ປີ 2017 ນັກ​ທ່ອງ​ທ່ຽວ​ຈີນ​ໄປ​ທ່ຽວ​ຫວຽດ​ນາມ​ຫຼາຍກວ່າ 4 ລ້ານ​ເທື່ອ​ຄົນ

cri ລາຍງານວ່າ: ອົງ​ການ​ສະ​ຖິ​ຕິ​​ແຫ່ງ​ຊາດ​ຫວຽດ​ນາມ​ເປີດ​ເຜີຍ​ໃນ​ວັນ​ທີ 27 ທັນ​ວາ​ນີ້​ວ່າ, ໃນ​ປີ 2017 ປະ​ເທດ​ຕົນ​ໄດ້​ຕ້ອນ​ຮັບ​ນັກ​ທ່ອງ​ທ່ຽວ​ຈີນ​ຫຼາຍກວ່າ 4 ລ້ານ​ເທື່ອ​ຄົນ, ທຽບ​ໃສ່​ໄລ​ຍະ​ດຽວ​ກັນ​ປີ​ຜ່ານ​ມາ​ໄດ້​ເພີ່ມ​ຂຶ້ນ 48,6%.ສະ​ຖິ​ຕິນີ້​ສະ​ແດງ​ໃຫ້​ເຫັນ​ວ່າ, ປີ​ນີ້​ຫວຽດ​ນາມ​ໄດ້​ຕ້ອ​ນ​ຮັບ​ນັກ​ທ່ອງ​ທ່ຽວ​ຕ່າງ​ປະ​ເທດ 12 ລ້ານ 9 ແສນ​ເທື່ອ​ຄົນ, ທຽບ​ໃສ່​ໄລ​ຍະ​ດຽວ​ກັນ​ປີ​ຜ່າ​ນ​ມາ​ເພີ່ມ​ຂຶ້ນ 29,1%. ໃນ​ນັ້ນ​ຈຳ​ນ​ວນ​ນັກ​ທ່ອງ​ທ່ຽວ ສ​ ເກົາ​ຫຼີ​ໄດ້​ເພີ່ມ​ຂຶ້ນ​ຫຼາຍ​ທີ່​ສຸດ, ​ຄື 56,4%, ຖັດ​ມາ​ແມ່ນ​ນັກ​ທ່ອງ​ທ່ຽວ​ຈີນ​ເພີ່ມ​ຂຶ້ນ 48,6% ແລະ​ອັນ​ດັບ​ສາມ​ແມ່ນ​ນັກ​ທ່ອງ​ທ່ຽວ​ຣັດ​ເຊຍ​​ໄດ້​ເພີ່ມ​ຂຶ້ນ 32,3%.

ອົງ​ການ​ທ່ອງ​ທ່ຽວ​ແຫ່ງ​ຊາດ​ຫວຽດ​ນາມ​ເຄີຍ​ເປີດ​ເຜີຍ​ໃນ​ຕົ້ນ​ປີ​ນີ້​ວ່າ, ​ຫວຽດ​ນາມ​ພວມ​​ສຸມ​ໃສ່​ການໂຄ​ສະ​ນາ​ສະ​ຖານ​ທີ່​ທ່ອງ​ທ່ຽວ​ຕົ້ນ​ຕໍ​ຂອງ​ຕົນ​ຢູ່​ປະ​ເທດ​ຈີນ, ແລະ​ປັບ​ປຸງ​ບໍ​ລິ​ສັດທ່ອງ​ທ່ຽວ​ທີ່​ບໍ່​​ໄດ້ມາດ​ຕະ​ຖານ, ​ແລະຫວັງ​ວ່າ​ປີ​ນີ້​ຫວຽດ​ນາມ​ຈະ​ສາ​ມາດ​ຕ້ອນ​ຮັບ​ນັກ​ທ່ອງ​ທ່ຽວ​ຈີນ​ປະ​ມານ 4 ລ້ານ​ເທື່ອ​ຄົນ.

ປີ 2017 ລວມຍອດຜະລິດຕະພັນພາຍໃນ (ຈີດີພີ) ແຂວງຫຼວງນ້ຳທາບັນລຸ 2.447 ຕື້ກີບ ທຽບໃສ່ປີຜ່ານມາເພີ່ມຂຶ້ນ 7,96%

ປີ 2017 ລວມຍອດຜະລິດຕະພັນພາຍໃນ (ຈີດີພີ) ແຂວງຫຼວງນ້ຳທາບັນລຸ 2.447 ຕື້ກີບ ທຽບໃສ່ປີຜ່ານມາເພີ່ມຂຶ້ນ 7,96%. ອັນພົ້ນເດັ່ນກວ່າໝູ່ແມ່ນກະສິກຳ ແລະປ່າໄມ້ເພີ່ມຂຶ້ນ 7,75% ກວມ 27,05%, ອຸດສາຫະກຳເພີ່ມຂຶ້ນ 11, 68% ແລະການບໍລິການເພີ່ມຂຶ້ນ 9,89%.

