້​ກີບ ເຊິ່ງຄາດໝາຍ​ທີ່​ສະພາ​ແຫ່ງ​ຊາດ​ໄດ້ຮັບຮອງ 25.452 ຕື້​ກີບ ຫຼື ປະມານ 17,02% ຂອງ GDP ລາຍ​ຮັບ​ພາຍ​ໃນ 22.700 ຕື້​ກີບ ຫຼື ປະມານ 15,18% ສ່ວນລາຍ​ຈ່າຍ​ບໍ່​ໃຫ້​ເກີນ 32.809 ຕື້ກີບ ຫຼື ປະມານ 21,95% ແລະ ຄາດ​ຄະເນ​ຈະ​ຂາດ​ດຸນ 7.357 ຕື້ກີບ ຫຼື ປະມານ 4,92%.

ຕອນ​ທ້າຍ ທ່ານ​ປະທານ​ປະເທດ​ໄດ້​ໂອ້​ລົມ ກ່ອນ​ອື່ນ​ທ່ານ​ໄດ້ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່ຜົນສຳເລັດ​ທີ່​ຂະແໜງການ​ເງິນ ແລະ ແຜນການ ແລະ ການ​ລົງທຶນ​ຍາດ​ມາ​ໄດ້​ໃນ​ໄລຍະ​ຜ່ານ​ມາ ພ້ອມ​ທັງ​ໄດ້​ເນັ້ນ​ບາງ​ບັນຫາ​ໃຫ້ສືບຕໍ່​ປັບປຸງ​ແກ້​ໄຂ ເປັນຕົ້ນ ຕ້ອງສູ້​ຊົນ​ໃຫ້​ເສດຖະກິດ​ສືບຕໍ່​ຂະຫຍາຍ​ຕົວ​ຕາມ​ເປົ້າ​ໝາຍ ແລະ ຄຸ້ມ​ຄອງ​ເສດຖະກິດ​ມະຫາ​ພາກ ໃຫ້​ຢູ່​ໃນ​ຂອບ​ທີ່​ສະພາ​ແຫ່ງ​ຊາດຮັບຮອງ ລັດຖະບານ​ຈະ​ຕ້ອງ​ໄດ້​ຊີ້ນຳ​ຢ່າງ​ໃກ້ຊິດ ໂດຍ​ສະເພາະ ຂະແໜງ​ແຜນການ ແລະ ການ​ລົງທຶນ ຂະແໜງການ​ເງິນ ແລະ ທະນາ​ຄານ ແຫ່ງ ສປປ ລາວ ຈະຕ້ອງ​ປະສານ​ສົມທົບ​ຢ່າງ​ສະໜິດແໜ້ນ ດ້ານ​ນະໂຍບາຍ​ແກ້​ໄຂ​ບັນຫາ​ຮ່ວມ​ກັນ​ໃຫ້​ຖືກ​ຈຸດ ເພື່ອ​ຄຸ້ມຄອງ​ເສດຖະກິດ​ມະຫາ​ພາກ​ໃຫ້​ມີສະ​ເຖຍ​ລະ​ພາບ ແລະ ໝັ້ນ​ທ່ຽງ ປີ 2018 ໃຫ້​ຂະແໜງການ​ເງິນ ແລະ ທຸກ​ພາກສ່ວນ​ຮ່ວມ​ກັນ​ຈັດຕັ້ງ​ປະຕິບັດ​ໃຫ້​ໄດ້​ຕາມ​ແຜນການ ທີ່​ສະພາ​ແຫ່ງ​ຊາດ​ຮັບຮອງ ເຮັດໃຫ້​ເປັນ​ບາດ​ລ້ຽວ​ໃໝ່​ຂອງ​ວຽກງານ​ແຜນການ ແລະ ການ​ລົງທຶນ ແລະ ວຽກ​ງານ​ການ​ເງິນ ຕ້ອງ​ໄດ້​ປະຕິ​ຮູບ​ການ​ຄຸ້ມ​ຄອງ ແລະ ການ​ບໍລິການ​ວຽກ​ງານຢ່າງຮອບດ້ານ ທັງ​ສອດຄ່ອງ​ກັບເງື່ອນໄຂ​ສະພາບ​ເສດຖະກິດ-ສັງຄົມ​ໃນ​ປັດຈຸບັນ ກະຊວງ​ການ​ເງິນ ຕ້ອງ​ຄຸ້ມ​ຄອງ​ຢ່າງ​ເລິກເຊິ່ງ ແລະ ຊອກ​ວິທີ​ແກ້​ໄຂ​ເພື່ອ​ບໍ່​ໃຫ້​ໜີ້​ສິນເພີ່ມ​ຂຶ້ນ​ອີກ ຄົ້ນຄວ້າ ແລະ ພິ​ຈາລະ​ນາ​ໂຄງການ​ຂໍ​ການ​ຊ່ວຍເຫຼືອ ແລະ ກູ້​ຢືມ​ຕ່າງປະເທດ ​ຢ່າງ​ມີ​​ຈຸດສຸມ​ສອດຄ່ອງ​ກັບ​ຍຸດ​ທະ​ສາດ ແລະ ຄວາມ​ຈຳເປັນ​ຂອງ​ການພັດທະນາ​ໃນ​ປັດຈຸບັນ ໃຫ້​ກະຊວງ​ແຜນການ ແລະ ການ​ລົງທຶນ​ສືບຕໍ່​ສັງ​ລວມ​ບັນດາ​ໜີ້​ສິນ ໂຄງການ​ລົງທຶນ​ຂອງ​ລັດ​ທົ່ວ​ປະເທດ​ໃຫ້​ສຳເລັດ ແລະ ຄົ້ນຄວ້າມາດ​ຕະການ​ຊຳລະ​ສະ​ສາງ​ເທື່ອລະ​ກ້າວ ເຮັດ​ໃຫ້​ຍອດ​ໜີ້​ສິນ​ຫຼຸດລົງ ນຳ​ເອົາ​ເນື້ອ​ໃນ​ຈິດໃຈ​ດຳລັດວ່າ​ດ້ວຍ​ນະໂຍບາຍ​ປະຢັດ ແລະ ຕ້ານ​ການ​ຟູມ​ເຟືອຍ ແລະ ຄຳ​ສັ່ງວ່າ​ດ້ວຍ​ການ​ປະຢັດ​ລາຍ​ຈ່າຍ​ງົບປະມານ​ຂອງ​ລັດ ໄປ​ຜັນ​ຂະຫຍາຍ​ໃຫ້​ເປັນ​ນິຕິ​ກຳ​ລະອຽດ ແລະ ນຳໄປ​ຈັດ​ຕັ້ງ​ປະຕິບັດ​ໃນວຽກ​ງານ​ຕົວ​ຈິງ ເພື່ອ​ເຮັດ​ໃຫ້ການ​ນຳ​ໃຊ້​ງົບປະມານ​ທີ່​ມີ​ຈຳກັດ ໄດ້​ນຳ​ໃຊ້​ຢ່າງ​ມີ​ຈຸດ​ສຸມສືບຕໍ່ຍູ້​ແຮງ​ການ​ລົງທຶນ​ພາກ​ເອກະ​ຊົນພາຍ​ໃນ ແລະ ຕ່າງປະເທດ ​ໃຫ້ເປັນ​ກຳລັງ​ຕົ້ນຕໍ​ໃນ​ການ​ຊຸກຍູ້ການ​ເຕີບ​ໂຕ​ຂອງ​ເສດຖະກິດ ເພື່ອ​ສ້າງ​ພື້ນຖານ​ເສດຖະກິດ​ໃຫ້ກວ້າງຂວາງ ແລະ ໜັກ​ແໜ້ນໃຫ້​ກະຊວງ​ການ​ເງິນ​ເປັນໃຈ​ກາງ ປະສານ​ສົມທົບ​ກັບ​ຂະແໜງການທີ່​ກ່ຽວຂ້ອງ ຮີບ​ຮ້ອນ​ຄົ້ນຄວ້າ​ປັບປຸງ​ບັນດາ​ວິ​ສາ​ຫະ​ກິດ​ລັດ 100% ແລະ ລັດ​ຫຸ້ນ​ສ່ວນ​ດ້ວຍ​ຫຼາຍ​ຮູບແບບ​ຊອກ​ຄູ່​ຮ່ວມ​ທຸລະ​ກິດ​ຍຸດ​ທະສາດ ​ເຂົ້າ​ມາ​ດຳເນີນ​ທຸລະ​ກິດ​ປັບປຸງ​ຮູບ​ແບບ​ການ​ບໍລິຫານ​ໃຫ້​ໄດ້ມາດຖານ ເພື່ອ​ໃຫ້ການ​ດຳເນີນ​ທຸລະ​ກິດ​ທີ່​ມີ​ປະ​ສິດທິ​ຜົນ​ດີ​ຂຶ້ນ ເພີ່ມທະວີ​ຄວາມ​ຮັບຜິດຊອບ​ຂອງ​ຄະນະ​ພັກ​ອົງການ​ປົກຄອງ​ແຕ່​ລະຂັ້ນ​ ໃຫ້​ມີ​ການ​ກວດກາ​ຢ່າງ​ເຂັ້ມງວດ​ຕາມ​ລະບຽບ ແລະ ກົດໝາຍ​ເພີ່ມ​ທະວີ​ຄວາມ​ຮັບ​ຜິດຊອບ​ຊີ້​ນຳ-ນຳພາ​ວຽກ​ງານ​ແຜນການ ແລະ ການ​ລົງທຶນ ແລະ ວຽກ​ງານ​ການ​ເງິນ​ໃຫ້​ເຂັ້ມ​ງວດ ໂດຍ​ສຸມ​ໃສ່​ການ​ສຶກ​ສາ​ອົບຮົມແນວ​ຄິດ-ການເມືອງ ໃຫ້​ພະນັກງານ-ລັດຖະກອນເປັນ​ປົກກະຕິ ແລະ ເລິກເຊິ່ງ​ກວ່າ​ເກົ່າ.

