ພຽງ​​ເດືອນ​ດຽວທົ່ວ​ປະ​ເທດ​ມີ​ຜູ້​ເສຍ​ຊີວິດ​ຈາກ​ອຸປະຕິ​ເຫດຫລາຍ​ກວ່າ 100 ​ຄົນ

​ກົມ​ຕຳຫລວດ​ຈະລາຈອນ ​ໃຫ້​ຮູ້​ວ່າ: ​ພຽງ​​ໄລຍະ​ເດືອນມັງກອນນີ້, ທົ່ວ​ປະ​ເທດ​ມີ​ອຸປະຕິ​ເຫດ​ເກີດ​ຂຶ້ນ 595 ກໍລະນີ, ສົ່ງ​ຜົນ​ເຮັດ​ໃຫ້​ມີ​ຜູ້​ເສຍ​ຊີວິດກວ່າ 100 ຄົນ, ສະ​ເລ່ຍມື້ໜຶ່ງຈະ​ມີ​ຜູ້​ເສຍ​ຊີວິດບໍ່ຫລຸດ 3 ຄົນ ​ແລະ ມີມູນ​ຄ່າ​ເສຍ​ຫາຍຫລາຍ​ສິບ​ຕື້ກີບ, ​ແຂວງ​ທີ່​ເກີດ​ອຸປະຕິ​ເຫດ​ຫລາຍ​ກວ່າ​ຫມູ່​ແມ່ນນະຄອນຫລວງ​ວຽງຈັນ​ເກີດ​ຂຶ້ນ 113 ກໍລະນີມີ​ຜູ້​ເສຍ​ຊີວິດ 20 ຄົນ, ​ສະຫວັນ​ນະ​ເຂດມີ 85 ກໍລະນີມີ​ຜູ້​ເສຍ​ຊີວິດ 10 ຄົນ,​ ຈຳປາ​ສັກ 80 ກໍລະນີມີ​ຜູ້​ເສຍ​ຊີວິດ​ 11 ຄົນ ​ແລະ ​ແຂວງວຽງຈັນ 52 ກໍລະນີມີ​ຜູ້​ເສຍ​ຊີວິດ 8 ຄົນ, ສາ​ເຫດສ່ວນ​ໃຫຍ່​​ທີ່​ພາ​ໃຫ້​ເກີດ​ອຸປະຕິ​ເຫດແມ່ນ​ດື່ມ​ສິ່ງ​ມຶນ​ເມົາ​ແລ້ວ​ຂັບ​ລົດ​ໄວ

ອາເມລິກາໂວຍ ເຄື່ອງບິນຮົບຣັດເຊຍ ບິນສຽດໃກ້ເຄື່ອງບິນສອດແນມຂອງສະຫະລັດ ໃນໄລຍະຫ່າງກັນພຽງ 1 ແມັດເຄິ່ງ ຂະນະບິນຢູ່ເໜືອທະເລດຳ…

ສຳນັກຂ່າວຕ່າງປະເທດລາຍງານວ່າກອງທັບເຮືອສະຫະລັດ ອອກມາສະແດງຄວາມບໍ່ພໍໃຈຫຼັງເກີດກໍລະນີ ເຄື່ອງບິນຮົບ ‘ຊູ-27’ ຂອງຣັດເຊຍ ບິນຕິດຕາມເຄື່ອງບິນສອດແນມ ‘ອີພີ-3’ ຂອງສະຫະລັດ ຫຼາຍກວ່າ 2 ຊົ່ວໂມງ ກ່ອນຈະບິນສຽດຜ່ານໃນໄລຍະປະສິດຫ່າງພຽງ 1.5 ແມັດ ລະຫວ່າງທີ່ເຄື່ອງບິນທັງ 2 ລຳກຳລັງປະຕິບັດການຢູ່ໃນນານຟ້າສາກົນເໜືອທະເລດຳ “ເຄື່ອງບິນເຈັດຣັດເຊຍຂ້າມເຂົ້າມາໃນເສັ້ນທາງການບິນຂອງເຄື່ອງບິນສອດແນມຂອງສະຫະລັດໂດຍກົງ”

ຖະແຫຼ່ງການຂອງກອງທັບເຮືອສະຫະລັດ ລະບຸ “ຣັດເຊຍມີສິດທິປະຕິບັດການໃນນານຟ້າສາກົນ ແຕ່ພວກເຂົາຕ້ອງປະພຶດຕົນພາຍໃຕ້ມາດຕະຖານລະຫວ່າງປະເທດ ເພື່ອຮັບປະກັນຄວາມປອດໄພແລະປ້ອງກັນອຸບັດຕິເຫດ”

ຢ່າງໃດກໍ່ຕາມ ກະຊວງປ້ອງກັນປະເທດຣັດເຊຍອອກມາຢືນຍັນວ່າ ການກະທຳຂອງພວກເຂົາສອດຄ່ອງກັບກົດໜາຍລະຫວ່າງປະເທດວ່າດ້ວຍການໃຊ້ນ່ານຟ້າ ບໍ່ມີຄຳວ່າບໍ່ໄດ້ມາດຕະຖານໃນໜູ່ນັກບິນຣັດເຊຍ ແລະການກະທຳຂອງພວກເຂົາກໍ່ເກີດຂື້ນເພື່ອຢຸດເຄື່ອງບິນສະຫະລັດ ຈາກການລຸກລ້ຳນານຟ້າຂອງສະຫະພັນຣັດເຊຍ ທັງນີ້ ຣັດເຊຍກັບພັນທະມິດນາໂຕ້ໃຊ້ງານນານຟ້າຮ່ວມກັນ ແຕ່ຄວາມຕຶ່ງຄຽດລະຫວ່າງທັງ 2 ຝ່າຍເພີ່ມສູງຂື້ນ ຫຼັງຣັດເຊຍຄວບຄຸມດິນແດນໄຄຣເມຍຂອງຢູເຄນເຂົາເປັນສ່ວນໜື່ງຂອງໂຕເອງໃນປີ 2013.