ອີງຕາມການລາຍງານຂອງທ່ານ ຫຼ້າປະເສີດ ສີປະເສີດ ຫົວໜ້າຫ້ອງວ່າການປົກຄອງແຂວງຫຼວງນ້ຳທາຕໍ່ກອງປະຊຸມປະຈຳປີ 2017 ແລະວາງທິດທາງແຜນການປີ 2018 ຂອງແຂວງຫຼວງນ້ຳທາ, ໂດຍການເປັນປະທານ ຂອງທ່ານ ເພັດຖາວອນ ພິລະວັນ ເຈົ້າແຂວງໆຫຼວງນ້ຳທາ, ມີກຳມະການປະຈຳພັກແຂວງ, ກຳມະການພັກແຂວງ, ເຈົ້າເມືອງ 5 ເມືອງ, ຫົວໜ້າພະແນກການ-ຮອງຫົວໜ້າພະແນກການອ້ອມຂ້າງ, ອົງການທຽບເທົ່າ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ຫຼ້າປະເສີດ ສີປະເສີດ ກ່າວວ່າ: 1 ປີຜ່ານມາ ເສດຖະກິດແຂວງຫຼວງນ້ຳທາໄດ້ຮັບການພັດທະນາ ແລະຂະຫຍາຍຕົວຕໍ່ເນື່ອງສະເລ່ຍໃນລະດັບ 8,96% ຕໍ່ປີ, ລວມຍອດຜະລິດຕະພັນ ພາຍໃນ (GDP) ບັນລຸ 2.447 ຕື້ກີບ ທຽບໃສ່ປີຜ່ານມາເພີ່ມຂຶ້ນ 7,96%. ໃນນີ້, ກະສິກຳ ແລະປ່າໄມ້ ເພິ່ມຂຶ້ນ 7,75% ກວມ 27,05%, ອຸດສາຫະກຳເພີ່ມຂຶ້ນ 11, 68% ກວມ 21,10% ແລະການບໍລິການເພີ່ມຂຶ້ນ 9,89% ກວມ 27,05%, ພາສີ-ອາກອນ, ຜະລິດຕະພັນເພີ່ມຂຶ້ນ 2,19% ກວມ 2,12% ຂອງ GDP ສະເລ່ຍລາຍ ຮັບຕໍ່ຫົວຄົນບັນລຸໄດ້ 1.656 ໂດລາ ທຽບໃສ່ປີຜ່ານມາເພີ່ມຂຶ້ນ 91 ໂດລາ. ປີ 2017 ໄດ້ຮັບການລົງທຶນຂອງລັດ ທັງໝົດ 39 ໂຄງການມູນຄ່າ 40,88 ຕື້ກີບ ໃນນີ້, ຮ່ວງດັດແກ້ມີ 5 ໂຄງການມູນຄ່າ 6,09 ຕື້ກີບ, ຮ່ວງປົກກະຕິ 26 ໂຄງການ ມູນຄ່າ 29,47 ຕື້ກີບ, ທຶນພັດທະນາຊົນນະບົດ ແລະລົບລ້າງຄວາມທຸກຍາກມີ 8 ໂຄງການ ມູນຄ່າ 3,60 ຕື້ກີບ, ທຶນຈັດສັນພູມລຳເນົາ 3 ໂຄງການ ມູນຄ່າ 900 ລ້ານກີບ, ທຶນ ແກ້ໄຂໜີ້ສິນ (ບ້ວງ 400 ຕື້ກີບ) ມີ 6 ໂຄງການ ມູນຄ່າ 816 ລ້ານກີບ ເຊິ່ງທຶນຈຳນວນດັ່ງກ່າວມາຮອດປະຈຸບັນ ປະຕິບັດສຳເລັດຕາມແຜນການ.

ພ້ອມກັນນັ້ນ, ກໍໄດ້ຄົ້ນຄວ້າ ແລະອະນຸມັດການລົງທຶນເອກະຊົນພາຍໃນ ແລະຕ່າງປະເທດ ຈຳນວນ 8 ໂຄງການ ລວມມູນຄ່າ 31,25 ລ້ານໂດລາສະຫະລັດ, ໃນນີ້ການລົງທຶນພາຍໃນ 6 ໂຄງການ ມູນຄ່າ 18,90 ລ້ານໂດລາສະຫະລັດ ແລະຕ່າງປະເທດ 2 ໂຄງການ ມູນຄ່າ 12,35 ລ້ານໂດລາສະຫະລັດ, ທົ່ວແຂວງມີເນື້ອທີ່ປູກເຂົ້າ 16.306 ເຮັກຕາ ຜົນຜະລິດໄດ້ 51.635 ໂຕນ, ການຜະລິດເປັນສິນຄ້າມີທ່າຂະຫຍາຍຕົວຜົນຜະລິດບັນລຸໄດ້ 330 ພັນໂຕນ ໃນເນື້ອທີ່ 15.399 ເຮັກຕາ, ເນື້ອທີ່ປູກ ຢາງພາລາ 36.034 ເຮັກຕາ ເພີ່ມຂຶ້ນ 2.090 ເຮັກຕາ ໃຫ້ຜົນຜະລິດແລ້ວ 20.151 ເຮັກຕາ, ເກັບກູ້ນ້ຳຢາງໄດ້ 38.508 ໂຕນ, ໂຄງການກໍ່ສ້າງຊົນລະປະທານນ້ຳຢ້າ, ເມືອງສິງສຳເລັດແລ້ວ 30,25%, ນ້ຳມະອຸ່ນສຳເລັດແລ້ວ 81% ສຳລັບຂອດການບໍລິການມີຫົວໜ່ວຍທຸ ລະກິດທີ່ຂຶ້ນທະບຽນແລ້ວ 3.004 ຫົວໝ່ວຍ ເພີ່ມຂຶ້ນ 131 ຫົວໝ່ວຍ, ມີທຶນ ຈົດທະບຽນ 1.843 ຕື້ກີບ,ມູນຄ່າຈໍລະ ຈອນສິນຄ້າພາຍໃນບັນລຸໄດ້ 798,17 ຕື້ກີບ, ມູນຄ່າສິນຄ້າສົ່ງອອກບັນລຸໄດ້ 48,4 ລ້ານໂດລາສະຫະລັດ,