ສຳເລັດການເດີນທາງເຊື່ອມສຳພັນຈີນ-ອາຊຽນ

ການ​ເດີນທາງ​ຂອງ​ຄະນະ​ທ່ອງທ່ຽວ​ນານາ​ຊາດ-ຄາ​ລາ​ວານສື່ມວນ​ຊົນ​ຈີນ-ອາ​ຊຽນ (CAITA) ຄັ້ງ​ທີ 11 ໄດ້​ອັດ​ລົງ​ຢ່າງ​ເປັນ​ທາງການ ທີ່​ນະຄອນຫຼວງ​ຈາ​ກາ​ຕາ ປະເທດ​ອິນ​ໂດ​ເນ​ເຊຍ ດ້ວຍ​ໄລຍະ​ທາງ 10.000 ກີ​ໂລ​ແມັດ ຜົນສຳເລັດ​ດັ່ງກ່າວ​ ປະກອບສ່ວນ​ສຳຄັນ​ເຂົ້າ​ໃນ​ການ​ເຊື່ອມ​ໂຍງ​ສາຍສຳພັນ ຈີນ-ອາ​ຊຽນ ເຊັ່ນ: ດ້ານວັດທະນະທຳ ການທ່ອງທ່ຽວ ການ​ຄ້າ ເສດຖະກິດ ​ໃຫ້​ນັບ​ມື້ເຕີບ​ໃຫຍ່​ຂະຫຍາຍຕົວ​ຍິ່ງ​ຂຶ້ນ.

ການ​ເດີນທາງ​ຂອງ​ຂະ​ບວນ​ດັ່ງກ່າວ ໄດ້​ເລີ່ມ​ແຕ່​ວັນ​ທີ 10 ທັນວາຜ່ານ​ມາ ໂດຍ​ເລີ່ມ​ຈາກ​ເຂດ​ຫົວເຮີ​ປູ ເມືອງ​ເປ​ຮາຍ ແຂວງ​ກວາງຊີ ​ສປ ຈີນ ຜ່ານຫວຽດນາມ ລາວ ໄທ ມຽນ​ມາ ກຳປູເຈຍ ມາເລ​ເຊຍ ສິງ​ກາ​ໂປ ບຣູ​ໄນ ຟີ​ລິບປິນ ແລະ ສິ້ນ​ສຸດ​ທີ່​ປະເທດ​ອິນໂດ​ເນ​ເຊຍ.

ທ່ານ ​ດຣ. ມ໋ອກ​ຕັນ ຮອງ​ເລຂາ​ທິ​ການ​ອາ​ຊຽນ ຮັບຜິດຊອບດ້ານ​ປະຊາ​ຄົມ ແລະ ການ​ຮ່ວມມື​ຕ່າງປະເທດ​ກ່າວ​ວ່າ: ຂ້າ​ພະເຈົ້າ​ມີ​ຄວາມ​ຮູ້ສຶກ​ດີໃຈ​ຫຼາຍ​ ທີ່​ໄດ້ມີ​ໂອກາດ​ຕ້ອນຮັບ​ຄະນະ​ພວກທ່ານ ​ທີ່​ໄດ້​ສຳເລັດ​ການ​ເດີນທາງ ເຊິ່ງ​ຕະຫຼອດ​ການ​ເດີນທາງ​ບັນດາ​ຜູ້​ເຂົ້າ​ຮ່ວມ​ແມ່ນ​ໄດ້​ຮັບ​ຮູ້​ໄດ້ເຫັນ ແລະ ໄດ້​ມີ​ການ​ພົບ​ປະ​ສື່ສານ​ກັບ​ບັນດາ​ຊັ້ນ​ຄົນ​ດ້ວຍ​ຕົວຂອງ​ທ່ານ​ເອງ ອັນ​ໄດ້​ສ້າງ​ປະສົບການ​ທີ່​ມີ​ຄຸນຄ່າ​ທີ່​ສຸດ ແລະ ຍັງສາມາດ​ເວົ້າ​ໄດ້​ວ່າ​ກິດຈະກຳ​ຄັ້ງນີ້ ເປັນ​ການ​ເດີນທາງ​ແຫ່ງ​ໄມຕີຈິດ​ມິດຕະພາບ ລະຫວ່າງຈີນ-ອາ​ຊຽນ.

ທ່ານ​ນາງ ຈຽນ​ຈິນ ຕາງໜ້າຄະນະ​ກຳມະການ​ຮ່ວມ​ມືຈີນ-ອາ​ຊຽນ ​ກ່າວ​ວ່າ: ການ​ຈັດ​ກິດ​ຈະກຳ​ຄັ້ງ​ນີ້​ຂຶ້ນແມ່ນ​ມີ​ຄວາມ​ສຳຄັນ ບໍ່​ສະເພາະ​ຢູ່​ໃນ​ໄລຍະ​ຂອງການ​ສະເຫຼີມສະຫຼອງ​ອາ​ຊຽນ ຄົບຮອບ 50 ປີ ແຕ່​ຍັງ​ເປັນ​ໄລຍະການ​ສະເຫຼີມສະຫຼອງ​ການ​ຮ່ວມ​ມື​ດ້ານ​ການທ່ອງທ່ຽວຈີນ-ອາຊຽນ​ນຳ​ອີກ ເຊິ່ງ​ໃນ​ໄລຍະ​ຜ່ານມາ ​ການ​ຮ່ວມ​ມື​ດ້ານ​ການ​ທ່ອງທ່ຽວ​ຂອງຈີນ-ອາ​ຊຽນ ແມ່ນໄດ້​ເຕີບ​ໃຫຍ່​ຂະຫຍາຍຕົວ​ຂຶ້ນເປັນ​ກ້າວໆ ​ເຫັນ​ໄດ້​ວ່າໃນ​ປີ​ຜ່ານມາ ມີ​ນັກ​ທ່ອງ​ທ່ຽວ​ຊາວ​ຈີນ​ເດີນທາງ​ເຂົ້າ​ມາ​ອາ​ຊຽນ​ເຖິງ 38 ລ້ານ​ຄົນ ເຊິ່ງ​ໄດ້​ປະກອບສ່ວນ​ຍູ້ແຮງ​ເສດຖະກິດ​ອາ​ຊຽນ​ໃຫ້​ເຕີບໃຫຍ່​ເຂັ້ມແຂງ.

