ແຂວງເຊກອງ ຈະໃຫ້ປະຊາຊົນມີລາຍຮັບ 14 ລ້ານກີບ ຕໍ່ຄົນຕໍ່ປີໃນປີ 2018

ປີ 2018 ແຂວງເຊກອງຕັ້ງເປົ້າໝາຍການຈັດຕັ້ງປະຕິບັດ ແລະຜັນຂະຫຍາຍແຜນພັດທະນາເສດຖະກິດ-ສັງຄົມ ໂດຍຈະສູ້ຊົນເຮັດໃຫ້ອັດຕາການຂະຫຍາຍຕົວຂອງເສດຖະກິດເພີ່ມຂຶ້ນ 9,3% ແລະລວມຍອດຜະລິດຕະພັນພາຍໃນ ຫຼື GDP ສະເລ່ຍໃສ່ພົນລະເມືອງໃຫ້ບັນລຸໄດ້ 14 ລ້ານກີບຕໍ່ຄົນຕໍ່ປີ.


ຕາມການລາຍງານຂອງທ່ານ ຄຳເຜີຍ ບຸດດາວຽງ ເຈົ້າແຂວງໆເຊກອງຕໍ່ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງເຊກອງຊຸດທີ I ເມື່ອວັນທີ 27 ທັນວາວ່າ: ໃນປີ 2018 ເປັນອີກປີໜຶ່ງຂອງການຈັດຕັ້ງປະຕິບັດມະຕິ X ຂອງພັກ, ມະຕິ IX ຂອງອົງຄະນະພັກແຂວງ ກໍຄືແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII (2016-2020) ແລະ ແຂວງຈະສູ້ຊົນເອົາໃຈໃສ່ຈັດຕັ້ງປະຕິບັດວຽກງານການພັດທະນາເສດຖະກິດເປັນຈຸໃຈກາງ ທັງນີ້ ກໍເພື່ອແນໃສ່ຮັບປະກັນການພັດທະນາເສດຖະກິດໃຫ້ມີຄວາມໝັ້ນທ່ຽງ, ຍືນຍົງ ແລະຖືກທິດຕິດພັນກັບການພັດທະ ນາຂົງເຂດວັດທະນະທຳ-ສັງຄົມ.
ສູ້ຊົນເຮັດໃຫ້ອັດຕາການຂະຫຍາຍຕົວຂອງເສດຖະກິດເພີ່ມຂຶ້ນໃນລະດັບ 9,3% ແລະ ລວມຍອດຜະລິດຕະພັນພາຍໃນ ຫຼື GDP ສະເລ່ຍໃສ່ພົນລະເມືອງໃຫ້ບັນລຸໄດ້ 14,1 ລ້ານກີບຕໍ່ຄົນຕໍ່ປີ, ໃນນັ້ນຂະແໜງກະສິກຳຂະຫຍາຍຕົວເພີ່ມຂຶ້ນ 8,0% ກວມເອົາ 41,0%; ຂະແໜງອຸດສາຫະກຳ 9,0% ກວມເອົາ 22,6% ແລະຂະແໜງບໍລິການຂະຫຍາຍຕົວເພີ່ມຂຶ້ນ 11% ກວມເອົາ 36,4%.


ສ່ວນການລົງທຶນ ຖືເປັນໝາກຫົວໄຈຫຼັກຂອງການຊຸກຍູ້ເສດຖະກິດໃຫ້ມີການຂະຫຍາຍຕົວແມ່ນມີຄວາມຕ້ອງການຢູ່ປະມານ 816 ຕື້ກີບກວມເອົາ 46,5% ຂອງຈີດີພີ ຊຶ່ງປະກອບມີການລົງທຶນຂອງລັດ 85 ຕື້ກີບ; ທຶນຊ່ວຍເຫຼືອລ້າ ແລະກູ້ຢືມ 122 ຕື້ກີບ; ການລົງທຶນຂອງພາກເອກະຊົນພາຍໃນ ແລະຕ່າງປະເທດ 367 ຕື້ກີບ ແລະການລົງທຶນສິນເຊື່ອຂອງທະນາຄານ 241 ຕື້ກີບ ໂດຍຈຳນວນທຶນດັ່ງກ່າວ ຈະສຸມໃສ່ການພັດທະນາພື້ນຖານໂຄງລ່າງ, ການເຕົ້າໂຮມບ້ານຈັດສັນອາຊີບ ແລະຊຸກຍູ້ສົ່ງເສີມການຜະລິດ ເພື່ອເປັນການສ້າງວຽກເຮັດງານທຳ ແລະລາຍໄດ້ທີ່ໝັ້ນຄົງໃຫ້ປະຊາຊົນ.
ແນວໃດກໍຕາມ ເພື່ອບັນລຸຄາດໝາຍດັ່ງກ່າວ ທ່ານ ຄຳເຜີຍ ບຸດດາວຽງ ກ່າວວ່າ: ຄະນະພັກ, ການນຳທຸກຂັ້ນຂອງແຂວງຕ້ອງເພີ່ມທະວີຫັນລົງກໍສ້າງຮາກຖານການເມືອງ, ສຶກສາອົບຮົມການເມືອງນຳພາແນວຄິດສະມາຊິກພັກ, ພະ ນັກງານ-ລັດຖະກອນ ແລະປະຊາຊົນບັນດາເຜົ່າຢ່າງເປັນປົກກະຕິຕໍ່ເນື່ອງ ເພື່ອໃຫ້ມີຄວາມເປັນເອກະພາບໃນແນວທາງການປະຕິບັດ, ພ້ອມນັ້ນ ກໍຕ້ອງຕັ້ງໜ້າຜັນຂະຫຍາຍແຜນພັດທະນາເສດຖະກິດ-ສັງຄົມຂອງແຂວງຕິດພັນກັບວຽກງານ 3 ສ້າງໃຫ້ເປັນແຜນງານ ແລະເປັນໂຄງການລະອຽດຂອງແຕ່ລະຂະແໜງການ. ທັງນີ້ ກໍເພື່ອສ້າງເງື່ອນໄຂແກ່ການພັດທະນາເສດຖະກິດ-ສັງຄົມ ແລະການແກ້ໄຂຄວາມທຸກຍາກຂອງປະຊາຊົນພາຍໃນແຂວງນັບມື້ດີຂຶ້ນເປັນກ້າວໆ.
ຍາດແຍ່ງການລົງທຶນຂອງພາກເອກະຊົນພາຍໃນ ແລະຕ່າງປະເທດໃຫ້ເປັນໄປຕາມຄາດໝາຍ ແລະແຜນການທີ່ວາງໄວ້ ເພື່ອຫັນເອົາແຫຼ່ງທຶນດັ່ງກ່າວເຂົ້າໃສ່ການພັດທະນາເສດຖະກິດ ໂດຍສະເພາະແມ່ນການພັດທະນາພື້ນຖານໂຄງລ່າງ ແລະສິ່ງອຳນວຍຄວາມສະດວກໃຫ້ແກ່ການຜະລິດ, ການໄປ-ມາຫາສູ່, ການແລກປ່ຽນຊື້-ຂາຍສິນຄ້າ, ການຄ້າ ແລະການລົງທຶນຕາມທ່າແຮງທີ່ມີຢູ່ພາຍໃນແຂວງ.