ທີ່ມາ: bbc

ງານບຸນນະມັດສະການພຣະທາດສີໂຄດຕະບອງ ສຳເລັດລົງດ້ວຍບັນຍາກາດຄຶກຄື້ນ

ວັນທີ 31 ມັງກອນ ເຊິ່ງເປັນມື້ພິທີໃສ່ບາດຖວາຍສັງກະທານ ເຊິ່ງມີການນຳຂອງແຂວງໂດຍທ່ານ ໂອໄດ ສຸດາພອນ ເຈົ້າແຂວງໆຄຳມ່ວນ, ມີບັນດາຄະນະນຳຂັ້ນແຂວງ, ຂັ້ນເມືອງ, ພະແນກການ, ອົງການຈັດຕັ້ງຕ່າງໆ ຕະຫຼອດ ເຖິງຊາວພຸດທະສາສະນິກະຊົນທັງພາຍໃນ ແລະ ຕ່າງປະເທດ ເວົ້າສະເພາະຄືຊາວແຂວງຄຳມ່ວນ ໄດ້ຮ່ວມໃສ່ບາດ ດ້ວຍຈິດໃຈໃສສັດທາ ແລະ ເບີກບານມ່ວນຊື່ນ.

ສ່ວນກິດຈະກຳພາຍໃນງານ ປະກອບມີການສະແດງສີລະປະວັນນະຄະດີທີ່ເປັນເອກະລັກຂອງທ້ອງຖິ່ນ, ການຈັດສະແດງເຮືອນຊົງລາວ, ການວາງສະແດງ ແລະ ຈຳໜ່າຍສິນຄ້າ ຈາກພາຍໃນ ແລະ ຕ່າງປະເທດ, ການເຂົ້າສັກກະລະບູຊາພຣະທາດສີໂຄດຕະບອງ, ພິທີກຳທາງປະເພນີ ແລະ ສາສະໜາ, ພິທີໃສ່ບາດພະຍາສີໂຄດ, ພິທີແຫ່ຜາສາດເຜິ້ງ, ພິທີໃສ່ບາດບຸນພະທາດສີໂຄດຕະບອງ ແລະ ແຫ່ທຽນໃນຕອນຄ່ຳ.

ພິເສດງານບຸນພຣະທາດສີໂຄດຕະບອງປີນີ້ໄດ້ມີພິທີການຕ້ອນຮັບຄະນະກອງບຸນຜ້າປ່າສາມັກຄີ ທີ່ເດີນທາງ ມາຈາກປະເທດອັງກິດ ໂດຍການເປັນ ເຈົ້າພາບເຈົ້າສັດທາຂອງທ່ານ ໄຊຍະການ ສີສຸວົງ ເອກອັກຄະລັດຖະທູດລາວ ປະຈຳປະເທດອັງກິດ ເຮັດໃຫ້ງານບຸນພຣະທາດສີໂຄດຕອງບອງມີຫຼາກຫຼາຍສີສັນ ແລະ ກາຍເປັນປະເພນີອັນດີງາມຂອງຊາດ ທີ່ໄດ້ປະຕິບັດສືບຕໍ່ກັນມາ ແຕ່ດົນນານ ເພື່ອເຕົ້າໂຮມຄວາມສາມັກຄີຂອງປວງຊົນລາວທັງຊາດ ກໍ່ຄືຊາວແຂວງຄຳມ່ວນ.

ຂ່າວ: ແຂວງຄຳມ່ວນ

ເມືອງບໍ່ແຕນເປີດປີທ່ອງທ່ຽວລາວແລະບຸນປັ້ນເຂົ້າຈີ່ໃຫຍ່

ເມືອງ ບໍ່ແຕນ ແຂວງໄຊຍະບູລີ ໄດ້ຈັດພິທີເປີດປີທ່ອງທ່ຽວ ລາວ 2018 ແລະ ງານເທດສະ ການບຸນປັ້ນເຂົ້າຈີ່ໃຫຍ່ຂຶ້ນໃນວັນທີ 30ມັງກອນນີ້ ທີ່ເມືອງດັ່ງກ່າວ ໂດຍໃຫ້ກຽດເຂົ້າຮ່ວມ ແລະ ລັ່ນຄ້ອງ 9 ບາດເປີດງານຂອງ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູ ລີ, ມີທ່ານ ບຸນເສນ ຈັນທະຜອງ ເຈົ້າເມືອງ ບໍ່ແຕນ,ມີບັນດາຜູ້ຕາງໜ້າ ຈາກແຂວງ, ແຂກ ພາຍໃນ ແລະ ຕ່າງປະເທດ ພ້ອມດ້ວຍພໍ່ແມ່ປະຊາ ຊົນເຂົ້າ ຮ່ວມຢ່າງເປັນຂະບວນຟົດຟື້ນ.


ໃນໂອກາດນີ້, ທ່ານ ວັນດາວ ແວວທະນັດສີ ຮອງເຈົ້າ ເມືອງໆ ບໍ່ແຕນໄດ້ລາຍງານ ການຫ້າງຫາກະກຽມຄວາມພ້ອມດ້ານຕ່າງໆ ເພື່ອ ການຈັດງານເທດສະການບຸນປັ້ນເຂົ້າຈີ່ໃຫຍ່ ແລະ ຕ້ອນຮັບປີທ່ອງທ່ຽວລາວ 2018 ຂອງແຂວງໄຊຍະບູລີ ເຊິ່ງໄດ້ກ່າວວ່າ: ໂດຍສືບທອດມູນເຊື້ອວັດທະນະທຳ, ຮີດ 12 ຄອງ 14 ທີ່ເຄີຍປະຕິ ບັດກັນມາ ເມື່ອຮອດມື້ຂຶ້ນ 15 ຄ່ຳເດືອນ 3 ຈະມີບຸນປັ້ນເຂົ້າຈີ່ ເຊິ່ງເມືອງບໍ່ແຕນ ໄດ້ກຳນົດເປັນເທດ ສະການບຸນໃຫຍ່ປະຈຳປີຂອງເມືອງ ແລະ ໃນແຕ່ລະປີ ກໍ່ໄດ້ກຳນົດເຂົ້າໃນໂຄງການດຳເນີນງານຂອງຄະນະບໍລິຫານງານພັກເມືອງ ແລະ ແຜນພັດທະນາເສດຖະກິດ-ສັງຄົມ,