ພິທີ​ປິດ​ກິດຈະກຳ​ຂອງ CAITA ຈັດ​ຂຶ້ນ​ທີ່​ມະຫາ​ວິທະຍາໄລ​ອິນ​ໂດ​ເນ​ເຊຍ ປະເທດ​ອິນ​ໂດເນ​ເຊຍ ໂດຍ​ມີ​ທ່ານ ​ດຣ. ມ໋ອກ ຕັນ ທ່ານ​ນາງ ຈຽນ​ຈິນ ທ່ານ ຊີ ຈຽງ ຮອງ​ປະທານ​ຄະນະ​ກຳ​ມະການ​ກີລາແຂວງ​ກວາງຊີ ​ສປ ຈີນ ທ່ານ ສາດສະດາຈານ ມູ​ຫາມັດ ອາ​ນິສ ອະທິການ​ບໍດີ​ມະຫາວິທະຍາໄລອິນ​ໂດ​ເນ​ເຊຍ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ພູເບ້ຍມາຍນິງ ມອບເງິນແບ່ງປັນຜົນໃຫ້ລັດຖະບານ

ວັນ​ທີ 28 ທັນວາ 2017 ທີ່​ກະຊວງ​ການ​ເງິນ ບໍລິສັດ ພູ​ເບ້ຍມາຍ​ນິງ ຈຳກັດ ໄດ້​ເຂົ້າ​ມອບ-ຮັບ​ເງິນ​ປັນ​ຜົນໄຕ​ມາດ 4 ແລະ ອາກອນ​ກຳໄລ ຈຳນວນ 10,6 ລ້ານ​ໂດ​ລາ​ສະຫະລັດ ຫຼື ປະມານ 88 ຕື້​ກວ່າ​ກີບ ເພື່ອ​ມອບ​ເງິນ​ປັນຜົນ ປະຈຳ​ປີ 2017 ເງິນ​ຈຳນວນດັ່ງກ່າວ ລວມ​ມີ​ເງິນສົດ​ຈາກ​ເງິນປັນ​ຜົນ​ທີ່​ໄດ້​ຮັບ​ຄັ້ງ​ທຳ​ອິດ ພາຍຫຼັງ​ການ​ຊຳລະ​ຄ່າ​ຮຸ້ນໃຫ້​ແກ່​ລັດຖະ​ບານ ມອບ​ໂດຍ​ທ່ານ ຈັນ​ເພັງ ບຸນ​ນະ​ພົນ ປະທານ​ບໍລິສັດ ພູ​ເບ້ຍມາຍ​ນິງ ຈຳກັດ ຮັບ​ແມ່ນ​ທ່ານ ສົມ​ດີ ດວງ​ດີ ຮອງ​ນາຍົກ​ລັດ​ຖະມົນຕີ ລັດຖະມົນຕີ​ກະຊວງ​ການເງິນ ມີ​ພະນັກງານ​ກ່ຽວຂ້ອງ​ເຂົ້າ ຮ່ວມ.

ເງິນ​ຈຳນວນ​ດັ່ງກ່າວ ​ແມ່ນສ່ວນ​ໜຶ່ງ​ຂອງ​ຄາດ​ຄະເນ​ການ​ປະກອບ​ສ່ວນ ປະຈຳ​ປີ 2017 ຈຳນວນ​ຫຼາຍ​ກວ່າ 80 ລ້ານ​ໂດ​ລາ ຫຼື ປະມານ 665 ຕື້​ກວ່າ​ກີບ ຈຳນວນ​ການ​ປະກອບສ່ວນ​ທັງ​ໝົດໃນ​ປີ ແມ່ນ​ຈະ​ມີ​ການ​ແຈ້ງ​ຕື່ມ​ໃນເດືອນ​ຕໍ່​ໄປ ເພາະ​ການ​ສົ່ງ​ອອກແຮ່​ໃນ​ທ້າຍ​ປີ​ແມ່ນ​ຍັງ​ດຳເນີນການ​ຢູ່ ແລະ ລາຄາ​ຂອງ​ໂລຫະໃນ​ທ້າຍ​ປີ​ນີ້ ຍັງ​ມີ​ການ​ປ່ຽນແປງ ການ​ປະກອບສ່ວນ​ຂອງ​ບໍລິສັດຄ່າ​ຊັບພະຍາກອນ​ທຳ​ມະ​ຊາດ 43,8 ລ້ານ​ໂດ​ລາ ຫຼື ປະມານ 364 ຕື້​ກວ່າ​ກີບ ອາກອນ​ເງິນເດືອນ 4,16 ລ້ານ​ໂດ​ລາ ຫຼື ປະມານ 34 ຕື້​ກວ່າ​ກີບ ອາກອນນຳ​ໃຊ້​ທາງ 4,68 ລ້ານ​ໂດ​ລາ ຫຼື ປະມານ 38 ຕື້​ກວ່າ​ກີບ ແລະ ຄ່າທຳນຽມ​ນຳ​ເຂົ້າ ຈຳນວນ 1,64 ລ້ານ​ໂດ​ລາ ຫຼື ປະມານ 13 ຕື້ກວ່າ​ກີບ.

ເສັ້ນທາງ R3 ສ້າງຄວາມສະດວກແກ່ປະຊາຊົນ ເຂົ້າເຖິງການບໍລິການກວດສຸຂະພາບ

ເສັ້ນທາງ​ຫຼວງ​ແຫ່ງ​ຊາດ R3 ຖື​ວ່າ​ເປັນ​ເສັ້ນທາງ​ຫຼັກ ແລະ ສຳຄັນ​ໃນ​ການ​ຄົມມະນາຄົມ​ທີ່​ປະຊາ​ຊົນ​ແຂວງ​ພາກ​ເໜືອ ​ໄດ້​ຮັບ​ຜົນ​ປະໂຫຍດ​ຢ່າງ​ແທ້​ຈິງ ອັນ​ເຮັດ​ໃຫ້ຊີວິດ​ການ​ເປັນ​ຢູ່​ນັບ​ມື້​ດີ​ຂຶ້ນ ລວມທັງ​ການ​ເຂົ້າ​ເຖິງ​ລະບົບ​ສາ​ທາ​ລະ​ນາ​ສຸກ​ຂັ້ນ​ພື້ນຖານ ກໍ່​ໄດ້​ຮັບ​ການປັບປຸງ​ເຊັ່ນ​ກັນ ໂດຍ​ເສັ້ນທາງ​ດັ່ງກ່າວ​ເປີດ​ນຳ​ໃຊ້​ປີ 2008 ເປັນຕົ້ນ​ມາ ໂດຍ​ການ​ກູ້​ຢືມ​ເງິນ​ດອກເບ້ຍ​ຕ່ຳ​ຈາກ​ທະນາຄານ​ພັດ​ທະນາ​ອາຊີ ລັດຖະບານ​ຈີນ ແລະ ລັດຖະບານ​ໄທ ລວມ​ມູນ​ຄ່າ 95 ລ້ານ​ກວ່າ​ໂດ​ລາ​ສະຫະລັດ ຫຼື ປະມານ 480 ຕື້​ກີບ.