ຂ່າວ-ພາບ : ສັນຍາ

ສຸມໃສ່ຂະຫຍາຍ ແລະ ພັດທະນາການສຶກສາໃນແຕ່ລະຂັ້ນ

ກອງ​ປະຊຸມ​ຜູ້​ບໍລິຫານ​ການສຶກ​ສາ ແລະ ກີລາ​ທົ່ວ​ປະເທດ ປະຈຳ​ປີ 2017 ແລະ ກອງ​ປະຊຸມຄົບ​ຄະນະ ຄັ້ງ​ທີ VI ຂອງ​ຄະນະກຳມາ​ທິ​ການ​ແຫ່ງ​ຊາດ ເພື່ອ​ພັດທະ​ນາ​ຊັບພະຍາກອນ​ມະນຸດ ຈັດຂຶ້ນ​ວັນ​ທີ 26-28 ທັນວາ 2017 ທີ່​ມະຫາວິທະຍາໄລ​ແຫ່ງ​ຊາດ ເປັນ​ປະທານ​ໂດຍ​ທ່ານ​ນາງ ແສງເດືອນ ຫຼ້າ​ຈັນທະ​ບູນ ລັດ​ຖະ​ມົນຕີ​ກະຊວງ​ສຶກ​ສາ​ທິ​ການ ແລະ ກີລາ ມີ​ຮອງ​ລັດຖະມົນຕີ ຫົວໜ້າຫ້ອງການ ຫົວໜ້າ​ກົມ ອະທິການບໍດີ ທີ່​ປຶກສາ​ວັດທະນະທຳ ຫົວໜ້າ​ພະ​ແນກ​ສຶກ​ສາ​ແຂວງນະຄອນ​ຫຼວງ ແລະ ຫ້ອງການ​ສຶກສາ​ເມືອງ​ທົ່ວ​ປະເທດ​ເຂົ້າ​ຮ່ວມ.

ທ່ານ​ນາງ ແສງ​ເດືອນ ຫຼ້າ​ຈັນທະ​ບູນ ກ່າວ​ວ່າ: ໃນ​ໜຶ່ງ​ປີ​ຜ່ານມາ ​ໄດ້​ເອົາໃຈໃສ່​ລົງທຶນ​ໃນ​ການພັດທະນາ​ການ​ສຶກ​ສາ ໂດຍ​ເນັ້ນໃສ່​ການ​ຂະຫຍາຍ ແລະ ສ້ອມແປງ​ອາຄານ​ຮຽນ ສະໜອງ​ອຸປະກອນ​ຮັບ​ໃຊ້​ການ​ຮຽນ-ການ​ສອນ ເຝິກອົບຮົມ ແລະ ຍົກ​ລະດັບ​ຄູ ລວມ​ທັງ​ການ​ສ້າງ​ຄວາມ​ເຂັ້ມແຂງ​ວຽກ​ງານ​ບໍລິຫານ ແລະ ຄຸ້ມຄອງ​ການ​ສຶກ​ສາ​ໃຫ້​ແກ່​ຜູ້​ບໍລິຫານການ​ສຶກ​ສາ​ໃນ​ແຕ່​ລະ​ຂັ້ນ ພ້ອມ​ນີ້ ກະຊວງ​ສຶກ​ສາ​ທິ​ການ ແລະ ກີລາ ຮ່ວມ​ກັບ​ບັນດາ​ແຂວງ ເມືອງ ໄດ້ຈັດ​ຕັ້ງ​ການ​ຮຽນ-ການ​ສອນ​ບຳລຸງ​ຊັ້ນ​ປະຖົມ​ສຶກ​ສາ ​ໃຫ້​ແກ່​ຜູ້ຮຽນ​ໃນ​ເກນ 6-14 ປີ ທີ່​ພາດ​ໂອກາດ​ເຂົ້າ​ຮຽນ​ໃນ​ສາຍ​ສາມັນ​ສຶກສາ ໄດ້​ສືບຕໍ່​ຈັດການ​ຮຽນ-ການສອນ​ບຳລຸງ​ຍົກ​ລະດັບ​ການ​ສຶກສາ​ຊັ້ນ​ມັດທະຍົມ ໃຫ້​ກັບ​ກຸ່ມ​ເປົ້າໝາຍ​ທີ່​ຈົບ​ປະຖົມ ແລະ ທຽບ​ເທົ່າກັບ​ສູນ​ການ​ສຶກ​ສາ​ນອກ​ໂຮງຮຽນຂັ້ນ​ຕ່າງໆ ບົນ​ພື້ນຖານ​ດັ່ງກ່າວ ເຮັດ​ໃຫ້​ອັດຕາ​ການ​ຮູ້​ໜັງສື​ຂອງກຸ່ມ​ອາຍຸ 15-24 ປີ ບັນລຸ​ໄດ້ 92,5% (ຄາດໝາຍ 95%) ອັດຕາ​ການ​ຮູ້​ໜັງສື​ຂອງ​ປະຊາກອນ 15 ປີ​ຂຶ້ນ​ໄປ ບັນລຸ​ໄດ້ 84,7% (ຄາດໝາຍ 89%) ນອກ​ນີ້​ຍັງ​ໄດ້​ເອົາໃຈໃສ່​ສ້າງ​ນາຍ​ຊ່າງ​ເຕັກນິກ ແລະ ກຳລັງ​ແຮງ​ງານ ເພື່ອ​ໃຫ້ຕອບ​ສະໜອງ​ກັບ​ຄວາມ​ຕ້ອງການ​ໃນ​ການ​ພັດທະນາ​ເສດ​ຖະກິດ-ສັງຄົມ ໂດຍ​ໄດ້​ຈັດ​ເຝິກ​ອົບຮົມ​ຫຼັກສູດ​ວິຊາ​ຊີບ ລະດັບ 1-2 ແລະ 3 ໃຫ້​ນັກຮຽນ​ຈົບ​ຊັ້ນ ປ5 ທີ່​ບໍ່​ໄດ້​ຮຽນ​ຕໍ່​ໃນ​ຊັ້ນ​ມັດທະຍົມສຶກ​ສາ ແລະ ນັກຮຽນ​ທີ່​ປະລະການ​ຮຽນ​ຊັ້ນ​ມັດທະຍົມ ໂດຍ​ສະເພາະເພດ​ຍິງ ແລະ ກຸ່ມ​ເປົ້າໝາຍ​ຜູ້​ດ້ອຍ​ໂອກາດ​ຢູ່​ເຂດ​ຫ່າງໄກ​ສອກຫຼີກ ຄຽງ​ຄູ່​ກັນ​ນັ້ນ ກໍ່​ຍັງ​ມີສິ່ງ​ທ້າ​ທາຍ ແລະ ສາເຫດ​ເຮັດ​ໃຫ້ການ​ພັດທະນາ​ການ​ສຶກ​ສາມີຄວາມ​ຊັກ​ຊ້າ ແລະ ບໍ່​ສາມາດບັນລຸ​ໄດ້​ບາງ​ຄາດໝາຍ​ທີ່​ກຳນົດໄວ້ ຄື: ເດັກ​ບໍ່​ໄດ້​ກຽມ​ຄວາມພ້ອມ​ກ່ອນ​ເຂົ້າ​ຮຽນ​ປະຖົມ ຄູ​ບໍ່ພຽງພໍ​ຢູ່​ເຂດ​ຫ່າງ​ໄກ​ສອກຫຼີກ ເຮັດ​ໃຫ້​ໂຮງຮຽນ​ທີ່​ດຳເນີນ​ການສອນ​ຫ້ອງ​ຄວບ​ໃນ​ຊັ້ນ​ປະຖົມ ການ​ລະດົມ​ປະຊາກອນ​ທີ່​ກືກ​ໜັງສື​ເຂົ້າ​ຮ່ວມ​ຮຽນ​ບຳລຸງ ແລະ ຍົກລະດັບ​ການ​ສຶກ​ສາ​ຍັງ​ມີ​ຄວາມຫຍຸ້ງຍາກ ແລະ ອື່ນໆ.