ການຈັດງານປີທ່ອງທ່ຽວລາວ ຢູ່ເມືອງບໍ່ແຕນ, ຄະນະຮັບຜິດຊອບ ກໍ່ໄດ້ສ້າງແຜນເຄື່ອນໄຫວເປັນແຕ່ລະໄລຍະ ໂດຍໄດ້ຈັດຕັ້ງເຊື່ອມຊືມ ແລະ ມອບໜ້າທີ່ຄວາມຮັບຜິດຊອບໃຫ້ແຕ່ລະອານຸກຳມະການ ໃນການຈັດຕັ້ງປະຕິບັດວຽກງານຕົວຈິງຂອງແຕ່ລະພາກສ່ວນລະອຽດຈະແຈ້ງ, ງານເທດສະການບຸນປັ້ນເຂົ້າຈີ່ໃຫຍ່ ປະຈຳປີ 2018 ແມ່ນກຳນົດຈັດຂຶ້ນ ລະຫວ່າງວັນທີ 29-31 ມັງກອນ 2018 ກົງກັບມື້ຂຶ້ນ 13-15 ຄ່ຳ ເດືອນ 3 ພສ 2560 ແຕ່ການເຄື່ອນໄຫວກິດຈະກຳ ເລີ່ມແຕ່ວັນທີ 26 ມັງກອນ 2018 ເປັນຕົ້ນມາ,

ບັນດາກິດຈະກຳຕ່າງໆພາຍໃນງານປະກອບມີດັ່ງນີ້:ມີຈຳລອງເຈດີປັ້ນເຂົ້າຈີ່ໃຫຍ່,ກາງຄືນມີການສະແດງສິນລະປະວັນນະຄະດີ, ຮ້ອງເພງແລະປະກວດນາງສາວທິດາປັ້ນເຂົ້າຈີ່ໃຫຍ່,ການແຫ່ນາງທິດາປັ້ນເຂົ້າຈີ່ຕິດພັນກັບຂະບວນແຫ່ຂອງແຕ່ລະພາກສ່ວນລວມມີ 13 ຂະບວນ, ມີການສະແດງຟ້ອນປີທ່ອງທ່ຽວລາວຂອງນັກຮຽນມັດທະຍົມຕອນປາຍ, ມີການສະແດງມວຍລາຍລາວ, ເຕັ້ນແອໂຣບິດ ຂອງນ້ອງນັກຮຽນ ແລະ ແຂ່ງຂັນກິລາຂອງພາກສ່ວນຕ່າງໆ, ປະກວດອາຫານພື້ນເມືອງ,

ປະກວດການປະດັບປະດາຕົບແຕ່ງຂະບວນກ້ອນກຳລັງແຕ່ລະພາກ ສ່ວນ, ມີການວາງສະແດງຮູບພາບ, ການວາງສະແດງສິນຄ້າໂອດອບຂອງເມືອງ, ສິນຄ້າກະສິກຳ, ຫັດຖະກຳ, ເຄື່ອງເຟີນີເຈີທີ່ເປັນເອກະລັກຂອງທ້ອງຖິ່ນຈຳນວນ 15 ຮ້ານ, ມີຮ້ານຂາຍເຄື່ອງເສື້ອຜ້າ ແລະ ເຄື່ອງ ອື່ນໆ ຈຳນວນ 15 ຮ້ານ, ມີອາຫານພື້ນບ້ານຈາກສະຫະພັນແມ່ຍິງບ້ານ, ສຳນັກງານ, ກົມກອງມາວາງ ສະແດງ ເພື່ອຊິມ ແລະ ຈຳໜ່າຍ.


ຂ່າວ: ແຂວງໄຊຍະບູລີ

ເມືອງໄຊສະຖານແຂວງໄຊຍະບູລີຈັດພິທີຮັບຮອງເອົາບ້ານວັດທະນະທໍາຈໍານວນ2ບ້ານ ( ສະແມດນ້ອຍ – ສະແມດໃຫຍ່ )

ເມືອງໄຊສະຖານ ແຂວງໄຊຍະບູລີ ໄດ້ຈັດພິທີຮັບຮອງເອົາບ້ານວັດທະນະທໍາ 2 ບ້ານ ( ບ້ານສະແມດນ້ອຍ – ບ້ານສະແມດໃຫຍ່ ) ຂື້ນຢ່າງເປັນທາງການ ໃນຕອນເຊົ້າຂອງວັນທີ່ 29 ເດືອນມັງກອນ ປີ 2018 ນີ້ ຢູ່ທີ່ຫ້ອງປະຊຸມຂອງບ້ານສະແມດໃຫຍ່ ໂດຍການເຂົ້າຮ່ວມເປັນກຽດຂອງທ່ານ ກອງສີ ວົງສີ ເຈົ້າເມືອງເມືອງໄຊສະຖານ ມີທ່ານຈັນທີສີມະນີຈັນ ຫົວໜ້າພະແນກຖະແຫຼງຂ່າວ, ວັດທະນະທໍາແລະ ທ່ອງທ່ຽວ ແຂວງໄຊຍະບູລີ, ມີຫົວໜ້າ, ຮອງຫົວໜ້າຫ້ອງການອົງການ, ກົມກອງ ພະນັກງານ,ອໍານາດການປົກຄອງບ້ານ, ພໍ່ແມ່ປະຊາຊົນ, ພ້ອມດ້ວຍຊາວໜຸ່ມເຍົາວະຊົນ – ອານຸຊົນ 2 ບ້ານເຂົ້າຮ່ວມຢ່າງພ້ອມພຽງ.
ພິທີທີ່ມີຄວາມໝາຍຄວາມສໍາຄັນໃນຄັ້ງນີ້ ຜູ້ເຂົ້າຮ່ວມແມ່ນໄດ້ຮັບຊົມ ການສະແດງສີລະປະຂອງນ້ອງນ້ອຍນັກຮຽນຈາກໂຮງຮຽນປະຖົມ ແລະ ມັດທະຍົມຈາກບ້ານສະແມດໃຫຍ່ ຈາກນັ້ນຜູ້ເຂົ້າຮ່ວມແມ່ນໄດ້ຮັບຟັງຂໍຕົກລົງຂອງທ່ານເຈົ້າແຂວງວ່າດ້ວຍການອານຸມັດຮັບຮອງເອົາບ້ານວັດທະນະທໍາ ແລະ ບ້ານປ້ອງກັນຄວາມສະຫງົບດີ, ຮັບຟັງການຜ່ານບົດລາຍງານການສ້າງຄົນ, ຄອບຄົວ ແລະ ບ້ານວັດທະນະທໍາ ພ້ອມມອບໃບຢັ້ງຢືນບ້ານວັດທະນະທໍາ ໃຫ້ບ້ານສະແມດນ້ອຍ ແລະ ບ້ານສະແມດໃຫຍ່ ເຊິ່ງໃຫ້ກຽດຂື້ນມອບໂດຍທ່ານ ກອງສີ ວົງສີ ເຈົ້າເມືອງ ເມືອງໄຊສະຖານ ແລະ ມອບໃບຢັ້ງຢືນບ້ານປ້ອງກັນຄວາມສະຫງົບດີ ໃຫ້ບ້ານສະແມດໃຫຍ່.