ໂຮງໝໍ​ເມືອງ​ວຽງ​ພູ​ຄາ ກໍ່​ເປັນອີກ​ສະຖານທີ່​ໜຶ່ງ ທີ່​ໄດ້​ຮັບ​ຜົນ​ປະໂຫຍດ​ໂດຍ​ກົງ​ຈາກ​ການ​ເປີດ​ນຳໃຊ້​ເສັ້ນທາງ R3 ເນື່ອງ​ຈາກການ​ຄົມມະນາຄົມ​ຂົນສົ່ງ​ທີ່​ສະດວກ​ສະບາຍ ແລະ ວ່ອງໄວ​ ໄດ້ເປັນ​ປັດ​ໄຈ​ພື້ນຖານ​ແກ່​ການ​ເຂົ້າເຖິງ ​ລະບົບ​ສາທາລະນະ​ສຸກ​ຂອງປະຊາຊົນ​ບັນດາເຜົ່າ ເຊິ່ງ​ເມືອງວຽງ​ພູ​ຄາ ຕັ້ງ​ຢູ່​ທາງ​ທິດ​ຕາເວັນອອກ​ຂອງ​ແຂວງ​ຫຼວງ​ນ້ຳ​ທາ ມີຊາຍ​ແດນ​ຕິດ​ກັບ 3 ເມືອງ ຄື: ເມືອງ​ນາ​ແລ ເມືອງ​ລອງ ແລະ ເມືອງ​ຫຼວງ​ນ້ຳ​ທາ ມີ​ພົນລະເມືອງ 24.758 ຄົນ ຍິງ 11.883 ຄົນ ທົ່ວ​ເມືອງ​ມີ​ສະຖານີ​ໃຫ້​ບໍລິການດ້ານ​ສາທາລະນະ​ສຸກ ທັງ​ໝົດ 1 ໂຮງໝໍ​ເມືອງ ແລະ 9 ສຸກສາລາ ເຊິ່ງ​ກ່ອນ​ບໍ່​ທັນ​ໄດ້​ເປີດ​ນຳ​ໃຊ້​ເສັ້ນທາງ R3 ປະຊາຊົນ​ບໍ່​ສາມາດເຂົ້າ​ເຖິງ​ລະບົບ​ສາທາລະນະ​ສຸກເທົ່າ​ທີ່​ຄວນ ແຕ່​ພາຍຫຼັງ​ນຳ​ໃຊ້ເສັ້ນທາງ​ເຫັນ​ວ່າ ​ຕົວ​ເລກ​ຜູ້​ມາ​ໃຊ້​ບໍລິການ​ເພີ່ມ​ຂຶ້ນຈາກ​ປີ 2005 ຈຳນວນ 5.400 ຄົນ ເປັນ 36.440 ຄົນ​ປີ 2017 ພ້ອມດຽວ​ກັນ​ນັ້ນ ທະນາຄານ​ພັດ​ທະນາ​ອາຊີ ຫຼື ADB ຍັງ​ໄດ້​ໃຫ້ການ​ຊ່ວຍເຫຼືອ​ການຈັດຕັ້ງ​ປະຕິບັດ​ໂຄງການ​ສ້າງ​ຄວາມ​ເຂັ້ມແຂງ ເພື່ອ​ປ້ອງ​ກັນ​ການ​ຕິດເຊື້ອ HIV ຫຼື ເຊື້ອ​ພະຍາດ​ເອດ ໃນ​ປີ 2017 ມູນ​ຄ່າ 7.316 ໂດ​ລາ ຫຼື ປະມານ 56 ລ້ານ​ກີບ ໂດຍ​ໂຄງການ​ນີ້​ມີ​ເປົ້າ​ໝາຍ​ເພື່ອ​ເພີ່ມການ​ປົກ​ຄຸມ ແລະ ຄຸນະພາບການ​ປ້ອງ​ກັນ​ພະຍາດ​ເອດ​ ທີ່ອາດ​ເກີດ​ຂຶ້ນ​ຈາກ​ການ​ນຳ​ໃຊ້ເສັ້ນທາງ ສືບ​ເນື່ອງ​ຈາກ​ການຂະຫຍາຍຕົວ​ທາງ​ດ້ານ​ເສດ​ຖະກິດ-ສັງຄົມ ໂດຍ​ສະເພາະແມ່ນ ການ​ນຳ​ໃຊ້​ເສັ້ນທາງ​ເຂົ້າ​ໃນການ​ຂົນສົ່ງ​ສິນຄ້າ​ຜ່ານ​ແດນ ເຊິ່ງ​ມີ​ຄວາມ​ສ່ຽງ​ຫຼາຍ​ທີ່​ເຊື້ອ​ພະຍາດ​ຈະ​ຂະຫຍາຍ​ວົງ​ກວ້າງຫຼາຍ​ຂຶ້ນ ພ້ອມ​ນີ້ ໂຄງການ​ຍັງແນໃສ່​ສ້າງ​ຄວາມ​ເຂັ້ມແຂງ​ໃນການບົ່ງມະຕິ​ການ​ກວດ​ເຊື້ອ​ພະຍາດ ປັບປຸງ​ການ​ຄຸ້ມ​ຄອງ​ແຜນງານ​ແຫ່ງ​ຊາດ ​ເພື່ອ​ສະໜັບ​ສະໜູນ​ໂຄງ​ຮ່າງ​ບໍລິຫານ ກຳນົດ​ກົດລະບຽບ ຮັບປະກັນ​ດ້ານ​ການແພດ ຕະຫຼອດ​ຮອດ​ການ​ສ້າງຄວາມ​ເຂັ້ມແຂງ​ໃຫ້​ແກ່​ພະນັກງານ​ສາທາລະນະ​ສຸກ​ຂັ້ນ​ແຂວງ ແລະ ເມືອງ​ຕື່ມ​ອີກ ຜ່ານ​ການຈັດ​ຕັ້ງ​ປະຕິບັດ​ໂຄງການ​ດັ່ງກ່າວ ໃຫ້​ຮູ້​ວ່າ ທົ່ວ​ເມືອງ​ວຽງ​ພູ​ຄາ ມີຄົນ​ຕິດເຊື້ອ​ເອດ​ທັງ​ໝົດ 11 ຄົນ ເສຍ​ຊີວິດ 4 ຄົນ ນັບ​ແຕ່​ເດືອນ 1-10 ປີ 2017 ມີ​ຄົນ​ໄດ້​ຮັບ​ການກວດ​ເລືອດ ແລະ ກວດ​ພະຍາດ ​ພຕພ ທັງ​ໝົດ 9.528 ຄົນ ພົບຜູ້​ຕິດເຊື້ອ ​ພຕພ 62 ຄົນ ຍິງ 50 ຄົນ ແລະ ຜູ້​ຕິດເຊື້ອ​ເອດ​ແມ່ນບໍ່​ພົບ.

ເລີ່ມພັດທະນາໂຄງການເຂື່ອນໄຟຟ້ານ້ຳຕົກ ເຊລະນອງ 1

ພິທີ​ເຊັນ​ສັນຍາ​ສຳ​ປະທານ (CA) ໂຄງການ​ເຂື່ອນ​ໄຟຟ້າ​ນ້ຳຕົກ​ເຊລະ​ນອງ 1 ລະຫວ່າງລັດຖະ​ບານ​ລາວ ຕາງໜ້າ​ໂດຍ​ກະຊວງ​ແຜນການ ແລະ ການ​ລົງທຶນ ເຊັນ​ໂດຍ​ທ່ານ ຄຳ​ລຽນ ພົນເສນາ ຮອງ​ລັດຖະມົນຕີ​ກະຊວງແຜນການ ແລະ ການ​ລົງທຶນກັບບໍລິສັດ ເຂື່ອນ​ໄຟຟ້າ​ເຊລະ​ນອງ 1 ຈຳກັດ ເຊັນ​ໂດຍ​ທ່ານ Jin Huai Feng ຜູ້ອຳນວຍການ​ໃຫຍ່​ບໍ​ລິສັດ ​ເຂື່ອນ​ໄຟຟ້າ​ເຊລະ​ນອງ 1 ຈຳກັດ ໄດ້​ຈັດ​ຂຶ້ນ​ວັນ​ທີ 28 ທັນວາ 2017 ທີ່​ນະຄອນຫຼວງ​ວຽງ​ຈັນ ມີ​ທ່ານ ສຸພັນ ແກ້ວ​ມີ​ໄຊ ລັດ​ຖະມົນຕີ​ກະຊວງ​ແຜນການ ແລະ ການ​ລົງທຶນ ທ່ານ ຄຳ​ມະນີ ອິນທິ​ລາດ ລັດຖະມົນຕີກະຊວງ​ພະລັງ​ງານ ແລະ ບໍ່​ແຮ່ ທ່ານ​ຮອງເຈົ້າແຂວງ​ສະຫວັນ​ນະ​ເຂດ ທ່ານຮອງ​ລັດຖະມົນຕີ​ກະຊວງ​ການເງິນ ກະຊວງ​ປ້ອງ​ກັນ​ຄວາມ​ສະຫງົບ ບັນດາ​ຫົວໜ້າ​ກົມ ພະ​ແນກການ ບໍລິສັດ​ຄູ່​ຮ່ວມ​ພັດທະນາ ແລະ ພະນັກງານ​ທີ່​ກ່ຽວຂ້ອງ​ທັງສອງ​ຝ່າຍ ​ເຂົ້າ​ຮ່ວມ​ເປັນ​ສັກຂີ​ພິຍານ.

