ຫຼາຍບັນຫາສຳຄັນທີ່ສະພານະຄອນຫຼວງຮັບຮອງເອົາ ເພື່ອນຳໄປຈັດຕັ້ງປະຕິບັດ

ກອງ​ປະຊຸມ​ສະໄໝ​ສາມັນເທື່ອ​ທີ 4 ຂອງ​ສະພາ​ປະຊາຊົນ ນະຄອນຫຼວງ​ວຽງ​ຈັນ (ນວ) ຊຸດທີ I ອັດ​ລົງ​ດ້ວຍ​ຜົນສຳເລັດ​ໃນວັນ​ທີ 12 ມັງກອນ 2018 ພາຍຫຼັງ​ດຳເນີນ​ມາ​ເປັນ​ເວລາ 4 ວັນ ໂດຍ​ເປັນ​ປະທານ​ຂອງ​ທ່ານ ອາ​ນຸພາບ ຕຸ​ນາ​ລົມ ປະທານ​ສະພາ​ປະຊາ​ຊົນ ນວ ໃຫ້​ກຽດ​ເຂົ້າ​ຮ່ວມ​ມີທ່ານ ສິນ​ລະ​ວົງ ຄຸດ​ໄພທູນ ເຈົ້າຄອງ​ນະຄອນຫຼວງ​ວຽງ​ຈັນ ພ້ອມດ້ວຍ​ການ​ນຳ​ນະຄອນຫຼວງ ສະມາ​ຊິກ​ສະພາ​ແຫ່ງ​ຊາດ ປະຈຳເຂດ​ເລືອ​ຕັ້ງ​ທີ I ສະມາຊິກ ​ສສ ນວ ແລະ ແຂກ​ຖືກ​ເຊີນ.

ທ່ານ ອານຸພາບ ຕຸ​ນາ​ລົມ ໄດ້ກ່າວ​ວ່າ: ຕະຫຼອດ​ໄລຍະ​ການ​ດຳເນີນ​ກອງ​ປະຊຸມ​ໄດ້​ສຸມ​ທຸກ​ສະຕິປັນຍາ ​ເຂົ້າ​ໃນ​ການ​ຄົ້ນຄວ້າ​ພິ​ຈາລະ​ນາ ແລະ ຕົກລົງ​ຮັບຮອງ​ເອົາບັນຫາ​ສຳຄັນ​ຂອງ ນວ ເພື່ອ​ເປັນພື້ນຖານ​ໃຫ້​ແກ່​ການ​ຍູ້​ແຮງ​ທາງດ້ານ​ວຽກ​ງານ​ພັດທະນາ​ເສດ​ຖະກິດ-ສັງຄົມຂອງ ນວ ມີ​ການ​ຂະຫຍາຍ​ຕົວຢ່າງ​ຕໍ່​ເນື່ອງ ແລະ ເຂັ້ມແຂງ ໂດຍ​ໄດ້​ຕົກລົງ​ເຫັນ​ດີເປັນ​ເອກະ​ພາບ​ຮັບຮອງ​ເອົາ ​ບົດລາຍ​ງານ​ການຈັດຕັ້ງ​ປະຕິບັດແຜນ​ພັດທະນາ​ເສດຖະກິດ-ສັງຄົມ ແລະ ແຜນ​ງົບປະມານ ປະຈຳປີ 2017 ແລະ ທິດ​ທາງ 2018 ບົດ​ລາຍ​ງານ​ການ​ເຄື່ອນໄຫວ​ວຽກ​ງານ​ປະຈຳ​ປີ 2017 ແລະ ທິດ​ທາງ​ປີ 2018 ຂອງ​ອົງການ​ໄອ​ຍະ​ການ​ປະຊາຊົນ ແລະ ສານ​ປະຊາຊົນ ບົດ​ລາຍ​ງານການຈັດຕັ້ງ​ປະຕິບັດ​ວຽກ​ງານ ປີ 2017 ແລະ ທິດ​ທາງ 2018 ຂອງສະພາ​ປະຊາຊົນ ນວ ແຜນ​ວຽກຈຸດ​ສຸມ​ປີ​ທ່ອງ​ທ່ຽວ​ລາວ ປີ 2018 ຂອງ ນວ ບົດ​ລາຍ​ງານ​ການ​ຈັດຕັ້ງ​ປະຕິບັດ​ວຽກ​ງານ ​ປກຊ-​ປກສ ປະຈຳ​ປີ 2017 ແລະ ທິດ​ທາງ​ປີ 2018 ແລະ ພິຈາລະນາ​ຮັບຮອງເອົາ​ການ​ສະເໜີ​ແຕ່ງຕັ້ງ​ ຫົວໜ້າພະ​ແນກ​ຊັບພະຍາກອນ​ທຳ​ມະຊາດ ແລະ ສິ່ງແວດລ້ອມ ແລະ ຫົວໜ້າ​ພະ​ແນກ​ວິທະຍາສາດ ເຕັກ​ໂນ​ໂລ​ຊີ ນວ ຜູ້​ໃໝ່ ພ້ອມ​ນີ້ ກອງ​ປະຊຸມ​ຍັງ​ໄດ້​ຮັບ​ຟັງ​ລາຍງານ​ກ່ຽວ​ກັບ​ຜົນ​ການ​ກວດ​ສອບ ສະຫຼຸບ​ຂາດ​ຕົວ​ການຈັດຕັ້ງ​ປະຕິບັດ​ແຜນ​ງົບປະມານ ສົກ​ປີ 2015-2016 ແລະ ບົດ​ລາຍ​ງານ​ການເຄື່ອນ​ໄຫວ​ປະຈຳ​ປີ 2017 ແລະ 2018 ຂອງ​ອົງການ​ກວດ​ສອບແຫ່ງ​ລັດ​ປະຈຳ​ພາກ​ກາງ​ຕື່ມ​ອີກ.

ຂ່າວ: ນສພ ວຽງຈັນໃຫ່ມ

Be the first to comment

Leave a Reply

Your email address will not be published.


*