ມູນຄ່ານຳ ເຂົ້າ 297,51 ລ້ານໂດລາສະຫະລັດ, ທົ່ວແຂວງມີໂຮງງານອຸດສາຫະກຳປຸງ ແຕ່ງຂະໜາດນ້ອຍ ແລະກາງ 216 ແຫ່ງ ລວມຍອດຜະລິດຕະພັນອຸດສາຫະ ກຳປຸງແຕ່ງບັນລຸໄດ້ 430,44 ຕື້ກີບ ເພີ່ມຂຶ້ນ 83,97% ແລະມີໂຮງງານຫັດຖະກຳ 46 ແຫ່ງມູນຄ່າຜະລິດຕະພັນ ຫັດຖະກຳບັນລຸ 5,96 ຕື້ກີບ, 11 ເດືອນ ຜ່ານມາຈັດເກັບລາຍຮັບເຂົ້າງົບປະ ມານໄດ້ທັງໝົດ 80,52 ຕື້ກີບ ທຽບໃສ່ ແຜນດັດແກ້ປະຕິບັດໄດ້ 98,80%, ປະຕິບັດລາຍຈ່າຍໄດ້ 342,73 ຕື້ກີບເທົ່າກັບ 92,68% ຂອງແຜນການດັດແກ້, ລາຍຮັບພາສີປະຕິບັດໄດ້ 220,21 ຕື້ກີບ ເທົ່າກັບ 94,75% ຂອງແຜນການປີ. ທົ່ວແຂວງໄດ້ນຳໃຊ້ໄຟຟ້າກວມ 86,42% ຂອງຈຳນວນຄົວເຮືອນທັງໝົດ, ບ້ານທີ່ມີເສັ້ນທາງລົດເຂົ້າເຖິງ 361 ບ້ານ ກວມ 98,36% ຂອງຈຳນວນບ້ານໃນທົ່ວແຂວງ, ປະຊາຊົນໄດ້ຊົມໃຊ້ນ້ຳປະປາ ກວມ 98% ຂອງຈຳນວນປະຊາກອນ ພາຍໃນເທສະບານແຂວງ ແລະເມືອງ, ນຳໃຊ້ນ້ຳລິນ ກວມ 88,36%, ປະກາດບ້ານສຸຂະອະນາໄມໄດ້ 10 ບ້ານ, ບ້ານແບບຢ່າງສາທາລະນະສຸກໄດ້ 279 ບ້ານ, ບ້ານວັດທະນະທຳ 271 ບ້ານ. ອັດຕາການເຂົ້າຮຽນຂອງເດັກໃນເກນ ອາຍຸ 3-5 ປີ ກວມ 61,8%, ອັດຕາການ ເຂົ້າຮຽນສຸດທິຂອງເດັກໃນເກນອາຍຸ 6-10 ປີ ໄດ້ເຂົ້າຮຽນກວມ 97,6%.

ທ່ານ ຫຼ້າປະເສີດ ສີປະເສີດ ກ່າວຕື່ມວ່າ: ປີ 2018 ຈະສູ້ຊົນຮັບປະກັນ ເຮັດໃຫ້ແຂວງຫຼວງນ້ຳທາມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເຮັດໃຫ້ເສດຖະກິດຂະ ຫຍາຍຕົວຢ່າງຕໍ່ເນື່ອງໃຫ້ໄດ້ໃນລະດັບ 9% ຕໍ່ປີຂຶ້ນໄປ ລວມຍອດຜະລິດຕະພັນ ພາຍໃນ (GDP) ໃຫ້ບັນລຸ 2,68 ຕື້ກີບ, ຈະສູ້ຊົນເກັບລາຍຮັບເຂົ້າງົບປະມານໃຫ້ໄດ້ຕາມຄາດໝາຍ, ມູນຄ່າສິນຄ້າ ສົ່ງອອກໃຫ້ໄດ້ 26% ຂອງ(GDP), ແກ້ໄຂຄອບຄົວທຸກຍາກໃຫ້ຍັງເຫຼືອບໍ່ເກີນ 7,24% ຂອງຈຳນວນຄົວເຮືອນໃນ ທົ່ວແຂວງ, ສ້າງໝ່ວຍພັກເຂັ້ມແຂງ-ຮູ້ ນຳພາຮອບດ້ານ ໃຫ້ໄດ້ 78% ແລະເດັກ ເກນອາຍຸ 6-10 ປີ ໃຫ້ໄດ້ເຂົ້າຮຽນບັນລຸ 98%.