ໂຄງການ​ເຂື່ອນ​ໄຟຟ້າ​ນ້ຳຕົກເຊລະ​ນອງ 1 ມີ​ທີ່​ຕັ້ງ​ຢູ່​ເມືອງ​ນອງ ແລະ ເມືອງ​ພິນ ແຂວງ​ສະຫວັນນະ​ເຂດ ມີ​ກຳລັງ​ແຮງ​ຕິດ​ຕັ້ງ 70 ເມ​ກາ​ວັດ ພະລັງງານ​ຜະລິດ​ໄດ້ 268 GWh ມູນ​ຄ່າ​ໂຄງການ 150 ລ້ານ​ໂດ​ລາ​ສະຫະລັດ ຫຼື ປະມານ 1.200 ຕື້​ກີບ ພະລັງງານໄຟຟ້າ​ຂາຍ​ໃຫ້​ພາຍ​ໃນ​ປະເທດ (ລັດ​ວິ​ສາ​ຫະ​ກິດ​ໄຟຟ້າ​ລາວ) ມີອາຍຸ​ສຳ​ປະທານ 25 ປີ ນັບ​ແຕ່ມື້​ເປີດ​ການ​ຜະລິດ​ໄຟຟ້າ ແລະ ມີໄລຍະ​ການ​ກໍ່ສ້າງ 4 ປີ ນັບ​ແຕ່​ນີ້ຫາ​ປີ 2022 ແລະ ລັດຖະບານຈະ​ມີ​ລາຍ​ຮັບ​ຈາກ​ໂຄງການ​ດັ່ງກ່າວ​ໄລຍະ​ດຳເນີນ​ງານ ເຊັ່ນ: ຈາກ​ຄ່າ​ພາກ​ຫຼວງ ຄ່າ​ອາກອນກຳໄລ ແລະ ເງິນ​ພັດທະນາ​ຊຸມຊົນ ລວມ​ປະມານ 86 ລ້ານ​ໂດລາ ຫຼື ປະມານ 644 ຕື້​ກີບ ຜູ້ລົງທຶນ​ໂດຍ​ແມ່ນ​ບໍລິສັດ ເຂື່ອນໄຟຟ້າ​ເຊລະ​ນອງ 1 ຈຳກັດ ເຊິ່ງປະກອບ​ມີ 4 ຂາ​ຮຸ້ນ ຄື: ລັດ​ຖະບານ​ລາວ ຕາງໜ້າ​ໂດຍ​ລັດ​ວິສາ​ຫະ​ກິດ​ໄຟຟ້າ​ລາວ ຖື​ຮຸ້ນ 10% (ຮຸ້ນ​ລ້າ) ບໍລິສັດ ດາວ​ສະຫວັນ ຈຳກັດ (ເອກະ​ຊົນ​ລາວ) ຖື​ຮຸ້ນ 15% ບໍລິສັດ YEIG International Energy Development (​ສປ​ ຈີນ) ຖືຮຸ້ນ 70% ແລະ ບໍລິສັດ Sunpaper Holding Lao (​ສປ ຈີນ) ຖື​ຮຸ້ນ 5%.

ໂຕໂຢຕ້າຊ່ວຍສ້າງສະໂມສອນໂຮງຮຽນສົມບູນວຽງໄຊ

ພິທີ​ມອບ-ຮັບ ແລະ ເປີດ​ນຳໃຊ້​ອາຄານ​ສະໂມສອນ​ໂຮງຮຽນສົມບູນ​ວຽງ​ໄຊ ເມືອງ​ວຽງ​ໄຊ ແຂວງ​ຫົວພັນ ໄດ້​ຈັດ​ຂຶ້ນ​ເມື່ອ​ບໍ່ດົນ​ມາ​ນີ້ ມີ​ທ່ານ ວັນ​ໄຊ ແພງ​ຊຸມມາ ເຈົ້າແຂວງ​ຫົວພັນ ທ່ານ ສຸ​ວິດ ສິ​ມະ​ສະກຸນ ປະທານ​ສະມາ​ຄົມ​ໄທ-ລາວ ເພື່ອ​ມິດ​ຕະພາບ ທ່ານ ຫຽມ ພົມມະຈັນ ປະທານ​ສະມາຄົມ ລາວ-ໄທ ເພື່ອມິດຕະພາບ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ອາຄານ​ສະໂມສອນ​ດັ່ງກ່າວ ເປັນ​ອາຄານ​ໂຄງ​ເຫຼັກ ຂະໜາດ 15×28 ແມັດ ສູງ 8 ແມັດ ດ້ານໜ້າ​ມີ​ເວທີ ຂະໜາດ 4×15 ແມັດ ເປັນ​ອາຄານ​ໂຄງ​ເຫຼັກ​ບໍ່​ມີ​ຝາ ເປັນ​ພື້ນ​ຄອນ​ກຣີດ​ເສີມ​ເຫຼັກ ມູນຄ່າ​ການ​ກໍ່ສ້າງ 2,1 ລ້ານ​ບາດ ຫຼື ປະມານ 493,5 ລ້ານ​ກີບ ໂດຍ​ບໍລິ​ສັດ​ ໂຕ​ໂຢ​ຕ້າ​ມໍ​ເຕີ້ ປະເທດ​ໄທ ຈຳກັດ ໃຫ້ການ​ສະໜັບສະໜູນ ເຊິ່ງ​ອາຄານ​ສ້າງ​ຂຶ້ນ​ເພື່ອ​ໃຫ້​ໂຮງຮຽນ​ໄດ້​ໃຊ້​ເປັນ​ບ່ອນ​ປະຊຸມ ຫຼິ້ນກີລາ ​ຈັດ​ກິດຈະກຳ ຈັດການ​ສະແດງ​ສິລະ​ປະ​ຂອງ​ນັກຮຽນ ແລະ ອື່ນໆ.

ໂຄງການ​ຊ່ວຍເຫຼືອ​ຄັ້ງ​ນີ້ ເປັນອີກ​ໜຶ່ງ​ກິດຈະກຳ​ດີໆ​ທີ່​ບໍລິສັດ ​ໂຕໂຢ​ຕ້າ​ມໍ​ເຕີ້ ​ປະເທດ​ໄທ ຈຳກັດ ມີສ່ວນ​ຮ່ວມ​ມາ​ໂດຍ​ຕະຫຼອດ ເພື່ອສະໜັບສະໜູນ​ການ​ສຶກ​ສາ​ຂອງເຍົາວະ​ຊົນ​ລາວ ນອກຈາກ​ນີ້ ໂຕໂຢ​ຕ້າ​ຍັງ​ຈະ​ສືບຕໍ່​ສະໜັບສະໜູນ ແລະ ດຳເນີນ​ກິດຈະກຳ​ຕ່າງໆ​ທີ່ມີ​ປະໂຫຍດ​ຕໍ່​ສັງຄົມ ການ​ສຶກ​ສາ ລວມ​ເຖິງ​ປະເພນີ​ວັດທະນະທຳຕ່າງໆ​ຂອງ​ລາວ​ຕໍ່​ໄປ​ໃນ​ອະ​ນາຄົດ.