ພິທີໃນຄັ້ງນີ້ຍັງໄດ້ຮັບຟັງການໂອ້ລົມຂອງທ່ານກອງສີ ວົງສີ ເຈົ້າເມືອງເມືອງໄຊສະຖານ ເຊິ່ງກ່ອນອື່ນເພິ່ນໄດ້ຍ້ອງຍໍຊົມເຊີຍຕໍ່ຜົນງານທີ່ທາງບ້ານດັ່ງກ່າວສາມາດຍາດມາໄດ້ ແລະ ທ່ານຍັງໄດ້ໃຫ້ທິດຊີ້ນໍາໃນບາງດ້ານ ເປັນຕົ້ນແມ່ນເອົາໃຈໃສ່ມະຕິກອງປະຊຸມໃຫຍ່ຂອງອົງຄະນະພັກແຂວງໄຊຍະບູລີ ແລະ ກອງປະຊຸມໃຫຍ່ຄັ້ງທີ່ 1 ຂອງອົງຄະນະພັກເມືອງໄຊສະຖານໃຫ້ປະກົດຜົນເປັນຈິງ, ປະຕິບັດທິດນໍາການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ, ການລະເມີດຕໍ່ລະບຽບກົດໝາຍຂອງປະຊາຊົນຈໍານວນໜຶ່ງເປັນຕົ້ນແມ່ນການຖາງໄຮ່ປ່າແກ່, ຂີ່ລົດໄວ, ຂີ້ລັກງັດແງະ ແລະ ບັນຫາອື່ນໆຕື່ມອີກ.
ຕອນທ້າຍຂອງພິທີຍັງໄດ້ມີການລັ່ນຄ້ອງ 9 ບາດ, ຕັດແຖບຜ້າ, ເປີດປ້າຍວັດທະນະທໍາ ແລະ ເປີດປ້າຍບ້ານປ້ອງກັນຄວາມສະຫງົບດີ.

ຂ່າວ: ແຂວງໄຊຍະບູລີ

ເພງ : ຂໍດາວຄ່າດອງ

ເພງ : ຂໍດາວຄ່າດອງ
ສິນລະປິນ : ແມນ ມິ່ງເມືອງລາວ
ຄ້າຍເພງ : ທີເຄ ຊາວລາວ
ເນື້ອຮ້ອງ-ທຳນອງ: ອາຈານ ບຸນຍູ້ ລູກແມ່ຂອງ

ສະເໜີປັບປຸງລະດັບຄ່າແຮງງານຂັ້ນຕ່ຳ ບໍ່ໃຫ້ຫຼຸດ 1 ລ້ານກີບ

ອົງການ​ສາມ​ຝ່າຍ ຄື ກະຊວງແຮງ​ງານ ແລະ ສະຫວັດດີ​ການ-ສັງຄົມ (ຕາງໜ້າ​ລັດຖະບານ) ສູນ​ກາງ​ສະຫະພັນ​ກຳມະບານ (ຕາງໜ້າ​ຜູ້​ອອກແຮງ​ງານ) ແລະ ສະພາ​ການ​ຄ້າ ແລະ ອຸດ​ສາ​ຫະກຳ​ແຫ່ງ​ຊາດ​ລາວ (ຕາງໜ້າ​ຜູ້ໃຊ້​ແຮງ​ງານ) ໄດ້​ຈັດ​ກອງ​ປະຊຸມ 3 ຝ່າຍ​ລະດັບ​ຊາດ ເພື່ອ​ຄົ້ນຄວ້າປຶກສາ​ຫາລື​ກ່ຽວ​ກັບ​ການ​ປັບປຸງຄ່າ​ແຮງ​ງານ​ຕ່ຳ​ສຸດ ຂຶ້ນ​ວັນ​ທີ 26 ມັງກອນ 2018 ທີ່​ໂຮງແຮມຢູ່ສຸກ ນະຄອນຫຼວງ​ວຽງ​ຈັນ ເປັນປະທານ​ຮ່ວມ​ຂອງ​ທ່ານ ຄຳ​ແພງ ໄຊ​ສົມ​ແພງ ລັດຖະມົນຕີ​ກະຊວງແຮງ​ງານ ແລະ ສະ​ຫັວດ​ດີ​ການ-ສັງຄົມ ທ່ານ ສີ​ມູນ ອຸ່ນ​ລາສີ ຮອງ​ປະທານ​ສູນ​ກາງ​ສະຫະພັນກຳມະບານ​ລາວ ແລະ ທ່ານ ວັນທອງ ສິດທິ​ກຸນ ຮອງ​ປະທານ​ສະພາ​ການ​ຄ້າ ແລະ ອຸດສາຫະກຳແຫ່ງ​ຊາດ​ລາວ ມີ​ຜູ້ຕາງໜ້າ​ຈາກຂະແໜງການ​ກ່ຽວຂ້ອງ​ເຂົ້າຮ່ວມ.