ຂ່າວ: ເສດຖະກິດ-ສັງຄົມ

ກອງປະຊຸມສະພາບໍລິຫານກອງທືນຫລຸດຜ່ອນຄວາມທຸກຍາກ ຫລືທລຍ ສະໄໝສາມັນຄັ້ງທີ 23

ກອງປະຊຸມສະພາບໍລິຫານກອງທືນຫລຸດຜ່ອນຄວາມທຸກຍາກ ຫລືທລຍ ສະໄໝສາມັນຄັ້ງທີ 23 ຈັດຂື້ນໃນຕອນເຊົ້າຂອງວັນທີ 27 ທັນວາ 2017 ທີ່ໂຮງແຮມແລນມາກ ນະຄອນຫລວງວຽງຈັນ.

ຈຸດປະສົງຂອງກອງປະຊຸມ ແມ່ນເພື່ອທົບທວນຄືນ,ການຈັດຕັ້ງປະຕິບັດວຽກງານ ທລຍ ທີ່ໄດ້ລະບຸໄວ້ໃນຂໍ້ຕົກລົງຂອງກອງປະຊຸມຄັ້ງທີ່ 22 ຫຼື 1 ປີຜ່ານມາ ແລະ ເພື່ອຂໍທິດຊີ້ນໍາຈາກສະພາບໍລິຫານ ສໍາລັບການສືບຕໍ່ຈັດຕັ້ງປະຕິບັດວຽກງານໃນປີ 2018. ກອງປະຊຸມຄັ້ງນີ້ ໄດ້ໃຫ້ກຽດເປັນປະທານໂດຍທ່ານ ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້ ປະທານສະພາບໍລິຫານ ທລຍ ພອ້ມດ້ວຍການເຂົ້າຮ່ວມຂອງບັນດາ ທ່ານລັດຖະມົນຕີຈາກກະຊວງທີ່ກ່ຽວຂ້ອງ ແລະ ທ່ານຮອງເຈົ້າແຂວງ 10 ແຂວງເປົ້າ ທີ່ ທລຍ ໃຫ້ການສະໜັບສະໜູນ. ພິເສດໃນກອງປະຊຸມຄັ້ງນີ້ ໄດ້ມີຜູ້ຕາງໜ້າຫ້ອງການທະນາຄານໂລກ ແລະ ຜູ້ຕາງໜ້າ ອົງການເພື່ອການພັດທະນາ ແລະ ຮ່ວມມືຂອງປະເທດ ສະວິດເຊີແລນ (SDC)ຊຶ່ງລວມຜູ້ເຂົ້າຮ່ວມທັງໝົດ 58 ທ່ານ, ຍິງ 16 ທ່ານ.

ໃນກອງປະຊຸມ ທ່ານ ບຸນກວ້າງ ສຸວັນນະພັນ ຜູ້ອໍານວຍການບໍລິຫານ ກອງທຶນຫລຸດຜອ່ນຄວາມທຸກຍາກ ໄດ້ລາຍງານວ່າການຈັດຕັ້ງປະຕິບັດວຽກງານ ທລຍ ປະຈໍາປີ 2017 ມີຈໍານວນ 348 ໂຄງການຍ່ອຍ ທີ່ໄດ້ຈັດຕັ້ງປະຕິບັດ ແລະ ນໍາໃຊ້ງົບປະມານ 10,4 ລ້ານໂດລາສະຫະລັດ ແລະ ທຶນປະກອບສ່ວນຊຸມ ຊົນ 726.000 ໂດລາສະຫະລັດ ເທົ່າກັບ 7%. ໃນນັ້ນ, ມີຈຳນວນ 306 ໂຄງການຕັ້ງຢູ່ບ້ານທຸກ ແລະ ທຸກທີ່ສຸດ ເທົ່າກັບ 88% ຂອງບ້ານທັງໝົດ ທີ່ໄດ້ຮັບໂຄງການ, ມາຮອດກາງເດືອນທັນວາທີ 2017 ຄວາມຄືບໜ້າໂດຍສະເລ່ຍແມ່ນ 88 % ແລະ ການເບີກຈ່າຍງົບປະມານ ຫລາຍກວ່າ 90% ຂອງງົບປະ ມານທັງໝົດ, ສ່ວນທີຍັງເຫລືອຄາດວ່າຈະສຳເລັດຢ່າງຊ້າສຸດໃນເດືອນມັງກອນ 2018. ສ່ວນວຽກງານປັບປຸງຊີວິດການເປັນຢູ່ກໍາລັງເຮັດທົດລອງຢູ່ ແຂວງຫົວພັນ ແລະສະຫວັນນະເຂດ ໃນນັ້ນ ໄດ້ມີການສ້າງຕັ້ງກຸ່ມຊ່ວຍເຫລືອທັງໝົດ ຈໍານວນ 915 ກຸ່ມ ຢູ່ໃນ 165 ບ້ານທຸກຍາກ ແລະ ມີຈໍານວນສະມາຊິກທັງໝົດ 10,220 ຄົນ, ໃນນັ້ນ ທລຍ ໄດ້ໃຫທຶນສະໜັບສະໜູນທັງໝົດ 9,8 ຕື້ ກີບ ໄດ້ປ່ອຍກູ້ໃຫ້ສະມາຊິກກຸ່ມ ກຊກ ຈໍານວນທັງໝົດ 9,7 ຕື້ ກີບ ຫຼື ເທົ່າກັບ 99%. ສ່ວນກຸ່ມທ້ອນເງິນພາຍໃນກຸ່ມ ຈໍານວນ 1,5 ຕື້ ກີບ.

