ປີ 2017 ມີລົດເຂົ້າ-ອອກດ່ານບໍ່ເຕັນເກືອບ 1 ແສນເທື່ອຄັນ

ດ່ານ​ສາກົນ​ບໍ່​ເຕັນ ແຫ່ງ ​ສປປ ລາວ ເປັນ​ດ່ານ​ເຊິ່ງ​ໜ້າ​ກັບ​ດ່ານບໍ່​ຫານ​ແຫ່ງ ​ສປ ຈີນ ແລະ ເປັນດ່ານ​ດິນ​ຕໍ່​ແຜ່ນ​ລະຫວ່າງເມືອງຫຼວງ​ນ້ຳ​ທາ ແລະ ເມືອງ​ຫຼ້າ​ກິ່ງ ແຂວງ​ສິບ​ສອງ​ພັນ​ນາ ມົນທົນ​ຢຸນນານ ​ສປ ຈີນ ຖື​ເປັນ​ດ່ານ​ເຂົ້າ-ອອກ​ທາງ​ດ້ານ​ຍຸດ​ທະ​ສາດ ພົວພັນ​ທາງ​ດ້ານ​ການເມືອງ ເສດ​ຖະກິດ-ສັງຄົມ ມີ​ເສັ້ນທາງ​ຫຼວງແຫ່ງ​ຊາດ R3 ຈາກ ​ສປ ຈີນ ໄປສູ່​ບັນດາ​ປະເທດ​ອາ​ຊຽນ ໂດຍຜ່ານ​ຈຸດ​ດ່ານ​ສາກົນ​ບໍ່​ເຕັນ ເຊິ່ງເສັ້ນທາງ R3 ມີ​ຄວາມ​ຍາວ 226 ກິໂລແມັດ ແລະ ສ້າງ​ສຳເລັດ​ໃນ​ປີ 2008 ເປັນຕົ້ນ​ມາ ດ້ວຍ​ທຶນ​ກູ້​ຢືມ​ດອກ​ເບ້ຍ​ຕ່ຳ​ຈາກ 3 ພາກສ່ວນຄື: ລັດຖະບານ​ຈີນ ມູນ​ຄ່າ 30 ລ້ານ​ໂດ​ລາ​ສະຫະລັດ ທະນາຄານ​ພັດທະນາ​ອາຊີ 30 ລ້ານ​ໂດ​ລາ ແລະ ລັດຖະບານ​ໄທ ຈຳນວນ 28,5 ລ້ານ​ໂດ​ລາ ພ້ອມ​ນັ້ນ ລັດຖະບານ​ລາວ​ຍັງ​ໄດ້ນຳ​ໃຊ້​ທຶນ ມູນ​ຄ່າ 7,29 ລ້ານ​ໂດລາ ເຂົ້າ​ໃນ​ການ​ຍົກຍ້າຍ​ປະຊາຊົນ​ທີ່​ຖືກ​ຜົນ​ກະທົບ​ລວມ​ທັງ​ໝົດ ການ​ກໍ່ສ້າງ​ເສັ້ນທາງ R3 ມີ​ມູນຄ່າ 95,97 ລ້ານ​ໂດ​ລາ.

ທ່ານ ພອນ​ໄຊ ຈັນທະ​ສອນ ຫົວໜ້າ​ດ່ານ​ສາກົນ​ບໍ່​ເຕັນ​ກ່າວວ່າ: ເສັ້ນທາງ R3 ໄດ້​ເປັນ​ເສັ້ນທາງ​ຍຸດ​ທະ​ສາດ​ທີ່​ສຳຄັນ​ ແກ່ການ​ພັດທະນາ​ເສດຖະກິດ-ສັງຄົມ​ຂອງ​ບັນດາ​ແຂວງ​ພາກ​ເໜືອຂອງ​ລາວ​ເຮົາ ເຊິ່ງ​ລັດຖະບານໄດ້​ໃຊ້​ງົບ​ຈຳນວນ​ຫຼາຍ​ເຂົ້າ​ໃນການ​ກໍ່ສ້າງ​ເສັ້ນທາງ​ນີ້​ໃຫ້​ສຳເລັດ ເພື່ອ​ເຊື່ອມ​ຈອດ​ກັບ​ບັນດາປະເທດ​ໃນ​ພາກ​ພື້ນ ໂດຍ​ສະເພາະແມ່ນ ​ສປ ຈີນ ແລະ ຣາຊະ​ອານາຈັກ​ໄທ ເສັ້ນທາງ R3 ໄດ້​ມີ​ບົດບາດ​ສຳຄັນ​ໃນ​ການ​ສ້າງໃຫ້​ເສດຖະກິດ​ການ​ຄົມມະນາຄົມ ການ​ຂົນສົ່ງ​ສິນຄ້າລະຫວ່າງ​ປະເທດ ຕະຫຼອດ​ເຖິງ​ການ​ຍົກ​ລະດັບຊີວິດ​ການ​ເປັນ​ຢູ່​ຂອງ​ພໍ່​ແມ່​ປະຊາຊົນ​ບັນດາ​ແຂວງ ເສັ້ນທາງ​ຜ່ານໄດ້​ຮັບ​ການ​ປັບປຸງ​ດີ​ຂຶ້ນ ຕາມ​ສະຖິ​ຕິ​ໃຫ້​ຮູ້​ວ່າ ໃນ​ປີ 2017 (ຮອດເດືອນ 11) ມີ​ລົດ​ຂົນສົ່ງ​ສິນຄ້າເຂົ້າ-ອອກ​ດ່ານ ທັງ​ໝົດ 90.160 ເທື່ອ​ຄັນ ໂດຍ​ມີ​ມູນ​ຄ່າ​ສິນຄ້າ​ສູງກວ່າ 247 ຕື້​ກີບ ເຊິ່ງ​ສິນຄ້າ​ສົ່ງອອກ​ຈາກ​ລາວ ​ສ່ວນ​ຫຼາຍ​ແມ່ນຜະລິດ​ຕະ​ພັນ​ໄມ້​ສຳເລັດ​ຮູບ ຖ່ານຫີນ ເຄື່ອງ​ກະສິກຳ ແລະ ຢາງພາລາ ແລະ ສິນຄ້າ​ນຳ​ເຂົ້າແມ່ນ​ເຄື່ອງ​ອຸປະໂພກ-ບໍລິໂພກພາຫະນະ ເຄື່ອງ​ກໍ່ສ້າງ ແລະ ເຄື່ອງໃຊ້​ໄຟຟ້າ ເປັນຕົ້ນ ຈຳນວນ ລົດ​ນັກ​ທ່ອງ​ທ່ຽວ​ປີ 2016 ມີ 31.810 ເທື່ອ​ຄັນ ລົດ​ສ່ວນ​ຕົວປີ 2016 ມີ 45.952 ເທື່ອ​ຄັນ ແລະ ຕົວ​ເລກ​ຈຳນວນຄົນ​ເຂົ້າ-ອອກຜ່ານ​ດ່ານ​ບໍ່​ເຕັນ​ປີ 2017 ເກັບ​ກຳໄດ້​ແລ້ວ ຈຳນວນ 938.372 ເທື່ອ​ຄົນ ຄາດ​ວ່າ​ຕົວ​ເລກ​ດັ່ງກ່າວ​ຈະ​ເພີ່ມ​ຂຶ້ນຈາກ​ປີ 2016 ທີ່ມີຈຳນວນ 776.396 ເທື່ອ​ຄົນ ປະມານ 20% ໃນ​ທ້າຍ​ປີ​ນີ້.

Be the first to comment

Leave a Reply

Your email address will not be published.


*