ສຳລັບ​ວຽກ​ຈຸດ​ສຸມ​ປີ 2018 ໂດຍ​ຈະ​ຂະຫຍາຍ​ວຽກ​ງານ​ການສຶກ​ສາກ່ອນ​ໄວ​ຮຽນ​ໃຫ້​ກວ້າງຂວາງ ໂດຍ​ເນັ້ນ​ໃສ່​ການ​ສະໜອງໂຄງ​ລ່າງ​ພື້ນຖານ ແລະ ສິ່ງ​ອຳນວຍ​ຄວາມ​ສະດວກ​ຕ່າງໆ​ໃຫ້ແກ່​ໂຮງຮຽນ​ອະນຸບານ ແລະ ຫ້ອງ​ກຽມ​ປະຖົມ ໂດຍ​ສະເພາະຢູ່​ຕົວ​ເມືອງ​ຕ່າງໆ​ໃຫ້​ບັນລຸ​ໄດ້ 76% ເອົາໃຈໃສ່​ຈັດ​ຕັ້ງ​ປະຕິບັດການ​ສຶກ​ສາ​ພາກ​ບັງຄັບ​ຮອດຊັ້ນ​ມັດທະຍົມ​ຕອນ​ຕົ້ນ ໃຫ້​ປາກົດຜົນ​ເປັນ​ຈິງ ໂດຍ​ເພີ່ມ​ການ​ເຂົ້າຮຽນ​ໃນ​ຊັ້ນ​ມັດທະຍົມ​ຕົ້ນ​ໃຫ້ຫຼາຍ​ຂຶ້ນ ນອກ​ນີ້ຍັງ​ສືບຕໍ່​ປັບປຸງ​ວຽກ​ງານ​ທີ່​ສຳຄັນ​ອື່ນໆ​ຕື່ມ​ອີກ.

ນອກ​ນີ້ ກອງ​ປະຊຸມ​ຍັງ​ໄດ້​ທົບທວນ​ຄວາມ​ຄືບ​ໜ້າຜົນສຳເລັດ ແລະ ສິ່ງ​ທ້າ​ທາຍ​ຕ່າງໆ​ທີ່​ເກີດຂຶ້ນ​ໃນ​ໜຶ່ງ​ປີຜ່ານມາ ພ້ອມ​ທັງວາງ​ແຜນ​ວຽກ​ຈຸດ​ສຸມປີ 2018 ຕາມ 10 ຂະແໜງການ​ຍ່ອຍ ຮັບ​ຟັງ​ການ​ສະເໜີ​ກ່ຽວ​ກັບ​ການຄົ້ນຄວ້າ​ຄັດ​ເລືອກ ແລະ ຈັດ​ສົ່ງພະນັກງານນັກ​ສຶກ​ສາ​ໄປ​ຮຽນ​ຕໍ່ ແລະ ຍົກ​ລະດັບ​ຢູ່​ຕ່າງປະເທດ ແລະ ການຈັດຕັ້ງ​ປະຕິບັດ​ວຽກງານ​ສຶກ​ສາ ແລະ ກີລາ​ພາກເອກະ​ຊົນ. ຂ່າວ: ນສພ ວຽງຈັນໃຫ່ມ

ລັດຖະບານສຸມໃສ່ຫຼາຍບັນຫາ ເພື່ອໃຫ້ມີປະສິດທິພາບ ແລະ ປະສິດທິຜົນສູງ

ກອງ​ປະຊຸມ​ລັດຖະບານ​ສະໄໝສາມັນ​ປະຈຳ​ເດືອນ​ທັນວາ ເຊິ່ງເປັນ​ຄັ້ງ​ສຸດ​ທ້າຍ​ຂອງ​ປີ 2017 ໄດ້ຈັດ​ຂຶ້ນ​ວັນ​ທີ 25-26 ທັນວາ 2017 ທີ່​ສຳນັກງານ​ນາຍົກ​ລັດຖະ​ມົນຕີ ເປັນ​ປະທານ​ຂອງ​ທ່ານ ທອງ​ລຸນ ສີ​ສຸ​ລິດ ນາຍົກ​ລັດ​ຖະມົນຕີ ມີ​ບັນດາ​ຮອງ​ນາຍົກ​ລັດຖະ​ມົນຕີ ສະມາຊິກ​ລັດຖະບານ ແລະ ພາກສ່ວນ​ທີ່​ກ່ຽວຂ້ອງ​ເຂົ້າຮ່ວມ.