ການປະເມີນຜົນປະຈຳປີ 6 ເດືອນທ້າຍປີ 2017 ຂອງຜູ້ໃຫ້ທຶນ ເຫັນວ່າມີຜົນສໍາເລັດລົງໂດຍສະ ເພາະວຽກ ທລຍ ໄດ້ສ້າງຄວາມເຂັ້ມແຂງໃຫ້ແກ່ພໍ່ແມ່ປະຊາຊົນຜູ້ທຸກຍາກ ຢູ່ເຂດຫ່າງໄກສອກຫລີກ. ມອບຄວາມເປັນເຈົ້າການໃຫ້ແກ່ເຂົາເຈົ້າເປັນຜູ້ຄຸ້ມຄອງ. ກອງປະຊຸມໃນຄັ້ງນີ້ຍັງໄດ້ປະກາດການຈັດຕັ້ງໃໝ່ຂອງການຈັດຕັ້ງໃໝ່ຂອງ ທລຍ ໄດ້ແຕ່ງຕັ້ງຄະນະສະພາບໍລິຫານຊຸດໃໝ່ ຈໍານວນ 23 ທ່ານ ໄດ້ສະເໜີແຕ່ງຕັ້ງ ທ່ານ ຈິດ ທະວີໃສ ເປັນຜູ້ອໍານວຍການບໍລິຫານ ທລຍ ຜູ້ໃໝ່, ສ່ວນທ່ານ ບຸນກວ້າງ, ສຸວັນນະພັນ ອິງຕາມດໍາລັດຂອງນາຍົກລັດຖະມົນຕີ ໄດ້ເຂົ້າຮັບບໍານານ. ນອກຈາກນັ້ນ ກໍ່ໄດ້ສະເໜີແຕ່ງຕັ້ງ ຮອງຜູ້ອໍານວຍການ ບໍລິຫານ ທລຍ 2 ທ່ານ. ຜູ້ທີ່ 1. ທ່ານ ປະສອນໄຊ ອິນຊີຊຽງໃໝ່ ແລະ ຜູ້ທີ 2 ທ່ານ ສີສະຫວັດ ເກີດກອງ.

ຂ່າວຈາກ: ວິທະຍຸກະຈາຍສຽງແຫ່ງຊາດ

ແຂວງ ບໍລິຄຳໄຊ ຈັດພິທີເປີດປີທ່ອງທ່ຽວລາວ 2018 ໃນວັນທີ 28 ທັນວາ 2017

ແຂວງ ບໍລິຄຳໄຊ ຈັດພິທີເປີດປີທ່ອງທ່ຽວລາວ 2018 ໃນວັນທີ 28 ທັນວາ 2017 ພ້ອມກັບການເປີດງານບຸນນະມັດສະການພະທາດພະບາດໂພນສັນ ຢູ່ເມືອງ ທ່າພະບາດ ປະຈຳປີ 2017 ຊຶ່ງເປັນກິດຈະກຳຫລັກຂອງແຂວງໃນໂອກາດປີທ່ອງທ່ຽວລາວ 2018 ໂດຍການໃຫ້ກຽດເຂົ້າຮ່ວມຂອງ ທ່ານ ກອງແກ້ວ ໄຊສົງຄາມ, ເຈົ້າແຂວງຯ ບໍລິຄຳໄຊທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ.