ກອງ​ປະຊຸມ​ຄັ້ງ​ນີ້ ຖື​ວ່າ​ເປັນກອງ​ປະຊຸມ 3 ຝ່າຍ​ຄັ້ງ​ສຸດ​ທ້າຍ ເພື່ອ​ຄົ້ນຄວ້າ​ປຶກສາ​ຫາລື​ກ່ຽວກັບ​ການ​ປັບປຸງຄ່າ​ແຮງ​ງານ​ຕ່ຳສຸດ ເຊິ່ງ​ອົງການ 3 ຝ່າຍ​ມີ​ທັດສະນະແຕກ​ຕ່າງ​ກັນ ໃນ​ການ​ປັບປຸງ​ຄ່າແຮງ​ງານ​ຂັ້ນ​ຕ່ຳ ໃນ​ນັ້ນ ສູນ​ກາງສະຫະພັນ​ກຳມະບານ​ລາວ ​ໄດ້​ສະເໜີ​ຄ່າ​ແຮງ​ງານ​ຂັ້ນ​ຕ່ຳ​ສຸດ​ໃໝ່ແມ່ນ 1,2 ລ້ານ​ກີບ​ຕໍ່​ຄົນ​ຕໍ່​ເດືອນ ຫຼື ເພີ່ມ​ຂຶ້ນ​ຈາກ​ເດີມ 33,33% ທຽບໃສ່​ຄ່າ​ແຮງ​ງານ​ຂັ້ນ​ຕ່ຳ​ສຸດ​ປີ 2015 ສະພາ​ການ​ຄ້າ ແລະ ອຸດສາ​ຫະ​ກຳ​ແຫ່ງ​ຊາດ​ລາວ ສະເໜີປັບ​ຂຶ້ນ​ຄ່າ​ແຮງ​ຂັ້ນ​ຕ່ຳ​ໃຫ້​ຢູ່​ໃນ​ລະດັບບໍ່​ເກີນ 1 ລ້ານ​ກີບ​ຕໍ່​ຄົນ​ຕໍ່ເດືອນ ຫຼື ເພີ່ມ​ຂຶ້ນ 11,11% ທຽບໃສ່​ປີ 2015 ກະຊວງ​ແຮງ​ງານ ແລະ ສະຫວັດດີ​ການ-ສັງຄົມ ສະເໜີ​ປັບ​ຂຶ້ນ​ຄ່າ​ແຮງ​ງານ​ຂັ້ນ​ຕ່ຳສຸດ​ໃນ​ລະດັບ 1,1 ລ້ານ​ກີບ​ຕໍ່​ຄົນຕໍ່​ເດືອນ ເພີ່ມ​ຂຶ້ນ 22,22% ເຊິ່ງຜົນ​ຂອງ​ກອງ​ປະຊຸມ​ຄັ້ງ​ນີ້ ກະຊວງ​ແຮງ​ງານ ແລະ ສະຫວັດດີການ-ສັງຄົມ ຈະ​ໄດ້​ນຳ​ສະເໜີ​ຕໍ່​ລັດຖະບານ​ເພື່ອ​ພິຈາລະນາ ໃນ​ການ​ຈະ​ກຳນົດ​ເອົາ​ຕົວ​ເລກຄ່າ​ແຮງ​ງານ​ຂັ້ນ​ຕ່ຳ​ສຸດ ​ທີ່​ຈະ​ປັບປຸງ​ໃໝ່​ນີ້​ເພື່ອ​ອະນຸມັດ​ພິຈາລະນານຳ​ໃຊ້​ໃນ​ຂັ້ນ​ຕໍ່​ໄປ.

ອົງການ​ສາມ​ຝ່າຍ​ໄດ້​ດຳເນີນການ​ຄົ້ນຄວ້າ ປັບປຸງ​ຄ່າ​ແຮງງານ​ຂັ້ນ​ຕ່ຳ​ສຸດ​ຢູ່​ລາວ​ມາ​ແລ້ວ 7 ຄັ້ງ ຄື: ຄັ້ງ​ທີ 1 ປີ 1991 (26.000 ກີບ​ຕໍ່​ຄົນ​ຕໍ່​ເດືອນ) ຄັ້ງ​ທີ 2 ປີ 1997 (36.400 ກີບ​ຕໍ່​ຄົນ​ຕໍ່ເດືອນ) ຄັ້ງ​ທີ 3 ປີ 2000 (93.600 ກີບ​ຕໍ່​ຄົນ​ຕໍ່​ເດືອນ) ຄັ້ງທີ 4 ປີ 2005 (290.000 ກີບ​ຕໍ່ຄົນ​ຕໍ່​ເດືອນ) ຄັ້ງ​ທີ 5 ປີ 2009 (348.000 ກີບ​ຕໍ່​ຄົນ​ຕໍ່​ເດືອນ) ຄັ້ງ​ທີ 6 ປີ 2011 (626.000 ກີບຕໍ່​ຄົນ​ຕໍ່​ເດືອນ) ແລະ ຄັ້ງ​ທີ 7 ປີ 2015 (900.000 ກີບ​ຕໍ່​ຄົນ​ຕໍ່ເດືອນ).