ກອງ​ປະຊຸມ​ໄດ້​ຮັບ​ຟັງ​ລາຍ​ງານ ແລະ ແລກປ່ຽນ​ຄຳ​ເຫັນ​ກ່ຽວ​ກັບສະພາບ​ພົ້ນ​ເດັ່ນ​ຂອງ​ພາກ​ພື້ນ ແລະ ສາກົນ ຄວາມ​ເປັນ​ລະບຽບຮຽບ​ຮ້ອຍ​ຂອງ​ສັງຄົມ ການ​ເກັບລາຍ​ຮັບ ແລະ ຄຸ້ມ​ຄອງ​ລາຍຈ່າຍ​ງົບປະມານ ການ​ປ່ຽນແປງດິນ​ຟ້າ​ອາກາດ​ໃນ​ປັດຈຸບັນ ແລະ ພິຈາລະນາ​ນິຕິ​ກຳ 6 ສະບັບ (ກົດໝາຍ 4 ສະບັບ) ຄື: ຮ່າງ​ກົດໝາຍວ່າ​ດ້ວຍ​ທະບຽນ​ຄອບຄົວ ສະບັບ​ປັບປຸງ ຮ່າງ​ກົດໝາຍ​ວ່າດ້ວຍ​ການ​ປ່ຽນແປງ​ຂອງ​ສະພາບດິນ​ຟ້າ​ອາກາດ (ຕໍ່​ກັບ​ຮ່າງ​ກົດໝາຍ​ດັ່ງກ່າວ ກອງ​ປະຊຸມ​ໄດ້​ຊີ້ນຳ​ໃຫ້​ພາກສ່ວນ​ທີ່​ກ່ຽວຂ້ອງ ​ນຳໄປ​ປັບປຸງ​ຄືນ​ຕາມ​ການ​ປະກອບຄຳ​ຄິດ​ຄຳ​ເຫັນ​ຂອງ​ສະມາຊິກ​ລັດຖະ​ບານ ໂດຍ​ໃຫ້​ເຮັດ​ເປັນ​ດຳລັດ ຮ່າງ​ກົດໝາຍ​ວ່າ​ດ້ວຍ​ການ​ຈັດສັນ​ພູມລຳເນົາ ແລະ ຮ່າງ​ກົດໝາຍວ່າ​ດ້ວຍ​ວັກ​ຊີນ) ແລະ ດຳລັດ 2 ສະບັບ ຄື: (ດໍາລັດ​ວ່າດ້ວຍ​ພະນັກງານ​ລັດ​ວິ​ສາ​ຫະ​ກິດ ແລະ ດຳລັດ​ວ່າ​ດ້ວຍ​ເຂດ​ເສດ​ຖະກິດ​ພິເສດ​ສະບັບ​ປັບປຸງ) ແລະ ເນື່ອງ​ຈາກ​ເປັນ​ເດືອນ​ສຸດ​ທ້າຍຂອງ​ປີ ກອງ​ປະຊຸມ​ໄດ້​ສະຫຼຸບ​ຕີ​ລາຄາ​ການ​ດຳເນີນ​ກອງ​ປະຊຸມ​ລັດຖະ​ບານ ປະຈຳ​ປີ 2017 ແລະ ປຶກສາ​ຫາລື​ແຜນ​ດຳເນີນ​ກອງ​ປະຊຸມ​ລັດຖະບານ ປີ 2018.

ທ່ານ​ນາຍົກລັດຖະມົນຕີ​ໄດ້​ສະຫຼຸບ​ສັງ​ລວມ​ ການເຄື່ອນໄຫວ​ວຽກງານ​ຈຸດ​ສຸມ​ທີ່​ພົ້ນ​ເດັ່ນ​ຂອງ​ລັດ​ຖະບານ​ໃນ​ເດືອນ​ທັນວາ ແລະ ຊີ້​ນຳວຽກ​ງານ​ຈຸດ​ສຸມ​ເດືອນ​ມັງ 2018 ຄຽງ​ຄູ່​ກັບ​ວຽກ​ງານ​ຈຸດ​ສຸມ​ທີ່​ປະຕິ​ບັດ​ໄດ້​ນັ້ນ ໃນ​ເດືອນ​ຜ່ານ​ມາ​ກໍ່ຍັງ​ມີ​ດ້ານ​ຄົງ​ຄ້າງ​ທີ່​ພວກ​ເຮົາ​ຈະຕ້ອງ​ໄດ້​ສືບຕໍ່​ແກ້​ໄຂ ເຊິ່ງ​ເປັນເດືອນ​ທຳ​ອິດ​ຂອງ​ການຈັດຕັ້ງ​ປະຕິ​ບັດ​ແຜນ​ພັດທະນາ​ເສດຖະກິດ-ສັງຄົມ​ແຫ່ງ​ຊາດ ປີ 2018 ແລະ ກໍ່​ເປັນ​ເດືອນ​ທີ່​ລັດຖະບານ​ຈະ​ມີການເຄື່ອນໄຫວ​ວຽກ​ງານ​ທີ່​ສຳຄັນ​ທັງ​ພາຍ​ໃນ ແລະ ຕ່າງ​ປະເທດ ເພື່ອ​ໃຫ້ການ​ປະຕິບັດ​ວຽກງານ​ດຳເນີນ​ໄປ​ຢ່າງ​ມີ​ປະ​ສິດທິຜົນ​ນັ້ນ ບັນດາ​ສະມາຊິກ​ລັດ​ຖະບານ​ຈົ່ງ​ສືບຕໍ່​ເອົາໃຈໃສ່​ວຽກງານ​ຈຸດ​ສຸມ​ປະຈຳ​ເດືອນ​ມັງກອນ 2018 ຂອງ​ລັດຖະບານ​ດັ່ງ​ຕໍ່​ໄປ​ນີ້ ​ເອົາໃຈໃສ່​ຮັກສາ​ຄວາມ​ສະຫງົບ ແລະ ຄວາມ​ເປັນ​ລະບຽບ​ຮຽບຮ້ອຍ​ຕາມ​ບໍລິເວນ​ເຂດ​ຊາຍ​ແດນ ຄຸ້ມ​ຄອງ​ຄວາມ​ເປັນ​ລະບຽບ​ຮຽບຮ້ອຍ​ຂອງ​ສັງຄົມ​ໃຫ້​ໜັກ​ແໜ້ນ ໂດຍ​ສືບຕໍ່​ສ້າງ​ແຜນ​ແມ່​ບົດ​ຈັດສັນ​ລະບຽບ​ສັງຄົມ​ໃຫ້​ສຳເລັດໂດຍ​ໄວ ສືບຕໍ່​ເອົາໃຈໃສ່​ເປັນ​ພິເສດ​ຕໍ່​ການ​ແກ້​ໄຂ​ບັນຫາ​ປາກົດການ​ຫຍໍ້ທໍ້​ທາງ​ສັງຄົມ ເປັນຕົ້ນ ບັນຫາ​ຢາ​ເສບ​ຕິດ ອຸບັດ​ຕິ​ເຫດຕາມ​ຖະໜົນ ອັກຄີ​ໄພ ຕິດຕາມໄພ​ໜາວ ແລະ ສຸຂະພາບ​ຂອງປະຊາຊົນ ເພື່ອ​ຊ່ວຍເຫຼືອ​ປະຊາຊົນ​ໃຫ້​ທັນ​ການ ແລະ ບັນຫາ​ອື່ນໆ ສ່ວນ​ວຽກ​ງານ​ຈຸດ​ສຸມ​ຂອງ​ລັດຖະ​ບານ ເຊິ່ງ​ໄດ້​ກຳນົດ 10 ຈຸດ​ສຸມຕົ້ນຕໍ ຄື: ຊຸກຍູ້​ການ​ເຕີບ​ໂຕ​ຂອງເສດຖະກິດ ການ​ຄຸ້ມ​ຄອງ​ລະບົບການ​ເງິນ-ງົບປະມານ ການ​ຄຸ້ມຄອງ​ເງິນຕາ ການ​ປັບປຸງ​ສະພາບແວດ​ລ້ອມ​ໃນ​ການ​ດຳເນີນ​ທຸລະກິດ ການ​ຊຸກຍູ້​ສົ່ງເສີມ​ການ​ຜະລິດ ແລະ ບໍລິການ ການ​ພັດ​ທະນາ​ທາງ​ດ້ານ​ວັດທະນະທຳ-ສັງຄົມ ແລະ ການ​ແກ້​ໄຂ​ຄວາມທຸກ​ຍາກ ການ​ຄົ້ນຄວ້າ ແລະ ຈັດ​ຕັ້ງ​ປະຕິບັດ​ເປົ້າ​ໝາຍ​ການພັດທະນາ​ແບບ​ຍືນ​ຍົງ ການ​ບໍ​ລິຫານ​ລັດ ການເຄື່ອນໄຫວ​ຂອງ​ຜູ້ປະກອບ​ການ ການ​ປັບປຸງ​ບັນດານິຕິ​ກຳ ແລະ ການ​ສ້າງ​ສະພາບ​ແວດ​ລ້ອມ​ທີ່​ດີ​ໃຫ້​ແກ່​ການ​ພັດທະນາ. ຂ່າວ: ນສພ ວຽງຈັນໃຫ່ມ