ທ່ານ ເຄນ ລໍມະນີ, ຫົວໜ້າພະແນກ ຖະແຫລງຂ່າວ ວັດທະນະທຳ ແລະທ່ອງທ່ຽວແຂວງ ບໍລິຄຳໄຊ ທັງເປັນ ຄະນະຮັບຜິດຊອບຊີ້ນຳ ລະດັບແຂວງໃນການຈັດປີທ່ອງທ່ຽວລາວ 2018 ທີ່ແຂວງ ບໍລິຄຳໄຊ ກ່າວລາຍງານ ວ່າ: ການເປີດປີທ່ອງທ່ຽວລາວ 2018 ເປັນກິດຈະກຳສຳຄັນທີ່ສຸດ ເພາະເປັນການຊຸກຍູ້ການຈັດຕັ້ງປະຕິບັດແນວທາງນະໂຍບາຍ, ກົດໝາຍ ລະບຽບຫລັກການຄຸ້ມຄອງ, ການພັດທະນາ ແລະ ສົ່ງເສີມການທ່ອງ ທ່ຽວທຳມະຊາດ, ປະຫວັດສາດ ແລະ ວັດທະນະທຳ, ສຸມໃສ່ການພັດທະນາການທ່ອງທ່ຽວຢູ່ແຂວງ ບໍລິຄຳໄຊໃຫ້ມີຄວາມສາມາດຮອງຮັບນັກທ່ອງທ່ຽວໃນປັດຈຸບັນ ແລະ ອະນາຄົດ, ສ້າງຈິດສຳນຶກ ແລະ ຍົກສູງຄວາມຮູ້ຂອງສັງຄົມ ກໍຄື ຊາວແຂວງ ບໍລິຄຳໄຊກ່ຽວກັບບົດບາດ ແລະ ຄວາມສຳຄັນຂອງວຽກງານການທ່ອງທ່ຽວທີ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ, ທັງເປັນການສົ່ງເສີມທຸລະກິດຂະໜາດນ້ອຍ ແລະ ກາງ ແລະ ຂະແໜງການຕ່າງຯ ທີ່ກ່ຽວຂ້ອງໃຫ້ໄດ້ຮັບການພັດທະນາຂຶ້ນເລື້ອຍຯ.

ແຂວງ ບໍລິຄຳໄຊ ຖືເອົາການທ່ອງທ່ຽວເປັນບຸລິມະລິດໜຶ່ງເພື່ອຊຸກຍູ້ການພັດທະນາເສດຖະກິດ-ສັງຄົມ ກໍຄື ການສ້າງລາຍຮັບທົງກົງ ແລະ ທາງອ້ອມ ແລະ ສ້າງວຽກເຮັດງານທຳໃຫ້ປະຊາຊົນພາຍໃນແຂວງ ເຮັດໃຫ້ວຽກງານນີ້ໄດ້ຮັບການພັດທະນາຢ່າງຕໍ່ເນື່ອງ. ປີ 2012 ມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ອງທ່ຽວພາຍໃນແຂວງ ບໍລິຄຳໄຊ 135.735 ຄົນ, ສ້າງລາຍຮັບໄດ້ 4.132.050 ໂດລ່າສະຫະລັດ, ປີ 2015 ເພີ່ມຂຶ້ນເປັນ 279.605 ຄົນ, ສ້າງລາຍຮັບໄດ້ 8.388.150 ໂດລ່າສະຫະລັດ. ຄາດວ່າໃນປີ 2018 ຈະເພີ່ມຂຶ້ນເປັນ 300.000 ກ່ວາຄົນ ແລະ ຈະສ້າງລາຍຮັບໄດ້ 9 ລ້ານໂດລ່າສະຫະລັດ ແລະ ຈະເພີ່ມຂຶ້ນເປັນ 400.000 ກ່ວາຄົນໃນປີ 2020 ແລະ ຈະສ້າງລາຍຮັບໄດ້ 12.000.0000 ໂດລ່າສະຫະລັດ.

ການຈັດປີທ່ອງທ່ຽວລາວໃນຄັ້ງນີ້ແມ່ນເປັນຄັ້ງທີ 3 ທີ່ແຂວງ ບໍລິຄຳໄຊ ຈັດຂຶ້ນ ຫລັງຈາກເຄີຍຈັດຂຶ້ນມາແລ້ວ 2 ຄັ້ງໃນປີ 1999-2000 ແລະ ປີ 2011-2012.
ທ່ານ ກອງແກ້ວ ໄຊສົງຄາມ, ເຈົ້າແຂວງຯ ບໍລິຄຳໄຊ ໄດ້ໃຫ້ກຽດກ່າວເປີດປີທ່ອງທ່ຽວລາວ 2018 ທີ່ແຂວງ ບໍລິຄຳໄຊ ໃນຄັ້ງນີ້ ພ້ອມທັງເຊີນຊວນນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າໄປທ່ອງທ່ຽວເພື່ອສຳຜັດຄວາມສວຍງາມທາງທຳມະຊາດ ແລະ ວັດທະນະທຳທີ່ເປັນເອກະລັກ ແລະ ຮີດຄອງປະເພນີອັນດີງາມຂອງແຂວງ ບໍລິຄຳໄຊ ດ້ວຍຄວາມເບີກບານມ່ວນຊື່ນ ແລະ ມີຄວາມສຸກຕະ ຫລອດປີ 2018 ແລະ ຕະຫລອດໄປ.


ສຳລັບກິດຈະກຳທ່ອງທ່ຽວລາວ-ທ່ອງທ່ຽວແຂວງ ບໍລິຄຳໄຊ ປີ 2018 ມີ 20 ກ່ວາກິດຈະກຳ ເປັນຕົ້ນ: ກິດຈະກຳເປີດຫາດຊາຍຂາວ ພ້ອມທັງຊ່ວງເຮືອປິດນ່ານນ້ຳຢູ່ບ້ານໂດນ ເມືອງ ປາກຊັນ, ເປີດຟາມພູຕາເວັນຢູ່ເມືອງ ທ່າພະບາດ, ຈັດຄາລະວານລົດໃຫຍ່ໄປສູ່ດິນແດນປະຫວັດສາດບ້ານເກີດຂອງ ທ່ານ ສີສົມພອນ ລໍວັນໄຊ, ງານໝາກນັດຫວານເຂດບ້ານເລົ່າ-ວຽງຄຳ. ນອກຈາກນີ້ ຍັງມີກິດ ຈະກຳຕ່າງໆ ທີ່ຕິດພັນກັບງານວັດທະນະທຳ, ງານປະເພນີຂອງແຂວງບໍລິຄຳໄຊ ເປັນຕົ້ນ: ງານບຸນກິນຈຽງຂອງເຜົ່າມົ້ງ, ບຸນປີໃໝ່ຂອງເຜົ່າກຶມມຸ, ງານບຸນຊ່ວງເຮືອປະເພນີປະຈຳປີ ແລະ ອື່ນໆ.