ເຊກອງ ເປີດປີທ່ອງທ່ຽວ 2018 ພ້ອມງານສະຫຼອງເທດສະການ 10 ເຜົ່າເສົາຫຼັກເມືອງ

ແຂວງເຊກອງ ໄດ້ເປີດປີທ່ອງທ່ຽວ 2018 ຢ່າງເປັນທາງການໃນວັນທີ 31 ທັນວາ 2017 ຜ່ານມາ ຊຶ່ງງານດັ່ງກ່າວໄດ້ຈັດຂຶ້ນພ້ອມກັບງານເທດສະການ 10 ເຜົ່າ ເສົາຫຼັກເມືອງ, ທີ່ເດີ່ນສວນເສົາຫຼັກເມືອງ ໂດຍມີທ່ານສອນໄຊ ສີພັນດອນ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີແຫ່ງ ສປປ ລາວ, ປະທານຄະນະຊີ້ນໍາລະດັບຊາດ ໃນການຈັດງານປີທ່ອງທ່ຽວລາວ 2018, ທ່ານ ຄໍາເຜີຍ ບຸດດາວຽງ ກໍາມະການສູນກາງພັກ ເລຂາພັກແຂວງ ເຈົ້າແຂວງເຊກອງ, ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງ ຖວທ, ຄະນະຊີ້ນໍາລະດັບຊາດ ໃນການຈັດງານປີທ່ອງທ່ຽວລາວ 2018, ທ່ານ ຖາວອນ ພົມມະໄລລຸນ ກໍາມະການປະຈໍາພັກແຂວງ ຮອງເຈົ້າແຂວງ, ປະທານຄະນະຊີ້ນໍາການຈັດງານເປີດປີທ່ອງທ່ຽວລາວ 2018 ຂັ້ນແຂວງ, ມີບັນດາທ່ານເຈົ້າແຂວງ, ຮອງເຈົ້າແຂວງຈໍາປາສັກ, ສາລະວັນ, ອັດຕະປື ພ້ອມດ້ວຍບັນດາແຂກທັງພາຍໃນ ແລະຕ່າງປະເທດ ແລະມວນຊົນເຂົ້າຊົມຢ່າງຫຼວງຫຼາຍ.
ທ່ານ ຄຳເຜີຍ ບຸດດາວຽງ ກ່າວເປີດປີທ່ອງທ່ຽວລາວ 2018 ທີ່ແຂວງເຊກອງວ່າ: ການເປີດປີທ່ອງທ່ຽວ 2018 ເປັນເຫດການສຳຄັນທີ່ສະແດງໃຫ້ເຫັນວ່າ ທົ່ວສັງຄົມລາວມີຄວາມພ້ອມພຽງຮຽງໜ້າໃນການເປັນເຈົ້າທີ່ດີ ເພື່ອຕ້ອນຮັບນັກທ່ອງທ່ຽວທີ່ມາຈາກທັງພາຍໃນ ແລະ ຕ່າງປະເທດ, ຖືເອົາປີທ່ອງທ່ຽວເປີດກວ້າງການພັດທະນາຮອບດ້ານ ແລະ ເຊື່ອມໂຍງຂອງທຸກຂະແໜງການໃນທົ່ວປະເທດ ເພື່ອຍົກສູງກຳລັງແຮງສັງລວມຂອງຊາດເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ດ້ວຍການດຶງດູດນັກທ່ອງທ່ຽວເຂົ້າມາທ່ຽວຊົມ ແລະ ສ້າງລາຍຮັບໃນແຂວງເຊກອງໃຫ້ຫຼາຍຂຶ້ນ.
ທ່ານເຈົ້າແຂວງໆເຊກອງຍັງໄດ້ຮຽກຮ້ອງປະຊາຊົນລາວບັນດາເຜົ່າ ໂດຍສະເພາະຊາວແຂວງເຊກອງເຂົ້າຮ່ວມການຜະລິດ, ການສະໜອງ ແລະການບໍລິການຕ່າງໆແກ່ນັກທ່ອງທ່ຽວດ້ວຍຮອຍຍິ້ມ ແລະສຽງຫົວ, ຮ່ວມກັນເປັນເຈົ້າພາບ, ປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ທັງນີ້ ກໍແນໃສ່ເຮັດໃຫ້ນັກທ່ອງທ່ຽວທີ່ມາທ່ຽວມາຊົມມີຄວາມເບີກບານມ່ວນຊື່ນ ແລະສະບາຍໃຈຄືຢູ່ບ້ານຂອງເພິ່ນເອງ.
ຂະນະທີ່ທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ, ປະທານຄະນະຊີ້ນໍາການຈັດງານເປີດປີທ່ອງທ່ຽວ 2018 ຂັ້ນແຂວງກ່າວວ່າ: ວຽກງານທ່ອງທ່ຽວເປັນຂະແໜງການໜຶ່ງທີ່ສ້າງລາຍຮັບໃຫ້ແກ່ປະເທດຊາດ ກໍຄືປະຊາຊົນໄດ້ດີພໍສົມຄວນ, ເວົ້າສະເພາະຢູ່ແຂວງເຊກອງປີ 2017 ມີນັກທ່ອງທ່ຽວມາທ່ຽວແຂວງເຊກອງ 38,429 ຄົນ, ສາມາດສ້າງລາຍຮັບໃຫ້ສັງຄົມໄດ້ທັງໝົດ 7.685.800 ໂດລາ ຊຶ່ງພາຍຫຼັງເປີດປີທ່ອງທ່ຽວຮອດ 2020 ຄາດວ່າຈະມີນັກທ່ອງທ່ຽວເຂົ້າແຂວງເຊກອງປະມານ 82.849 ຄົນ, ຈະສ້າງລາຍຮັບໄດ້ 16.569.800 ໂດລາ, ພ້ອມນີ້ ແຂວງກໍໄດ້ມີການກະກຽມກົນໄກຊຸກຍູ້ໃຫ້ວຽກງານທ່ອງທ່ຽວມີຜົນສຳເລັດເປັນຕົ້ນ: ຊຸກຍູ້ການຈັດຕັ້ງປະຕິບັດນິຕິກຳກ່ຽວກັບວຽກທ່ອງທ່ຽວ, ສຸມໃສ່ພັດທະນາພື້ນຖານໂຄງລ່າງ ແລະສິ່ງອຳນວຍຄວາມສະດວກຕ່າງໆ ເພື່ອຮອງຮັບນັກທ່ອງທ່ຽວໃຫ້ໄດ້ 50.000 ຄົນໃນປີ 2018, ສ້າງຈິດສຳນຶກແກ່ສັງຄົມໃຫ້ເຫັນໄດ້ຄວາມໝາຍສຳຄັນຂອງວຽກງານທ່ອງທ່ຽວ, ຊຸກຍູ້ສົ່ງເສີມທຸລະກິດຂະໜາດນ້ອຍ ແລະຂະໜາດກາງດ້ານການທ່ອງທ່ຽວໃຫ້ມີຄຸນນະພາບ ແລະວຽກງານອື່ນໆເພື່ອຮອງຮັບວຽກງານທ່ອງທ່ຽວ.
ໃນງານເປີດປີທ່ອງທ່ຽວ 2018 ກໍຄືງານສະຫຼອງເທດສະການ 10 ເຜົ່າເສົາຫຼັກເມືອງຄັ້ງນີ້ປະກອບມີກິດຈະກຳຕ່າງໆເຊັ່ນ: ງານຕະຫຼາດນັດວາງສະແດງຜະລິດຕະພັນ ແລະສິນຄ້າຕ່າງໆຈາກບັນດາແຂວງອ້ອມຂ້າງ, ຜະລິດຕະພັນຈາກ 4 ຕົວເມືອງ, ຂະບວນກ້ອນກໍາລັງ 500 (ແຫ່ຂັນໝາກເບັງ 100 ຂັນ, ເປົ່າແຄນ 100 ດວງ, ຕີຄ້ອງ 100 ໜ່ວຍ ແລະເປົ່າຂຸ່ຍ 100 ດວງ) ແລະລາຍການສະແດງສິລະປະວັນນະຄະດີຈາກກອງສິລະປະຂອງແຂວງ, ລາຍການສະແດງກາຍະສິນທີ່ມາຈາກກອງກາຍະສິນແຫ່ງຊາດ, ຮັບຟັງໝໍລໍາໃຕ້ ແລະສະເຫຼີມສະຫຼອງປີໃໝ່ສາກົນ ນັບຖອຍຫຼັງສົ່ງທ້າຍປີເກົ່າ ຄສ 2017 ຕ້ອນຮັບປີໃໝ່ ຄສ 2018 ຢ່າງຄຶກຄື້ນ.
ສຳລັບກິດຈະກຳເປີດປີທ່ອງທ່ຽວ 2018 ຂອງແຂວງເຊກອງ ຍັງຈະໄດ້ຈັດຢູ່ບັນດາເມືອງ ເຊິ່ງຈະມີກິດຈະກໍາງານບຸນປະເພນີຂອງເຜົ່າ ແລະເທດສະການຕ່າງໆຢູ່ໃນ 4 ຕົວເມືອງ. ນອກນີ້, ຍັງຈະມີກິດຈະກໍາສົ່ງເສີມການທ່ອງທ່ຽວເປັນຕົ້ນ: ທ່ອງທ່ຽວດ້ານທໍາມະຊາດ, ປະຫວັດສາດ, ວັດທະນະທໍາ, ກະສິກໍາ ແລະຫັດຖະກໍາ ຈໍານວນໜຶ່ງ, ພິເສດໃນປີນີ້ ແຂວງເຊກອງໄດ້ສໍາເລັດໂຄງການກໍ່ສ້າງຂົວຂ້າມນໍ້າເຊກອງ ແລະ ກໍາລັງກະກຽມເປີດດ່ານດາກຕະອອກເປັນດ່ານສາກົນແຫ່ງທີ 9 ຂອງຊາດ ແລະ ທີ 1 ໃນ 4 ດ່ານທີ່ແຂວງເຊກອງຕິດກັບຕ່າງປະເທດ (ສສ ຫວຽດນາມ), ການເປີດນໍາໃຊ້ສູນການຄ້າຂອງແຂວງ ແລະງານສະເຫຼີມສະຫຼອງວັນສ້າງຕັ້ງເມືອງທ່າແຕງ ຄົບຮອບ 25 ປີ ແລະງານອື່ນໆອີກ.

JDB ຮ່ວມມືກັບລາວ-ໄອທີໂຊລູເຊິນ ຂະຫຍາຍຕູ້ເອທີເອັມ

ວັນ​ທີ 26 ທັນວາ 2017 ທີ່ສຳນັກງານ​ໃຫຍ່​ທະນາຄານ​ຮ່ວມພັດທະນາ (JDB) ໄດ້​ມີ​ພິທີ​ເຊັນສັນຍາ​ຮ່ວມ​ມື​ພັນທະ​ມິດ​ທາງດ້ານ​ການ​ຄ້າລະ​ຫວ່າງ JDB ແລະ ບໍລິສັດ​ ລາວ-ໄອ​ທີ​ໂຊ​ລູ​ເຊິນ ຮ່ວມ​ລົງ​ນາມລະຫວ່າງ​ທ່ານ ສູນ​ທອນ ຈັນທະ​ວົງ ຜູ້​ອຳນວຍການ​ໃຫຍ່ JDB ແລະ ທ່ານ ພູ​ມະ​ໄລ ໄຊ​ສົມບັດ ຜູ້​ອຳນວຍການ​ບໍລິສັດ ລາວ-ໄອ​ທີ​ໂຊ​ລູ​ເຊິນ ມີ​ຄະນະ​ອຳນວຍ​ການ ແລະ ວິຊາການ​ທີ່​ກ່ຽວຂ້ອງ​ທັງ​ສອງ​ຝ່າຍ ເຂົ້າ​ຮ່ວມ.