IMF ສະແດງ​ຄວາມ​ເປັນ​ຫ່ວງ​ຕໍ່ການ​ຂະຫຍາຍຕົວ​ຂອງ​ເສດ​ຖະກິດ​ຂອງ​ລາວ ທີ່​ເຫັນ​ວ່າຍັງ​ບໍ່​ທັນທົ່ວ​ເຖິງ​ເທົ່າ​ທີ່​ຄວນ ແລະ ຍັງ​ມີຄວາມ​ແຕກ​ໂຕນ​ກັນ​ໃນ​ລະດັບສູງ​ທາງ​ດ້ານ​ລາຍ​ຮັບ ລະຫວ່າງປະຊາຊົນ​ໃນ​ຕົວ​ເມືອງ ແລະ ໃນຂົງເຂດ​ຊົນນະບົດ

ຄະນະ​ປະ​ເມີນ​ຜົນ​ເສດຖະກິດ ມະຫາ​ພາກ​ຂອງ​ກອງ​ທຶນ​ການເງິນ​ສາກົນ (IMF) ເຊິ່ງ​ນຳ​ໂດຍທ່ານ ແຈັບ​ຟີ້ ບັນ​ນິດ​ເຕີ້ ໄດ້​ເຂົ້າຢ້ຽມ​ຄຳນັບ​ພົບ​ປະ​ກັບ​ທ່ານ ສົມພາວ ໄຟ​ສິດ ຜູ້​ວ່າການ​ທະ​ນາຄານ ແຫ່ງ ​ສປປ ລາວ (​ທຫລ) ທີ່ ​ທຫລ ໃນ​ກາງ​ເດືອນ​ທັນວາ ຜ່ານ​ມາ​ນີ້ ເພື່ອ​ແຈ້ງ ແລະ ຮັບຟັງ​ການ​ປະ​ເມີນ​ເສດຖະກິດ​ຂອງລາວ ໂດຍ​ຄະນະ​ໄດ້​ເລີ່ມ​ເຮັດວຽກ​ຮ່ວມ​ກັບ​ເສດຖະກິດ​ມະຫາພາກ​ຂອງ​ລາວ ​ນັບ​ແຕ່​ທ້າຍ​ເດືອນພະຈິກ 2017 ເປັນຕົ້ນ​ມາ.

ທ່ານ​ຫົວໜ້າ​ຄະນະ IMF ໄດ້ກ່າວ​ວ່າ: ສຳລັບ​ຂະແໜງ​ທະ​ນາຄານ IMF ເຫັນ​ວ່າ ​ທຫລ ສາມາດ​ຮັກສາ​ສະ​ເຖຍ​ລະ​ພາບ ​ໄດ້ໃນ​ລະດັບ​ທີ່​ໝັ້ນ​ທ່ຽງ ອັດຕາ​ເງິນເຟີ້​ຢູ່​ໃນ​ລະດັບ​ຕ່ຳ ອັດຕາ​ແລກປ່ຽນ​ຢູ່​ໃນ​ຄວາມ​ສະຫງົບ ແລະ ການ​ຂະຫຍາຍຕົວ​ຂອງ​ສິນ​ເຊື່ອ ​ກໍ່ສອດຄ່ອງ​ກັບ​ຈັງຫວະ​ການ​ຂະຫຍາຍ​ຕົວ​ຂອງ​ເສດຖະກິດ​ໃນ​ລະດັບ​ດີ ແຕ່​ເຖິງ​ຢ່າງໃດ​ກໍ່​ດີ IMF ຍັງ​ໄດ້​ສະແດງ​ຄວາມ​ເປັນ​ຫ່ວງ​ຕໍ່ການ​ຂະຫຍາຍຕົວ​ຂອງ​ເສດ​ຖະກິດ​ຂອງ​ລາວ ທີ່​ເຫັນ​ວ່າຍັງ​ບໍ່​ທັນທົ່ວ​ເຖິງ​ເທົ່າ​ທີ່​ຄວນ ແລະ ຍັງ​ມີຄວາມ​ແຕກ​ໂຕນ​ກັນ​ໃນ​ລະດັບສູງ​ທາງ​ດ້ານ​ລາຍ​ຮັບ ລະຫວ່າງປະຊາຊົນ​ໃນ​ຕົວ​ເມືອງ ແລະ ໃນຂົງເຂດ​ຊົນນະບົດ ສຳລັບ​ຂະແໜງ​ການ​ທະນາຄານ ກໍ່​ຍັງ​ມີຄວາມ​ບໍ່​ເຂັ້ມແຂງ​ໃນ​ບາງ​ດ້ານ ເນື່ອງ​ຈາກ​ມີ​ການ​ນຳ​ໃຊ້​ເງິນຕາຕ່າງປະເທດ​ ໃນ​ລະບົບ​ທະ​ນາຄານ​ໃນ​ລະດັບ​ທີ່​ສູງ​ພໍ​ສົມຄວນ.