ສຳລັບງານບຸນນະມັດສະການພະທາດພະບາດໂພນສັນ ເມືອງ ທ່າພະບາດ ປະຈຳປີ 2017 ຊຶ່ງເປັນກິດຈະກຳຫລັກຂອງແຂວງ ບໍລິຄຳໄຊ ໃນໂອກາດປີທ່ອງທ່ຽວລາວ 2018 ແມ່ນດຳເນີນແຕ່ວັນທີ 28 ທັນວັນ 2017 ຫາ ວັນທີ 1 ມັງກອນ 2018 ຈິ່ງສຳເລັດ ພາຍໃນງານມີຫຼາຍກິດຈະກຳປິ່ນອ້ອມ ເປັນຕົ້ນ: ງານຕະຫຼາດນັດ-ວາງສະແດງສິນຄ້າ ແລະ ຜະລິດຕະພັນການທ່ອງທຽ່ວ ໂດຍເນັ້ນໃສ່ສິນຄ້າໜຶ່ງເມືອງໜື່ງຜະລິດຕະພັນ ຫລື ສິນຄ້າ ODOP, ກາບໄຫ້ວຮອຍພະບາດ, ສະແດງສີລະປະວັນນະຄະດີ ແລະ ກິດຈະກຳອື່ນໆ ອີກ.

ໂດຍ: ມົດແດງນ້ອຍ

ກອງທັບ​ຈີນ​ເພີ່ມ​ທະວີ​ການ​ຝຶກຊ້ອມ

ຕາມຂ່າວສານ cri ລາຍງານ ​​ໃນ​ປີ 2017, ກອງທັບ​ຈີນ​​ໄດ້ດຳ​ເນີນການ​ຝຶກ​ແອບຢ່າງ​ຫ້າວຫັນ ​ໂດຍ​ເນັ້ນ“ຈຳ​ລອງ​ການ​ສູ້​ຮົບຕົວ​ຈິງ,ມີ​ຄວາມ​ຮຽກຮ້ອງ​ຕ້ອງການ​ສູງ ​ແລະ​ສ່ຽງ​ໄພ​ອັນຕະລາຍ​ສູງ”;ການ​ຕິດຕາມ​ກວດກາ​ການ​ຝຶກ​ຊ້ອມ​ນັບ​ວ່າ “​ເຂັ້ມງວດ​ທີ່​ສຸດ​ໃນ​ປະຫວັດສາດ”; ການ​ຊ້ອມ​ຮົບ,ການ​ຝຶກ​ຊ້ອມ ​ແລະ ການ​ສອບ​ເສັງ​ໄດ້​ວາມາດຕະຖານ​ສູງ​ແລະ​ມີ​ສີສັນ​ພິ​ເສດ​ຂອງ​ຈີນ; ​ເຂດ​ຝຶກ​ແອບ​ໃກ້​ກັບ​ແນວ​ໜ້າ​ແລະ​ອື່ນໆ.

ປີ 2017, ທະຫານ​ຈີນກ້າວເຂົ້າສູ່​ຍຸກ​​ໃໝ່ແລະ​ຈົດ​ຈຳ​ໜ້າ​ທີ່​ຮັບຜິດຊອບ-ພາລະ​ກຳ​ຂອງ​ຕົນ, ຍຶດໝັ້ນຝຶກ​ແອບ​ຕົນ​ເອງ,ກຽມພ້ອມຢູ່​ສະ​ເໝີ​ເພື່ອ​ຕ້ານ​ສົງຄາມ ​ແລະສ້າງ​ “ແບບຢ່າງ​ການ​ສູ້​ຮົບ​ຕົວ​ຈິງ”​ໃນ​ການ​ຝຶກ​ແອບ​ຂອງ​ກອງທັບ​ຈີນ​ “ການ​ຝຶກ​ແອບ​ບໍ່​ຢ້ານ​ຄວາມ​ລຳບາກ, ການ​ສູ້​ຮົບ​ບໍ່​ຢ້ານ​ເສຍສະຫຼະ” ດ້ວຍການ​ກະທຳ​ຕົວ​ຈິງ.