ຂ່າວ: ນສພ ວຽງຈັນໃຫ່ມ

ສະມາຄົມມິດຕະພາບຫວຽດນາມ – ລາວ ສະເຫຼີມສະຫຼອງ ຕ້ອນຮັບປີໃໝ່

ສະມາຄົມມິດຕະພາບ ຫວຽດນາມ – ລາວ ທີ່ນະຄອນ ຫຼວງວຽງຈັນ ໄດ້ຈັດພິທີສະ ເຫຼີມສະຫຼອງສົ່ງທ້າຍປີເກົ່າ ແລະ ຕ້ອນຮັບປີໃໝ່ຂຶ້ນໃນວັນ ທີ 28 ມັງກອນນີ້ທີ່ສູນການຄ້າ ອາຊຽນມໍ ນະຄອນຫຼວງວຽງ ຈັນ, ເປັນກຽດເຂົ້າຮ່ວມພິທີມີ ທ່ານ ໄຊສົມພອນ ພົມວິຫານ ກຳມະການກົມການເມືອງສູນ ກາງພັກ ປະທານສູນກາງແນວ ລາວສ້າງຊາດ, ທ່ານ ລຽນ ທີ ແກ້ວ ກຳມະການສູນກາງພັກ ລັດຖະມົນຕີ ກະຊວງກະສິກຳ-ປ່າໄມ້, ທ່ານ ຫວຽດບ່າຮຸ່ງ ເອກ ອັກຄະລັດຖະທູດວິສາມັນຜູ້ມີ ອຳນາດເຕັມ ແຫ່ງ ສສ ຫວຽດ ນາມ ປະຈຳລາວ ພ້ອມດ້ວຍ ບັນດາແຂກທີ່ຖືກເຊີນ. ໃນພິທີ, ທ່ານ ວິໄຊ ນະ ວຽງຈັນ ປະທານສະມາຄົມມິດຕະພາບຫວຽດນາມ-ລາວ ໄດ້ຂຶ້ນມີຄຳເຫັນ ຊຶ່ງທ່ານໄດ້ ກ່າວເຖິງຜົນງານການເຄື່ອນ ໄຫວຂອງສະມາຄົມຕະຫຼອດ ໄລຍະທີ່ຜ່ານມາ ມີທັງດ້ານດີ ແລະ ດ້ານຕັ້ງໜ້າ ເປັນຕົ້ນແມ່ນ ໄດ້ປະກອບສ່ວນເຂົ້າໃນການ ສ້າງສາພັດທະນາເສດຖະກິດ – ສັງຄົມຂອງປະເທດ, ເສີມ ຂະຫຍາຍມູນເຊື້ອວັດທະນະ ທຳອັນດີງາມຂອງສອງຊາດ ຫວຽດນາມ – ລາວ, ລາວ-ຫວຽດນາມໃຫ້ຄົງຢູ່ຕະຫຼອດ ກາລະນານ, ມີຄວາມຮັກແພງ ສາມັກຄີ, ຊ່ວຍເຫຼືອຊຶ່ງກັນ ແລະ ກັນ, ພິເສດແມ່ນໄດ້ສຳ ເລັດການສະເຫຼີມສະຫຼອງປີ ແຫ່ງຄວາມສາມັກຄີພິເສດ ຫວຽດນາມ-ລາວ, ລາວ-ຫວຽດ ນາມ, ໄດ້ຊ່ວຍເຫຼືອຜູ້ທີ່ໄດ້ຮັບ ຜົນກະທົບຈາກໄພພິບັດທາງ ທຳມະຊາດ ແລະ ວຽກງານ ອື່ນໆ, ຈາກນັ້ນ ທ່ານຍັງໄດ້ ຕາງໜ້າໃຫ້ຄະນະສະມາຄົມ ມິດຕະພາບຫວຽດນາມ – ລາວ ອວຍພອນການນຳພັກ – ລັດ ແລະ ປະຊາຊົນຊາວລາວ, ພີ່ ນ້ອງຊາວຫວຽດນາມ ທີ່ດຳລົງ ຊີວິດຢູ່ໃນດິນແດນປະເທດລາວ ຈົ່ງມີຄວາມຜາສຸກໂຊກດີ ແລະ ປະສົບຜົນສຳເລັດໃນໜ້າທີ່ ການງານ. ທ່ານ ວິໄລວົງ ບຸດດາຄຳ ປະທານສະມາຄົມມິດຕະພາບ ລາວ-ຫວຽດນາມ ໄດ້ກ່າວວ່າ: ລາວ-ຫວຽດນາມ ເຄີຍມີມູນ ເຊື້ອອັນດີງາມແຫ່ງຄວາມສາ ມັກຄີແບບພິເສດມາແຕ່ຍາວ ນານ, ມີແມ່ນ້ຳລຳເຊຕິດຈອດ ກັນແຕ່ເໜືອຕະຫຼອດໃຕ້, ໄດ້ ປະກອບສ່ວນເຂົ້າໃນການປົດ ປ່ອຍປະເທດຊາດໃນເມື່ອ ກ່ອນ ປະຕິບັດສອງໜ້າທີ່ຍຸດ ທະສາດ ປົກປັກຮັກສາປະເທດ ຊາດ ແລະ ສ້າງສາປະເທດ ຊາດ. ໃນໂອກາດທີ່ມີຄວາມ ໝາຍນີ້ ຂໍໃຫ້ບັນດາສະຫາຍ ຈົ່ງສືບຕໍ່ສົ່ງເສີມຊຸກຍູ້ ແລະ ຮັກສາຮີດຄອງປະເພນີໃຫ້ລູກ ຫຼານສືບທອດຕະຫຼອດໄປ ຂໍ ອວຍພອນໃຫ້ປະທານສູນກາງ ແນວລາວສ້າງຊາດ, ທ່ານທູດ, ທ່ານຍິງ-ທ່ານຊາຍ ຈົ່ງມີສຸຂະ ພາບເຂັ້ມແຂງ ແລະ ສືບຕໍ່ທຸ ລະກິດຂອງທ່ານຕະຫຼອດໄປ. (ຂ່າວ: ແສງຈັນ)

ເຈົ້າຄອງ ລົງຕິດຕາມສະພາບໄຟໄໝ້ ເຮືອນພະນັກງານຄູຕຳຫຼວດ

ວັນ​ທີ 29 ມັງກອນ 2018 ທ່ານ ສິນ​ລະ​ວົງ ຄຸດ​ໄພທູນ ເຈົ້າຄອງ​ນະຄອນຫຼວງ​ວຽງ​ຈັນ ພ້ອມດ້ວຍ​ຄະນະ ໄດ້​ລົງ​ຕິດຕາມ​ກວດກາ ແລະ ໃຫ້​ກຳລັງ​ໃຈ​ແກ່​ຄອບຄົວ​ພະນັກງານ​ນາຍ-ພົນ​ຕຳຫຼວດ ທີ່​ຖືກ​ຜົນ​ກະທົບ​ຈາກ​ເຫດການ​ໄຟໄໝ້​ຫໍ​ພັກ​ພະນັກງານ​ຄູ​ ຂອງ​ວິ​ທະຍາ​ຄານ​ຕຳຫຼວດ​ປະຊາຊົນ ບ້ານດອນ​ຕີ້ວ ເມືອງ​ໄຊ​ທານີ ຄອນຫຼວງ​ວຽງ​ຈັນ ໂດຍ​ໃຫ້ການ​ຕ້ອນຮັບ​ຂອງ​ທ່ານພົນ​ຈັດຕະວາ ບຸນ​ຊູ ນາມ​ມະ​ຈັກ ຜູ້​ອຳນວຍການ​ວິທະຍາຄານ​ຕຳຫຼວດປະຊາ​ຊົນ.