ໂອກາດ​ນີ້ ທ່ານ​ຜູ້​ວ່າການ ​ທຫລ ໄດ້​ສະແດງ​ຄວາມ​ຊົມເຊີຍຕໍ່​ຜົນສຳເລັດ​ ຂອງ​ການ​ມາ​ເຮັດວຽກ​ຂອງ​ຄະນະ​ດັ່ງກ່າວ ພ້ອມທັງ​ຕີ​ລາຄາ​ສູງ​ຕໍ່​ການ​ຮ່ວມ​ມື​ທີ່​ດີລະຫວ່າງ IMF ແລະ ສປປ ລາວ ຕະຫຼອດ​ໄລຍະ​ຜ່ານ​ມາ ໂດຍ​ຜ່ານ​ການ​ປະ​ເມີນ​ເສດ​ຖະກິດ​ມະຫາ​ພາກ​ໃນ​ແຕ່​ລະ​ຄັ້ງ ​ສປປ ລາວ ກໍ່​ໄດ້​ຮັບ​ຄຳ​ແນະນຳທີ່​ເປັນ​ປະໂຫຍດ​ເຂົ້າ​ໃນ​ການ​ພັດທະ​ນາ ແລະ ຮັກສາ​ຄວາມ​ສະເຖຍ​ລະ​ພາບ​ທາງ​ດ້ານ​ການ​ເງິນ-ເງິນຕາ ແລະ IMF ເອງ​ກໍ່​ໄດ້ ເຜີຍແຜ່​ບົດ​ລາຍ​ງານ​ຜົນ​ການປະ​ເມີນ​ດັ່ງກ່າວ ເພື່ອ​ຊ່ວຍ​ດຶງ​ດູດການ​ລົງທຶນ​ຈາກ​ຕ່າງປະເທດ ພ້ອມ​ທັງ​ໄດ້​ຮຽກຮ້ອງ​ໃຫ້ IMF ຈົ່ງ​ໃຫ້​ຄວາມ​ເຊື່ອ​ໝັ້ນ​ຕໍ່​ການ​ຊີ້ນຳ-ນຳພາ​ຂອງ​ລັດຖະບານລາວ ເວົ້າ​ລວມ ເວົ້າ​ສະເພາະ ກໍ່​ຄື ​ທຫລ ໃນ​ການ​ແກ້​ໄຂ​ບັນຫາ​ຄວາມ​ຫຍຸ້ງຍາກ​ຕ່າງໆ ແລະ ທຫລ ກໍ່​ຈະ​ສືບຕໍ່​ຢ່າງ​ຕັ້ງໜ້າ​ໃນການ​ປະກອບສ່ວນ​ຊຸກຍູ້ ໃຫ້​ຂະແໜງ​ການ​ທະນາຄານ ກໍ່​ຄືເສດຖະ​ກິດ​ຂອງ​ລາວ​ ໄດ້​ຮັບ​ການ​ພັດທະ​ນາ​ຢ່າງ​ເຂັ້ມແຂງ​ຕໍ່​ໄປ. ຂ່າວ: ນສພ ວຽງຈັນໃຫ່ມ

ປະກາດແຕ່ງຕັ້ງເພີ່ມ ເຕີມຄະນະກໍາມະການ ປກຊ- ປກສ ແຂວງຫຼວງພະບາງ

ພິທີປະກາດແຕ່ງຕັ້ງເພີ່ມ ເຕີມຄະນະກໍາມະການ ປກຊ- ປກສ ແຂວງຫຼວງພະບາງ. ໄດ້ ຈັດຂຶ້ນໃນວັນທີ 27 ທັນວາ 2017 ນີ້ ທີ່ສະໂມສອນຂອງ ກອງບັນຊາການທະຫານແຂວງ ຫຼວງພະບາງ ພາຍໃຕ້ການເປັນ ປະທານຂອງທ່ານ ພົນໂທ ສຸ ວອນ ເລືອງບຸນມີ ກໍາມະການ ສູນກາງພັກ ຮອງລັດຖະມົນຕີ ກະຊວງປ້ອງກັນປະເທດ ຫົວໜ້າ ກົມໃຫ່ຍເສນາທິການກອງທັບ. ເຂົ້າຮ່ວມໃນພິທີມີ ທ່ານ ຄຳຂັນ ຈັນທະວີສຸກ ກໍາມະການສູນກາງ ພັກ, ເລຂາພັກແຂວງ, ປະທານປກຊ-ປກສ ແຂວງເຈົ້າແຂວງ ຫຼວງພະບາງມີພັນເອກ

ບຸນເດືອງ ພັນສົດໃສ ຮອງເລຂາຄະນະພັກ ຮາກຖານ ຮອງຫົວໜ້າຫ້ອງ ການຄະນະກໍາມະການ ປກຊ- ປກສ ສູນກາງ ມີຄະນະປະຈໍາ ພັກແຂວງກໍາມະການພັກແຂວງ ຄະນະພັກ-ຄະນະບັນຊາສອງ ກໍາລັງ ປກຊ-ປກສ ແຂວງ, ພະ ແນກການທີ່ກ່ຽວຂ້ອງອ້ອມຂ້າງ ແຂວງ, ຕະຫຼອດຮອດຫົວໜ້າພະ ແນກ, ຮອງພະແນກ 5 ຫ້ອງ ອ້ອມຂ້າງເຂົ້າຮ່ວມ. ໃນພິທີ ພັນເອກ ບຸນເດືອງ ພັນສົດໃສ ຮອງຫົວໜ້າຫ້ອງການ ຄະນະກໍາມະການ ປກຊ-ປກສ ສູນກາງ. ໄດ້ຜ່ານມະຕິຕົກລົງ ຂອງເລຂາທິການສູນກາງພັກ ວ່າດ້ວຍການແຕ່ງຕັ້ງເພີ່ມເຕີມ ຄະນະກໍາມະການປ້ອງກັນຊາດ- ປ້ອງກັນຄວາມສະຫົງບແຂວງ ຫຼວງພະບາງ. ອີງໃສ່ຄວາມຮຽກ ຮ້ອງຕ້ອງການຂອງໜ້າທີ່ວຽກ ງານ ປກຊ-ປກສ ຕາມຂໍ້ກໍານົດ ຂອງກົມການເມືອງສູນກາງພັກ ສະບັບເລກທີ 02 ກມສພ, ລົງ ວັນທີ 17 ຕຸລາ 2006 ວ່າດ້ວຍວຽກງານຄຸ້ມຄອງພະນັກງານ. ຕາມໜັງສືສະເໜີຂອງຄະນະຈັດ ຕັ້ງສູນກາງພັກສະບັບເລກທີ 197 ຄຈສພ, ລົງວັນທີ່ 12 ຕຸລາ 2017. ເລຂາທິການສູນກາງພັກ ຕົກລົງມາດຕາ 1: ແຕ່ງຕັ້ງພົນ ຈັດຕະວາ ຄໍາຫຼ້າ ວົງວິໄລ ຫົວ ໜ້າການທະຫານກອງບັນຊາ ການທະຫານແຂວງຫຼວງພະ ບາງເປັນຮອງປະທານ ( ທັງ ເປັນຜູ້ປະຈໍາການ) ຄະນະກໍາມະການ ປກຊ-ປກສ ແຂວງຫຼວງ ພະບາງ.