ນູ່ນີ່-ອັອຟ ຄວງຄູ່ສະແດງຮູບເງົາລົງຈໍເງິນຄັ້ງທໍາອິດ ກັບເລື່ອງ “ບຸນເຮັດ ບຸນສ້າງ”

ໂດຍທາງບໍລິສັດ​ ຄີ​ຕະ​ນະຄອນ​ ເອັນ​ເຕີ​​ເທນ​ເມັ້ນ​ ຈຳ​ກັດ​ ເຮັດພິທີບວງສວ​ງຮູບເງົາໃໝ່ເລື່ອງ​ ”ບຸນ​ເຮັດ​ ບຸນສ​້າງ​” ເປັນ​ຮູບເງົາ​ເ​ເນວ​ເ​ເອກ​ຊັ່ນ​ດ​ຣາ​ມ່າ​ທີ່​ສ້າງ​ຈາຊີວະປະຫວັດ​ຊີວິດ​ຈິງ​ຂອງ​ ພະ​ອາຈານ​ ພົນ​ ອະ​ທິ​ປັນໂຍ​ ເຈົ້າ​ອາ​ວາດ​ວັດ​ດານ​ພະ​ອິນ​​ ບ້ານ ​ລົ່ມ​ເກົ້າ​ ເມືອງ ​ນິຄົ​ມ​ຄຳ​ສ​້ອຍ​ ແຂວງ ​ມຸກ​ດາ​ຫານ​ ເຊິ່ງກໍໄດ້ນັກສະແດງຫລາກຫລາຍເຂົ້າຮ່ວມສະແດງຮູບເງົາເລື່ອງນີ້​ ແລະໜຶ່ງໃນນັ້ນກໍມີສາວລາວຢ່າງ ນູ່ນີ່ ກຸມພົນພັກດີ ແລະ ຫວານໃຈໜຸ່ມ ອັອຟ ຍິ່ງຍົດ ທີ່ໄດ້ຮ່ວມສະແດງຮູບເງົາເລື່ອງນີ້ພ້ອມ ທັງສອງມາພ້ອມກັບບົດບາດທີ່ທ້າທາຍຄວາມສາມາດໃນການຮັບບົດເປັນພະຍານາກ ເຊິ່ງເປັນບົດບາດການສະແດງຮູບເງົາຄັ້ງທໍາອິດຂອງທັງສອງອີກດ້ວຍ

ຖືວ່າປີນີ້ເປັນປີທອງຈອງໄອດໍ້ສາວລາວຢ່າງນູ່ນີ່ທີ່ໄດ້ກ້າວເຂົ້າສູ່ວົງການບັນເທີງຢ່າງເຕັມທີ່ ບໍ່ວ່າຈະເປັນບົດບາດການສະແດງ, ນາງແບບ, ລວມທັງບົດບາດຂອງການເປັນພິທີກອນນໍາພ້ອມອີກ ແບບທີ່ວ່າດັງບໍ່ຢູດດຶງບໍ່ຢູ່ກັນເລີຍກັບສາວຄົນນີ້.

ເລື່ອງ​ຫຍໍ້ຮູບເງົາປະ​ມານ​ວ່າ​ເປັນ​ເດັກ​ຕ່າງ​ແຂວງ​ ຮຽນ​ເກັ່ງ​ ກິດຈະກຳ​ດີ​ເດັ່ນ​ ແຕ່ປະ​ສົບ​ບັນຫາ​ຄອບຄົວ​ ຊີວິດ​ເລີຍ​ຫັກ​ເຫ​ ພິກ​ຜັນ​ ໄປ​ໃນ​ທາງ​ຊົ່ວຮ້າຍ​ ໃນ​ໄວລຸ້ນ​ຕິດ​ຢາ​ເສບ​ຕິດ​ໃຊ້​ຊີວິດ​ເສ​ເພ ຈົນ​ເຂົ້າ​ມາ​ເຮັດວຽກ​ໃນ​ກຸງ​ເທບ​ ແຕ່ກໍຕ້ອງໜີຕາຍຍ້ອນຖືກ​ນໍາ​ຂ້າ​ ເຮັດໃຫ້​ຊີວິດ​ຮັກ​ຜິດ​ຫວັງ​ ພັດ​ພາກ​ ຈຶ່ງ​ຕັດ​ສິນ​ໃຈ​ບວດ​ຈົນ​ເຖິງ​ປະຈຸບັນ​ ແລະ​ໄດ້​ກໍ່ການ​ສ້າງ​ສາສະນະສະ​ຖານ​ ຖາວອນ​ວັດ​ຖຸ​ ຈົນ​ເປັນ​ທີ່​ຮູ້​ຈັກ​​

 

ສ່ວນ key word ຂອງ​ຮູບເງົາແມ່ນ​ ”ຄວາມ​ຮັກ​ ພັດພາກ​ ວິ​ບາກ​-ບຸນ​” ຄາດ​ວ່າ​ຈະ​ເຂົ້າ​ສາຍ​ໃນ​ໂຮງ​ຮູບເງົາ​ໃນ​ເຄືອ​ເມ​ເຈີ​​ປະ​ມານ​ປາຍ​ປີ​ 2018 ນີ້​ສໍາລັບໃຜທີ່ເປັນແຟນຄັບຂອງທັງສອງກໍຢ່າລືມໃຫ້ກໍາລັງໃຈ ແລະຖ້າຕິດຕາມຜົນງານຂອງທັງສອງກັນແດ່ເດີ້.