ການ​ຮ່ວມ​ມື​ສອງ​ຝ່າຍ​ຄັ້ງ​ນີ້ ເພື່ອ​ອຳນວຍ​ຄວາມ​ສະດວກ​ໃຫ້ລູກ​ຄ້າ​ຂອງ JDB ສາມາດ​ນຳໃຊ້​ຕູ້​ເອ​ທີ​ເອັມ​ໄດ້​ຢ່າງ​ທົ່ວ​ເຖິງ ໂດຍ​ບໍລິສັດ ລາວ-ໄອ​ທີ​ໂຊ​ລູ​ເຊິນ ຈະ​ເປັນ​ຜູ້​ສະໜອງຕູ້ ATM ລຸ້ນ H22 VL ຈຳນວນ 200 ຕູ້ ເພື່ອຕິດ​ຕັ້ງ​ຕາມ​ຈຸດ​ຕ່າງໆ​ທີ່​ເໝາະສົມ​ໃນ​ຊຸມ​ຊົນ​ຕ່າງໆ​ຂອບ​ເຂດທົ່ວ​ປະເທດ ເພື່ອ​ເພີ່ມ​ຂີດ​ຄວາມສາມາດ​ໃນ​ການ​ບໍລິການ​ທາງດ້ານ​ການ​ເງິນ​ຜ່ານ​ຕູ້​ເອ​ທີ​ເອັມຂອງ JDB ໃຫ້​ຫຼາຍ​ຂຶ້ນ ເຊິ່ງຝ່າຍ JDB ຈະ​ເປັນ​ຜູ້​ສະໜອງເງິນສົດ​ໃສ່​ຕູ້​ເອ​ທີ​ເອັມ​ເປັນ​ປົກກະຕິ ໂດຍ​ການ​ນຳ​ໃຊ້​ເຄືອ​ຄ່າຍພາຍ​ໃຕ້​ລະບົບ​ຂອງ JDB ບົນພື້ນຖານ​ຫຼັກການ​ຕ່າງ​ຝ່າຍ​ຕ່າງມີ​ຜົນ​ປະໂຫຍດ ເຊິ່ງ​ໄລຍະ​ການຮ່ວມ​ມື 10 ປີ ນັບ​ແຕ່​ມື້​ລົງ​ລາຍເຊັນ​ເປັນຕົ້ນ​ໄປ ແລະ ສາມາດຕໍ່​ໄດ້​ອີກ 10 ປີ.

ທ່ານ ສູນ​ທອນ ຈັນທະ​ວົງ ໄດ້​ກ່າວ​ວ່າ: ການ​ຮ່ວມ​ມື​ກັນ​ກັບບໍລິສັດ ລາວ-ໄອ​ທີ​ໂຊ​ລູ​ເຊິນ ຮູ້ສຶກ​ດີໃຈ ແລະ ຫວັງ​ວ່າ​ໃນ​ອະ​ນາຄົດ​ຈະ​ໄດ້​ມີ​ຖານ​ລູກ​ຄ້າ​ທີ່​ນຳ​ໃຊ້​ຕູ້ເອ​ທີ​ເອັມ​ຂອງ JDB ຈະ​ມີ​ຄວາມສະດວກ​ສະບາຍ​ຫຼາຍ​ຂຶ້ນ ສ່ວນທ່ານ ພູ​ມະ​ໄລ ໄຊ​ສົມບັດ ກ່າວວ່າ: ໃນ​ໂອກາດ​ຮ່ວມ​ມື​ກັບ JDB ເຊື່ອ​ໝັ້ນ​ວ່າການ​ຮ່ວມ​ມື​ຄັ້ງ​ນີ້ ​ຈະປະສົບ​ຜົນສຳເລັດ​ເປັນ​ກ້າວໆ​ ຕະຫຼອດ​ໄປລູກ​ຄ້າ​ບໍ່​ຈຳເປັນ​ຕ້ອງໄປ​ໃຊ້​ບໍລິການ​ຢູ່​ໜ້າ​ຄາວ​ເຕີ​ຂອງທະນາຄານ​ກໍ່​ໄດ້ ເພາະ​ເປັນ​ຍຸກທີ່​ທັນ​ສະໄໝ ຍຸກ​ດີ​ຈີ​ຕອນ ​ລູກ​ຄ້າສາມາດ​ທຳ​ທຸລະ​ກຳ​ທາງ​ດ້ານການ​ເງິນ​ດ້ວຍ​ລູກ​ຄ້າ​ເອງ ເຊັ່ນ: ຜ່ານ​ລະບົບ​ມື​ຖື ລະບົບ​ອິນ​ເຕີ​ເນັດ ແລະ ຕູ້​ເອ​ທີ​ເອັມ ປັດຈຸບັນ JDB ໄດ້​ຮ່ວມ​ມື​ກັບ​ຫຼາຍ​ອົງ​ກອນ ແລະ ຫຼາຍ​ບໍລິສັດ ​ເພື່ອ​ບໍລິການ​ດ້ານການ​ເງິນ​ທີ່​ຄົບ​ວົງ​ຈອນ​ໃຫ້​ກັບ​ລູກຄ້າ​ທຸກ​ລະດັບ ​ຢ່າງ​ເທົ່າ​ທຽມ​ກັນ.

ຂ່າວໜ້າ​ໜຶ່ງ ພູເບ້ຍມາຍນິງ ມອບເງິນແບ່ງປັນຜົນໃຫ້ລັດຖະບານ ພູເບ້ຍມາຍນິງ ມອບເງິນແບ່ງປັນຜົນໃຫ້ລັດຖະບານ

ວັນ​ທີ 28 ທັນວາ 2017 ທີ່​ກະຊວງ​ການ​ເງິນ ບໍລິສັດ ພູ​ເບ້ຍມາຍ​ນິງ ຈຳກັດ ໄດ້​ເຂົ້າ​ມອບ-ຮັບ​ເງິນ​ປັນ​ຜົນໄຕ​ມາດ 4 ແລະ ອາກອນ​ກຳໄລ ຈຳນວນ 10,6 ລ້ານ​ໂດ​ລາ​ສະຫະລັດ ຫຼື ປະມານ 88 ຕື້​ກວ່າ​ກີບ ເພື່ອ​ມອບ​ເງິນ​ປັນຜົນ ປະຈຳ​ປີ 2017 ເງິນ​ຈຳນວນດັ່ງກ່າວ ລວມ​ມີ​ເງິນສົດ​ຈາກ​ເງິນປັນ​ຜົນ​ທີ່​ໄດ້​ຮັບ​ຄັ້ງ​ທຳ​ອິດ ພາຍຫຼັງ​ການ​ຊຳລະ​ຄ່າ​ຮຸ້ນໃຫ້​ແກ່​ລັດຖະ​ບານ ມອບ​ໂດຍ​ທ່ານ ຈັນ​ເພັງ ບຸນ​ນະ​ພົນ ປະທານ​ບໍລິສັດ ພູ​ເບ້ຍມາຍ​ນິງ ຈຳກັດ ຮັບ​ແມ່ນ​ທ່ານ ສົມ​ດີ ດວງ​ດີ ຮອງ​ນາຍົກ​ລັດ​ຖະມົນຕີ ລັດຖະມົນຕີ​ກະຊວງ​ການເງິນ ມີ​ພະນັກງານ​ກ່ຽວຂ້ອງ​ເຂົ້າ ຮ່ວມ.

