ປູກໝາກແຕງເອົາແກ່ນຂາຍອີກໜຶ່ງທາງເລືອກສໍາລັບຊາວກະສິກອນ

ແຜນງານປູກພືດເປັນສິນຄ້າຄືຈຸດເລັ່ງທີ່ ເມືອງແກ່ນທ້າວ ແຂວງໄຊຍະບູລີ ເອົາໃຈໃສ່ຊຸກຍູ້ສົ່ງເສີມໃຫ້ຊາວກະສິກອນພາຍໃນເມືອງ ຈັດຕັ້ງປະຕິບັດ, ຢ່າງເປັນຂະບວນກ້ວາງຂວາງ.ແນໃສ່ສ້າງລາຍຮັບໃຫ້ກັບຄອບຄົວ ເພື່ອຄວາມຮັ່ງມີເຂັ້ມແຂງເທື່ອລະກ້າວ. ທ່ານ ສົມສີ ຊາວພິລາ ຫົວໜ້າຫ້ອງການກະສິກໍາ ແລະ ປ່າໄມ້ ປະຈໍາເມືອງແກ່ນທ້າວ,ແຂວງໄຊຍະບູລີ ໃຫ້ຮູ້ວ່າ: ການປູກພືດລະດູແລ້ງປີນີ້ ຕາມແຜນ 1000 ເຮັກຕາ,ໃນນີ້ ນາແຊງ 75 ເຮັກຕາ ໂດຍເລັ່ງໃສ່ຊຸກຍູ້ສົ່ງເສີມໃຫ້ຊາວກະສິກອນຫັນມາປູກພືດໄລຍະສັ້ນທີ່ໄດ້ຜົນຜະລິດສູງ,ປະຢັດຕົ້ນທຶນ,ປະຢັດເວລາ ແລະ ລາຍຮັບສູງກ່ວາ.

ພ້ອມນັ້ນຍັງໄດ້ນໍາເອົາບົດຮຽນໃໝ່ມາສູ່ຊາວກະສິກອນ ໂດຍສະເພາະການປູກໝາກແຕງ,ໝາກໂມເອົາແກ່ນຂາຍ ເຊິ່ງມີຄອບຄົວຊາວກະສິກອນເຮັດຕົວຈິງແລະໄດ້ຮັບຜົນແລ້ວຢູ່ບ້ານແຄ ແລະ ບ້ານດອນສັ້ງ ເມືອງແກ່ນທ້າວ. ໜຶ່ງໃນນີ້ ຄືຄອບຄົວ ພົດ ບຸດສະດີ ປະຊາຊົນ ບ້ານແຄ ເມືອງແກ່ນທ້າວ ໄດ້ລິເລີ່ມ ປູກໝາກແຕງເອົາແກ່ນຂາຍ ເປັນປີທໍາອິດ. ພົດ ບຸດສະດີ ໄດ້ເວົ້າສູ່ຟັງວ່າ: ຢູ່ໃນຄອບຄົວມີທັງໝົດ 7ຄົນ,ຍິງ 4 ຄົນ. 5 ປີຄືນຫຼັງ ຄອບຄົວພົດ ໄດ້ເຮັດສວນປູກສາລີລ້ຽງສັດ ໃນເນື້ອທີ່ 5 ຫາ 6 ເຮັກຕາ,ຜົນຜະລິດ 40 ຫາ 50 ໂຕນຕໍ່ປີ,ສະເລ່ຍລາຍຮັບໄດ້ປະມານ 9 ຫາ 10 ລ້ານກີບຕໍ່ປີ.ທຽບໃສ່ການໃຊ້ຈ່າຍພາຍໃນຄອບຄົວຖືວ່າຍັງບໍ່ພຽງພໍ.