ໃນຕອນທ້າຍພິທີຍັງ ໄດ້ຮັບຟັງການໂອ້ລົມ ແລະ ເນັ້ນ ໜັກດ້ວຍຫຼາຍບັນຫາທີ່ສໍາຄັນ ຈາກທ່ານ ພົນໂທ ສຸວອນ ເລືອງບຸນມີ ກໍາມະການສູນກາງພັກ ຮອງລັດຖະມົນຕີກະຊວງປ້ອງ ກັນປະເທດ ຫົວໜ້າກົມໃຫ່ຍເສ ນາທິການກອງທັບ ເຊິ່ງທ່ານໄດ້ ກ່າວວ່າ: ກອງທັບປະຊາຊົນ ລາວຍາມໃດກໍຮັກສາໄດ້ມູນເຊື້ອ ອັນດີງາມຮ່ວມກັບປະຊາຊົນບັນ ດາເຜົ່າຕໍ່ສູ້ປົກປັກຮັກສາ ແລະ ສ້າງສາພັດທະນາປະເທດຊາດ ຢ່າງລະອິດ, ລະອ້ຽວທໍລະຫົດ ອົດທົນ, ເພື່ອສືບຕໍ່ແບກຫາບພາ ລະກິດອັນໜັກໜ່ວງທີ່ປະເທດ ຊາດມອບໝາຍໃຫ້ນັ້ນພັກຕ້ອງ ສືບຕໍ່ປັບປຸງກ້າວຂຶ້ນດ້ວຍບາດ ກ້າວອັນໃໝ່, ທົ່ວປວງຊົນ, ທຸກ ຊັ້ນຄົນ, ທຸກຂະແໜງການຕ້ອງ ໄດ້ເຂົ້າຮ່ວມມວຽກງານ ປກຊ- ປກສ ໃນການປົກປັກຮັກສາ ແລະ ສ້າງສາພັດທະນາປະເທດ ຊາດ, ໃຫ້ຮັ່ງມີເຂັ້ມແຂງ, ສືບຕໍ່ ຍຶດໝັ້ນທິດສະດີແນວທາງຂອງ ພັກໃນໄລຍະໃໝ່. ຢູ່ບ່ອນໃດມີ ການປຸກລະດົມກໍາລັງແຮງສັງ ຮວມຢູ່ບ່ອນນັ້ນມີໄຊຊະນະ ທ່ານ ພົນໂທ ສຸວອນ ເລືອງບຸນມີ ກໍາມະການສູນກາງພັກ ຮອງລັດ ຖະມົນຕີກະຊວງປ້ອງກັນປະ ເທດ ຫົວໜ້າກົມໃຫ່ຍເສນາທິ ການກອງທັບຍັງໄດ້ເນັ້ນຕື່ມວ່າ: ການປຸກລະດົມສັງຮວມແມ່ນ ຄວາມຮັບຜິດຊອບຂອງຄະນະ ພັກທຸກຂັ້ນ ໂດຍສະເພາະແມ່ນ ປະທານ ປກຊ-ປກສ ແຂວງ ຕ້ອງມີການນໍາພາເດັດຂາດ, ໂດຍກົງຮອບດ້ານ, ຕ້ອງມີ ຄວາມໜັກແໜ້ນດ້ານການຈັດ ຕັ້ງ, ເຂັ້ມແຂງດ້ານການປະຕິ ບັດ, ສ້າງກໍາລັງທ້ອງຖິ່ນໃຫ້ເຂັ້ມ ແຂງສາມາດປົກປັກຮັກສາທ້ອງ ຖິ່ນໃຫ້ມີຄວາມສະຫົງບ ແລະ ໜັກແໜ້ນ, ຄະນະພັກ-ຄະນະບັນ ຊາແຕ່ລະຂັ້ນຕ້ອງກໍາແໜ້ນ ແລະ ປະຕິບັດໃຫ້ໄດ້ຕາມ 4 ເນື້ອໃນ, 4 ຄາດໝາຍ, ສືບຕໍ່ໃຫ້ການປຸກ ລະດົມຊຸກຍູ້ແນວຄິດ, ຈິດໃຈ ຂອງບັນດາພະນັກງານ-ນັກຮົບ ທີ່ເຄື່ອນໄຫວປະຕິບັດໜ້າທີ່ວຽກ ງານຢູ່ເຂດທຸລະກັນດານຫ່າງໄກ ສອກຫຼີກເພື່ອເຮັດໃຫ້ສໍາເລັດໜ້າ ທີ່ວຽກງານທີ່ການຈັດຕັ້ງຂັ້ນ ເທິງມອບໝາຍໃຫ້.

ພາບ: ສົມພອນ
ຂໍ້ມູນ: ໄຊຍະສອນ

ກະຊວງການຄ້າ ອອກຄຳສັ່ງຫ້າມຂຶ້ນລາຄາສິນຄ້າໃນໄລຍະປີໃໝ່ສາກົນ.

ອີງຕາມຄຳສັ່ງຂອງລັດຖະມົນຕີ ກະຊວງອຸດສາຫະກຳ ແລະ ການຄ້າ (ອຄ) ເລກທີ 2072/ອຄ.ກຄພນ ລົງວັນທີ 22 ທັນວາ 2017 ເລື່ອງໃຫ້ເອົາໃຈໃສ່ຕິດຕາມ, ກວດກາ ແລະ ຄຸ້ມຄອງລາຄາສິນຄ້າພາຍໃນແຂວງຂອງຕົນ ເພື່ອບໍ່ໃຫ້ສວຍໂອກາດກັກຕຸນສິນຄ້າໃນວັນບຸນສຳຄັນ ແລະ ເທດສະການໆປະຈຳປີ 2018 ເຊິ່ງຄຳສັ່ງດັ່ງກ່າວມີດັ່ງນີ້:
1. ໃຫ້ພະແນກ ອຄ ແຂວງ, ນະຄອນຫຼວງ ເປັນເຈົ້າການປະສານສົມທົບກັບຂະແໜງການກ່ຽວຂ້ອງພາຍໃນແຂວງ, ເອົາໃຈໃສ່ຄຸ້ມຄອງ ແລະ ຕິດຕາມສະພາບການເໜັງຕີງຂອງລາຄາສິນຄ້າຕົ້ນຕໍໃນທ້ອງຕະຫຼາດຢ່າງເປັນປົກກະຕິ, ໂດຍສະເພາະແມ່ນສິນຄ້າທີ່ມີຜົນກະທົບໄວຕໍ່ຊີວິດ ການເປັນຢູ່ຂອງປະຊາຊົນ ບໍ່ໃຫ້ມີການສວຍໂອກາດຂຶ້ນລາຄາຕາມລຳພັງໃຈ.