ໂອກາດ​ນີ້ ທ່ານ​ເຈົ້າ​ຄອງ​ໄດ້ຮັບ​ຟັງ​ການ​ລາຍ​ງານ​ສະພາບການ ແລະ ເຫດການ​ຈາກ​ພາກສ່ວນ​ທີ່​ກ່ຽວຂ້ອງ​ໃຫ້​ຮູ້​ວ່າ: ເວລາປະມານ 17 ໂມງຂອງ​ວັນ​ທີ 27 ມັງກອນ 2018 ຜ່ານ​ມາ ໄດ້​ເກີດເຫດ​ໄຟ​ໄໝ້​ຫໍ​ພັກ​ພະນັກງານ​ຄູ​ຢູ່ບ້ານ​ດອນ​ຕີ້ວ ເມືອງ​ໄຊ​ທານີ ນະຄອນ​ຫຼວງ​ວຽງ​ຈັນ ເຊິ່ງ​ເປັນເຮືອນ​ລວມ​ຂອງ​ພະນັກງານ ມີລັກສະນະ​ເປັນ​ຫ້ອງ​ແຖວ​ຊັ້ນ​ດຽວ ແອ້ມ​ດ້ວຍ​ແປ້ນ ເພດານ​ອັດ ມຸງດ້ວຍ​ສັງກະສີ ມີ 3 ຫຼັງ 15 ຫ້ອງ ແລະ ມີ​ຄອບຄົວ​ພະນັກງານ​ອາໄສ​ຢູ່ທັງ​ໝົດ 15 ຄອບຄົວ ໄດ້​ຮັບຄວາມ​ເສຍ​ຫາຍ​ໝົດ​ທັງ​ຫຼັງ ໂດຍເຈົ້າ​ໜ້າທີ່​ໄດ້​ນຳ​ໃຊ້​ລົດ​ມອດ​ໄຟ 6 ຄັນ ແລະ ໃຊ້ເວລາ​ຫຼາຍ​ກວ່າ 3 ຊົ່ວໂມງ ຈຶ່ງ​ສາມາດ​ສະກັດ​ກັ້ນບໍ່​ໃຫ້​ລຸກ​ໄໝ້​ຂະຫຍາຍ​ເປັນ​ວົງກວ້າງ ໂດຍ​ສາເຫດ​ຂອງ​ການເກີດ​ອັກຄີ​ໄພ​ດັ່ງກ່າວ ​ເຈົ້າ​ໜ້າທີ່ພວມ​ເລັ່ງ​ສືບສວນ ຄາດ​ມູນ​ຄ່າຄວາມ​ເສຍ​ຫາຍ ປະມານ 688 ລ້ານ​ກີບ.

ພ້ອມ​ນີ້ ທ່ານ​ເຈົ້າ​ຄອງ​ກໍ່​ໄດ້ສະແດງ​ຄວາມ​ເປັນ​ຫວ່ງ​ເປັນ​ໃຍ ແລະ ຮຽກຮ້ອງ​ໃຫ້​ພາກສ່ວນກ່ຽວຂ້ອງ ​ເລັ່ງ​ໃຫ້ການ​ຊ່ວຍເຫຼືອຟື້ນ​ຟູ​ຕໍ່​ຄອບຄົວ​ທີ່​ຖືກ​ຜົນ​ກະທົບ ໂດຍ​ສະເພາະແມ່ນ 4 ຄອບຄົວ ທີ່​ຍັງ​ຂາດ​ທີ່ຢູ່​ອາໄສ​ຊົ່ວຄາວ ເພື່ອເຮັດ​ໃຫ້​ເຂົາເຈົ້າ​ມີ​ຊີວິດ​ການ​ເປັນຢູ່​ດີ ແລະ ເນັ້ນ​ໃຫ້​ເພີ່ມ​ທະວີ ຄວາມ​ເອົາໃຈໃສ່​ໃນ​ການ​ສະກັດກັ້ນ ແລະ ປ້ອງ​ກັນ​ອັກຄີ​ໄພ​ຢ່າງ ເຂັ້ມ​ງວດ ເປັນຕົ້ນ ການ​ຕິດຕາມກວດກາ​ລະບົບ​ໄຟຟ້າ​ພາຍ​ໃນເຂດ​ຕ່າງໆ​ໃຫ້​ປົກກະຕິ ເພາະ​ໄລຍະ​ນີ້ເປັນ​ໄລຍະ​ແລ້ງ ເຊິ່ງ​ອາດ​ມີຄວາມ​ສ່ຽງ​ເຮັດ​ໃຫ້​ເກີດ​ອັກຄີ​ໄພໄດ້ ນອກ​ນັ້ນ ທ່ານ​ເຈົ້າ​ຄອງ​ຍັງໄດ້​ຕາງໜ້າ​ໃຫ້​ອົງການ​ປົກຄອງນະຄອນຫຼວງ ມອບ​ເງິນ​ຈຳນວນ 20 ລ້ານ​ກີບ ໃຫ້​ແກ່​ວິທະຍາຄານ​ຕຳຫຼວດ​ປະຊາຊົນ ເພື່ອ​ນຳໄປ​ຊ່ວຍເຫຼືອ​ແກ່​ຄອບຄົວ​ຖືກ​ຜົນກະທົບ​ຕື່ມ​ອີກ. ຂ່າວ: ນສພ ວຽງຈັນໃຫ່ມ