ເພື່ອຫາທາງອອກໃຫ້ກັບຄອບຄົວ ພົດຈຶ່ງຫັນມາປູກໝາກແຕງເອົາແກ່ນຂາຍ ເຊິ່ງໄດ້ບົດຮຽນມາຈາກບ້ານໃກ້ຄຽງ. ເລີ່ມຕົ້ນແປງທໍາອິດໃນເນື້ອທີ່ 0,16 ເຮັກຕາ ໃຊ້ແນວພັນ 3000 ຕົ້້ນ.ໂດຍເລີ່ມຈາກການໄຖ ແລະ ຕີດິນໃຫ້ລະອຽດ ແລ້ວຂຸດເຮັດເປັນຮ່ອງ ຫຼັງຈາກນັ້ນເອົາຜ້າຄຸມ ແລ້ວຈຶ່ງລົງເມັດແນວພັນ ຫ່າງກັນປະມານ 20 ຫາ 30 ຊັງຕີແມັດ ຕໍ່ຂຸມ. ປູກໄດ້ປະມານ 10 ມື້ ຈຶ່ງກະກຽມຫຼັກເຮັດຄ້າງແລະໃສ່ຕາໜ່າງເພື່ອໃຫ້ເຄືອໝາກແຕງກ້ຽວຂື້ນ.ຫຼັງຈາກປູກໄດ້ 28 ມື້ ຈະຕ້ອງໄດ້ປະສົມພັນ ໂດຍເອົາໂຕຜູ້ທີ່ປູກໄວ້ບ່ອນໜຶ່ງຕ່າງຫາກ ມາປະສົມພັນກັບຕົວແມ່ແລ້ວໃຊ້ຜ້າມັດໄວ້. ຈາກນັ້ນກໍ່ຫົດນໍ້າເປັນປົກກະຕິເຊົ້າ-ແລງ.ໄດ້ 70 ມື້ກໍ່ເກັບກູ້ໄປສີເອົາແກ່ນໄປຕາກແດດ 3 ແດດ ແລ້ວຂາຍອອກ ໂດຍມີບໍລິສັດມາຮັບຊື້ກັບທີ່.
ພົດ ບຸດສະດີ ຍັງໃຫ້ຮູ້ຕື່ມວ່າ: ແປງທໍາອິດໄດ້ໃຊ້ທຶນຫຼາຍແດ່ ຕົກຢູ່ປະມານ 3 ລ້ານກີບ ເພາະຕ້ອງໄດ້ຊື້ຕາໜ່າງ ຕໍ່ໄປຕົ້ນທຶນຈະຫຼຸດລົງ.ສ່ວນຜົນຜະລິດແປງໜຶ່ງຈະໄດ້ແກ່ນປະມານ 30 ກວ່າກິໂລ, ບໍລິສັດເກັບຊື້ ກິໂລລະ 250,000 ກັບ.ລາຍຮັບຕໍ່ແປງຈະໄດ້ຢູ່ປະມານ 7 ຫາ 8 ລ້ານກີບ.


ທ່ານ ນິລະກອນ ສຸນາເຄນ ວິຊາການປູກຝັງ ປະຈໍາຫ້ອງການກະສິກໍາ ແລະ ປ່າໄມ້ມືອງແກ່ນທ້າວໃຫ້ຮູ້ວ່າ: ຖ້າທຽບໃສ່ການປູກພືດຊະນິດອື່ນແລ້ວ ການປູກໝາກແຕງເອົາແກ່ນຂາຍ ຈະໄດ້ດີກ່ວາ.ການລົງທຶນບໍ່ສູງ,ໃຊ້ເວລາສັ້ນ ທັງປະຢັດແຮງງານອີກດ້ວຍ.


ເຊັ່ນດຽວກັບທ່ານ ວຽງພອນ ສີປະມວນ ນາຍບ້ານໆ ແຄ ເມືອງແກ່ນທ້າວ ໄດ້ຢັ້ງຢືນວ່າ: ການປູກພືດເປັນສິນຄ້າຂອງປະຊາຊົນບ້ານແຄ ໄດ້ຮັບຜົນດີແມ່ນການປູກພືດໄລຍະສັ້ນ ແລະ ຖ້າທຽບໃສ່ການໄປອອກແຮງງານຢູ່ຕ່າງປະເທດແລ້ວ ການປູກພືດເປັນສິນຄ້ານີ້ດີກວ່າຫຼາຍເທົ່າ.
ນີ້ເປັນພຽງການລິເລີ່ມເທົ່ານັ້ນ ເຊິ່ງໃນຕໍ່ໜ້າ ພົດ ຍັງຈະຂະຫຍາຍອອກອີກຫຼາຍແປງ ໂດຍໄດ້ກະກຽມດິນໄວ້ແລ້ວ. ຖືວ່າ ພົດ ຄືຄົນທໍາອິດທີ່ຫັນມາປູກໝາກແຕງເອົາແກ່ນຂາຍຢູ່ບ້ານແຄ ເມືອງແກ່ນທ້າວ ແຂວງໄຊຍະບູລີ.
ພາບຂ່າວ: ຖວທ ເມືອງແກ່ນທ້າວ

Be the first to comment

Leave a Reply

Your email address will not be published.


*