ເງິນ​ຈຳນວນ​ດັ່ງກ່າວ ​ແມ່ນສ່ວນ​ໜຶ່ງ​ຂອງ​ຄາດ​ຄະເນ​ການ​ປະກອບ​ສ່ວນ ປະຈຳ​ປີ 2017 ຈຳນວນ​ຫຼາຍ​ກວ່າ 80 ລ້ານ​ໂດ​ລາ ຫຼື ປະມານ 665 ຕື້​ກວ່າ​ກີບ ຈຳນວນ​ການ​ປະກອບສ່ວນ​ທັງ​ໝົດໃນ​ປີ ແມ່ນ​ຈະ​ມີ​ການ​ແຈ້ງ​ຕື່ມ​ໃນເດືອນ​ຕໍ່​ໄປ ເພາະ​ການ​ສົ່ງ​ອອກແຮ່​ໃນ​ທ້າຍ​ປີ​ແມ່ນ​ຍັງ​ດຳເນີນການ​ຢູ່ ແລະ ລາຄາ​ຂອງ​ໂລຫະໃນ​ທ້າຍ​ປີ​ນີ້ ຍັງ​ມີ​ການ​ປ່ຽນແປງ ການ​ປະກອບສ່ວນ​ຂອງ​ບໍລິສັດຄ່າ​ຊັບພະຍາກອນ​ທຳ​ມະ​ຊາດ 43,8 ລ້ານ​ໂດ​ລາ ຫຼື ປະມານ 364 ຕື້​ກວ່າ​ກີບ ອາກອນ​ເງິນເດືອນ 4,16 ລ້ານ​ໂດ​ລາ ຫຼື ປະມານ 34 ຕື້​ກວ່າ​ກີບ ອາກອນນຳ​ໃຊ້​ທາງ 4,68 ລ້ານ​ໂດ​ລາ ຫຼື ປະມານ 38 ຕື້​ກວ່າ​ກີບ ແລະ ຄ່າທຳນຽມ​ນຳ​ເຂົ້າ ຈຳນວນ 1,64 ລ້ານ​ໂດ​ລາ ຫຼື ປະມານ 13 ຕື້ກວ່າ​ກີບ.

ຮ່ວມມືແກ້ໄຂຄວາມທຸກຍາກຂອງປະຊາຊົນ

ສູນ​ກາງ​ແນວ​ລາວ​ສ້າງ​ຊາດ ແລະ ກຸ່ມ​ບໍລິສັດ ພົງ​ສະຫວັນ ຈຳກັດ ເຊັນ​ບົດ​ບັນທຶກ​ການ​ຮ່ວມ​ມື ຈັດ​ຕັ້ງ​ປະຕິບັດ​ໂຄງການ​ສ້າງຄອບຄົວ ແລະ ບ້ານ​ສາມັກຄີປອງ​ດອງ​ ຕິດ​ພັນ​ກັບ​ການ​ແກ້​ໄຂຄວາມທຸກ​ຍາກ​ຂອງ​ປະຊາຊົນບັນດາເຜົ່າ​ຂຶ້ນ ​ວັນ​ທີ 26 ທັນວາ 2017 ທີ່​ສູນ​ກາງ​ແນວ​ລາວ​ສ້າງຊາດ ຮ່ວມ​ລົງ​ນາມລະຫວ່າງທ່ານ​ນາງ ຄຳ​ຈັນ ພົມ​ແສງ​ສະຫວັນ ຮອງ​ປະທານ​ສູນ​ກາງ​ແນວລາວ​ສ້າງ​ຊາດ ທ່ານ ເລັ່ງ​ຊົງ ຕົ່ງສີ ປະທານ​ແນວ​ລາວ​ສ້າງ​ຊາດ ແຂວງ​ໄຊ​ສົມບູນ ແລະ ທ່ານ​ພົນໂທ ໄອ່ ສຸລິຍະ​ແສງ ປະທານ​ກຸ່ມບໍລິສັດ ພົງ​ສະຫວັນ ມີ​ທ່ານ ໄຊສົມ​ພອນ ພົມວິຫານ ປະທານ​ສູນກາງ​ແນວ​ລາວສ້າງ​ຊາດ ແລະ ພະນັກງານ​ທີ່​ກ່ຽວຂ້ອງ​ສອງ​ຝ່າຍ ເຂົ້າ​ຮ່ວມ.

ການ​ເຊັນ​ບົດ​ບັນທຶກ​ຄັ້ງ​ນີ້ ສອງຝ່າຍ​ຈະ​ຮ່ວມ​ກັນ​ສ້າງ​ແຜນ​ດຳເນີນ​ງານ​ບົດ​ສະເໜີ​ໂຄງການ ແລະ ຈັດ​ຕັ້ງ​ປະຕິບັດ​ໂຄງການສ້າງ​ຄອບຄົວ ແລະ ບ້ານ​ສາ​ມັກຄີ​ປອງ​ດອງ​ ຕິດ​ພັນ​ກັບ​ການ​ແກ້​ໄຂຄວາມທຸກ​ຍາກ​ໃນ​ຂອບ​ເຂດ​ທົ່ວປະເທດ ໂດຍ​ກຳນົດ​ເອົາ​ຈຸດ​ສຸມບ້ານ​ໂພນ​ສະອາດ ເມືອງ​ລ້ອງຊານ ແຂວງ​ໄຊ​ສົມບູນ ເປັນ​ຈຸດທົດ​ລອງ​ສ້າງ​ເປັນ​ຕົວ​ແບບ​ໃນການ​ຮຽນ​ຮູ້ ແລະ ຖອດ​ຖອນ​ບົດຮຽນ ໄລຍະ​ເວລາ 3 ປີ (2018-2020) ຈະ​ຮ່ວມ​ມື​ແລກປ່ຽນ​ຂໍ້ມູນ​ຂ່າວສານ​ຄົ້ນຄວ້າ​ວິເຄາະ-ວິໄຈ​ທາງ​ດ້ານ​ວິຊາ​ການ​ໃນ​ວຽກງານ​ດັ່ງກ່າວ ເພື່ອ​ເຫັນ​ໄດ້​ທາງດ້ານ​ທ່າແຮງ ແລະ ສິ່ງ​ທ້າ​ທາຍ ນັບ​ທັງ​ຂໍ້​ສະດວກ ​ຂໍ້​ຫຍຸ້ງຍາກ ແລະ ບົດຮຽນ​ທີ່​ສາມາດ​ຖອດຖອນ​ໄດ້​ຈາກ​ພຶດຕິ​ກຳ​ຕົວ​ຈິງ ໂດຍ​ແບ່ງ​ຄວາມ​ຮັບຜິດຊອບລະຫວ່າງສູນ​ກາງ​ແນວ​ລາວສ້າງ​ຊາດ ກຸ່ມ​ບໍລິສັດ ພົງ​ສະຫວັນ ແລະ ແນວ​ລາວ​ສ້າງ​ຊາດຢູ່​ຂັ້ນ​ທ້ອງຖິ່ນ ແຕ່ງຕັ້ງ​ຄະນະ​ຊີ້ນຳຄະນະ​ຮັບຜິດຊອບ​ປະຕິບັດງານ​ຮ່ວມ​ກັນ ເພື່ອ​ວາງ​ໂຄງການກິດຈະກຳ​ການຈັດຕັ້ງ​ປະຕິບັດ​ຕິດຕາມ​ກວດກາ ແລະ ປະ​ເມີນ​ຜົນໂຄງການ​ໃນ​ແຕ່​ລະ​ໄລຍະ ຄະນະຮັບຜິດຊອບ​ທີ່​ໄດ້​ຮັບ​ການ​ແຕ່ງຕັ້ງຂອງ​ສອງ​ຝ່າຍ ​ຕ້ອງ​ສ້າງ​ກົນ​ໄກການ​ພົວພັນ​ຮ່ວມ​ມື​ສອງ​ຝ່າຍ ຫຼື ຫຼາຍ​ຝ່າຍ​ໃນ​ໄລຍະ​ສັ້ນ ແລະ ໄລຍະ​ຍາວ ເພື່ອ​ສະເໜີ​ຜ່ານ​ການຮັບຮອງ​ຂອງ​ສອງ​ຝ່າຍ​ໃນ​ແຕ່​ລະໄລຍະ.

ທັງ​ນີ້ ເພື່ອ​ເປັນ​ການຈັດຕັ້ງປະຕິບັດ​ສອງ​ໜ້າທີ່​ຍຸດ​ທະ​ສາດ ຄື: ປົກ​ປັກ​ຮັກສາ ແລະ ສ້າງສາພັດທະນາ​ປະເທດ​ຊາດ ເພີ່ມ​ທະວີຄວາມ​ສາມັກຄີ​ຄວາມ​ເປັນ​ເອກະພາບ​ຂອງ​ປະຊາຊົນ​ບັນດາເຜົ່າ ເຂົ້າ​ໃນ​ການ​ແກ້​ໄຂ​ຄວາມທຸກຍາກ ໂດຍ​ເລີ່ມ​ຈາກ​ຄອບຄົວ ແລະ ຮາກ​ຖານ​ບ້ານ ເຊິ່ງ​ແມ່ນມູນເຊື້ອ ແລະ ເປັນ​ປັດ​ໄຈ​ສຳຄັນ ໃນ​ການ​ສ້າງ​ສະ​ເຖຍ​ລະ​ພາບ ຄວາມ​ສະຫງົບ ແລະ ຄວາມ​ມັ່ງຄັ່ງ​ເຂັ້ມແຂງ​ຂອງ​ປະເທດ​ຊາດ.