ຮ່ວມມືແລກປ່ຽນພັດທະນາການສຶກສາ

ພິທີ​ເຊັນ​ບົດ​ບັນທຶກ​ຄວາມ​ເຂົ້າໃຈ​ ລະຫວ່າງ​ມະຫາວິທະຍາໄລແຫ່ງ​ຊາດ​ລາວ ແລະ ມະຫາ​ວິທະ​ຍາ​ໄລ​ແຫ່ງ​ຊາດ ນະຄອນ​ໂຮ່ຈີ​ມິງ ​ສສ ຫວຽດນາມ ມີ​ຂຶ້ນ​ວັນທີ 26 ມັງກອນ 2018 ທີ່​ໂຮງແຮມ​ເມືອງ​ແທງ ນະຄອນຫຼວງວຽງ​ຈັນ ຮ່ວມ​ລົງ​ນາມ​ໂດຍ​ທ່ານ ສົມ​ສີ ຍໍ​ພັນ​ໄຊ ຮັກສາ​ການ​ອະທິ​ບໍດີ​ມະຫາວິທະຍາໄລ​ແຫ່ງ​ຊາດລາວ ແລະ ທ່ານ ຮີ໋ງ ແທ໋ງ ດ໋າດ ອະທິການ​ບໍດີມະຫາວິທະຍາໄລແຫ່ງ​ຊາດ​ນະຄອນ​ໂຮ່​ຈີ​ມິງ ມີທ່ານ ຫງວຽນ ທ້ຽນ ເຍີນ ກຳ​ມະການ​ກົມ​ການເມືອງ​ສູນ​ກາງ​ພັກ ເລຂາ​ຄະນະ​ພັກ ຫົວໜ້າ​ຄະນະສະມາຊິກ​ສະພາ​ແຫ່ງ​ຊາດ ນະຄອນ​ໂຮ່​ຈີ​ມິງ ທ່ານ ບົວ​ລານ ສິລິປັນຍາ ຮອງ​ລັດຖະມົນຕີ​ກະຊວງສຶກ​ສາ​ທິ​ການ ແລະ ກີລາ ພ້ອມພາກສ່ວນ​ກ່ຽວຂ້ອງ​ສອງ​ຝ່າຍ ເຂົ້າ​ຮ່ວມ.

ການ​ລົງ​ນາມ​ຄັ້ງ​ນີ້ ເພື່ອ​ແລກປ່ຽນ​ການ​ຄົ້ນຄວ້າການ​ຮຽນ-ການ​ສອນ ແລະ ດ້ານ​ການ​ສຶກສາ ທັງ​ເປັນ​ການ​ແລກປ່ຽນ​ນັກສຶກ​ສາ​ຂັ້ນ​ປະລິນຍາ​ຕີ ແລະ ຕ່ຳກວ່າ​ປະລິນຍາ​ຕີ ແລກປ່ຽນ​ຂໍ້​ມູນຂ່າວສານ​ຜະລິດ​ຕະ​ພັນ​ຂອງ​ສື່ມວນ​ຊົນ ເອກະສານ​ທີ່​ເປັນ​ຂໍ້​ມູນສຳລັບ​ການ​ຮຽນ​ຮູ້ ບັນດາ​ກິດ​ຈະກຳ​ທີ່​ເປັນ​ການ​ຄົ້ນຄວ້າ ຄື: ການຈັດ​ສຳ​ມະ​ນາ ແລະ ແລກປ່ຽນວິຊາ​ສະເພາະ ເຝິກອົບຮົມ​ຍົກ​ສູງຄວາມ​ສາມາດ​ຂອງ​ຄູ-ອາຈານ ຜູ້​ທີ່​ໄປ​ຄົ້ນຄວ້າ​ຂອງ​ມະຫາ​ວິ​ທະຍາ​ໄລ​ແຫ່ງ​ຊາດ​ລາວ ສະເພາະໃນ​ດ້ານ​ໄອ​ຊີ​ທີ ຊ່ວຍເຫຼືອ​ມະຫາວິທະຍາໄລ​ແຫ່ງ​ຊາດ​ລາວ ພັດທະ​ນາ​ຊັບພະຍາກອນ​ມະນຸດ​ໃນຫຼາຍ​ດ້ານ ນອກ​ນັ້ນ ມະຫາ​ວິ​ທະຍາ​ໄລ​ແຫ່ງ​ຊາດ​ນະຄອນ​ໂຮ່​ຈີ​ມິງ ຈະ​ໃຫ້​ທຶນ​ແກ່​ນັກ​ສຶກ​ສາ ແລະ ຄູ-ອາຈານຂອງ​ມະຫາ​ວິທະຍາໄລ​ແຫ່ງ​ຊາດ​ລາວ ໄປ​ຮຽນ​ຮູ້​ຄົ້ນຄວ້າ​ຢູ່​ມະຫາວິທະຍາໄລ​ແຫ່ງຊາດ​ນະຄອນ​ໂຮ່​ຈີ​ມິງ ແລະ ບັນດາ​ກິດຈະກຳ​ອື່ນໆ​ບົນ​ພື້ນຖານການ​ຕົກລົງ​ເຫັນ​ດີ​ທັງ​ສອງ​ຝ່າຍ.

ມະຫາວິທະຍາໄລ​ແຫ່ງ​ຊາດ ໂຮ່​ຈີ​ມິງ ເປັນ​ມະຫາວິທະຍາໄລຄູ່​ຮ່ວມ​ຍຸດ​ທະ​ສາດ​ຂອງ​ມະຫາ​ວິທະ​ຍາ​ໄລ​ແຫ່ງ​ຊາດ​ລາວ ໂດຍການ​ຮ່ວມ​ມື ໄດ້​ເລີ່ມ​ຂຶ້ນ​ປີ 1998 ເຊິ່ງ​ສອງ​ມະຫາວິທະຍາໄລ ​ໄດ້​ມີບາດກ້າວ​ຂະຫຍາຍຕົວ​ຢ່າງ​ເພິ່ງພໍໃຈ ໂດຍ​ໄດ້​ເຄື່ອນ​ໄຫວ​ກິດ​ຈະກຳ​ຕ່າງໆ ເຊັ່ນ: ທັງ​ສອງ​ຝ່າຍ​ໄດ້ຈັດ​ຕັ້ງ​ໄປ​ມາ​ຢ້ຽມຢາມ​ເຊິ່ງ​ກັນ ແລະ ກັນ ເຮັດ​ວຽກ​ຮ່ວມ​ກັນ ເປັນຕົ້ນ ການ​ຄົ້ນຄວ້າ​ວິທະຍາສາດການ​ແລກປ່ຽນ​ການ​ສຶກ​ສາ ແລະ ຈັດ​ສຳ​ມະ​ນາ. ຂ່າວ: ນສພ ວຽງຈັນໃຫ່ມ