2. ເອົາໃຈໃສ່ຄຸ້ມຄອງ, ຕິດຕາມສິນຄ້າສະບຽງອາຫານປະເພດເຂົ້າກິນ, ຊີ້ນ (ໝູ,ງົວ, ຄວາຍ, ໄກ່, ປາ) ແລະ ພືດຜັກຕ່າງໆ ຢູ່ພາຍໃນແຂວງຂອງຕົນໃຫ້ເປັນໄປຕາມກົນໄກຕະຫຼາດໃນແຕ່ລະໄລຍະບົນພື້ນຖານ ດຳລັດ 474/ນຍ ແລະ ຕາມລະບຽບການກ່ຽວຂ້ອງ ແລະ ໃຫ້ຄິດໄລ່ໂຄງປະກອບລາຄາໃນແຕ່ລະຂອດ ຢ່າງຊັດເຈນ (ຂອດຕົ້ນທຶນການຜະລິດ, ຂາຍຍົກ ແລະ ຂາຍຍ່ອຍ).
– ສະເພາະສິນຄ້າປະເພດເຂົ້າກິນ ແມ່ນໃຫ້ເອົາໃຈໃສ່ຄຸ້ມຄອງຂອດເກັບຊື້ຈາກຊາວນາ, ຂອດໂຮງສີ, ຂອດຂາຍຍົກ ແລະ ຂາຍຍ່ອຍຕາມທ້ອງຕະຫຼາດ.
– ສະເພາະສິນຄ້າປະເພດຊີ້ນ, ປາ ແມ່ນໃຫ້ເອົາໃຈໃສ່ຄຸ້ມຄອງຂອດລ້ຽງ, ຂອດນາຍຮ້ອຍ (ຂາຍຍົກ) ແລະ ຂອດລູກຂຽງ (ຂາຍຍ່ອຍ).
– ສ່ວນປະເພດພືດຜັກ ແລະ ສະບຽງອາຫານຕ່າງໆ ແມ່ນໃຫ້ເອົາໃຈໃສ່ຄຸ້ມຄອງ ແລະ ຕິດຕາມຂອດເກັບຊື້ຈາກຊາວກະສິກອນ ແລະ ຂອດຂາຍຍ່ອຍ ເພື່ອຫຼີກເວັ້ນການສວຍໂອກາດຂຶ້ນລາຄາ.


3. ເປັນເຈົ້າການໃນການຕິດຕາມ, ກວດກາ, ຄຸ້ມຄອງຢ່າງເປັນປະຈຳ ໃນທ້ອງຕະຫຼາດຫຼັກໆ ພາຍໃນທ້ອງຖິ່ນຂອງຕົນດ້ວຍການແຕ່ງຕັ້ງພະນັກງານໝູນວຽນກັນລົງສົມທົບກັບຫ້ອງການ ອຸດສາຫະກຳ ແລະ ການຄ້າເມືອງ ແລະ ຄະນະຄຸ້ມຄອງຈັດສັນຕະຫຼາດ ເພື່ອພ້ອມກັນຈັດຕັ້ງປະຕິບັດ.
4. ໃຫ້ປະສານສົມທົບ ເພື່ອຂໍຄວາມຮ່ວມມືຈາກຜູ້ປະກອບການເຊັ່ນ: ຜູ້ຜະລິດ, ຜູ້ນຳເຂົ້າ, ຜູ້ສົ່ງອອກ ແລະ ຜູ້ຈຳໜ່າຍບໍ່ໃຫ້ສວຍໂອກາດຂຶ້ນລາຄາສິນຄ້າໃນຊ່ວງເທດສະການ ແລະ ງານບຸນສຳຄັນຕ່າງໆປະຈຳປີ 2018 (ບຸນປີໃໝ່ສາກົນ, ປີໃໝ່ຂອງປະເທດເພື່ອນບ້ານ, ບຸນປີໃໝ່ລາວ).
ນອກຈາກນັ້ນ, ລັດຍັງປະກາດປັບຫຼຸດລາຄາຂາຍຊີ້ນໝູຈາກ 35,000 ກີບຕໍ່ກິໂລ ໃຫ້ເຫຼືອ 33,000 ກິີບຕໍ່ກິໂລ ຖ້າຫາກພົບເຫັນຂາຍເກີນໃຫ້ແຈ້ງເຈົ້າໜ້າທີ່ການຄ້າ ເຊິ່ງຈັດຕັ້ງປະຕິບັດ ໃນ 9 ຕົວເມືອງ ໃນນະຄອນຫຼວງວຽງຈັນ ແຈ້ງການເລກທີ 2199/ອຄ.ນວ.ຄພນ ລົງວັນທີ 31 ສິງຫາ 2017 ເລື່ອງ ກຳນົດລາຄາຂາຍົກ – ຂາຍຍ່ອຍຊີ້ນໝູ ເພື່ອແນໃສ່ຊຸກຍູ້ສົ່ງເສີມ ຜູ້ດໍາເນີນທຸລະກິດການຜະລິດ, ຜູ້ຊື້, ຜູ້ຂາຍ ແລະ ເປັນການປົກປ້ອງສິດຜົນປະໂຫຍດຜູ້ຊົມໃຊ້ໃຫ້ມີຄວາມຍຸຕິທຳບົນຟື້ນຖານກົນໄກການຕະຫຼາດ ຫຼີກລຽງການເອົາລັດເອົາປຽບລະຫວ່າງຜູ້ຊື້ ແລະ ຜູ້ຂາຍ ທັງຮັບປະກັນໃຫ້ສັງຄົມມີຄວາມສະຫງົບ.
ສຳລັບນະຄອນຫຼວງວຽງຈັນ ທ່ານຫົວໜ້າພະແນກອຸດສາຫະກຳ ແລະ ການຄ້ານະຄອນຫຼວງ ຈຶ່ງອອກແຈ້ງການຄື:
5. ລາຄາໝູໜ້າຟາມ ຊື້ – ຂາຍ ລາຄາສູງສຸດບໍ່ເກີນ 18,000 ກີບຕໍ່ກິໂລ.
6. ລາຄາຂາຍຍົກໝູ ທີ່ໄດ້ຂ້າຄົວ ແລະ ຊໍາແຫຼະເປັນຊີ້ນລວມ ລາຄາສູງສຸດບໍ່ເກີນ 21,000 ກີບຕໍ່ກິໂລ, ລາຄານີ້ແມ່ນລາຄານາຍຮ້ອຍສົ່ງໃຫ້ລູກຂຽງຮອດຕະຫຼາດ.
7. ລາຄາຂາຍຍ່ອຍຂອງລູກຂຽງໃຫ້ຜູ້ບໍລິໂພກຢູ່ຕະຫຼາດມີດັ່ງນີ້:
– ຊີ້ນໝູ ປະເພດ 1 (ຊີ້ນກ້ອນ, ດູກຂ້າງ, ຊີ້ນສາມຊັ້ນ) ຂາຍສູງສຸດ 33,000 ກີບຕໍ່ກິໂລ
– ຊີ້ນໝູ ປະເພດ 2 ສູງສຸດບໍ່ເກີນ 30,000 ກີບຕໍ່ກິໂລ.

ທີ່ມາ: ເສດຖະກິດ-ສັງຄົມ

ປີ 2017 ເສດຖະກິດແຂວງ ຈຳປາສັກຂະຫຍາຍຕົວກວ່າ 8%

ນັບວ່າເປັນຄວາມພາກ ພູມໃຈ. ໃນປີ 2017 ນີ້ເສດຖະ ກິດ ແຂວງຈຳປາສັກຂະຫຍາຍ ຕົວຫລາຍກວ່າ 8%, ສະເລ່ຍ ລາຍຮັບຂອງພົນລະເມືອງ ເພີ່ມ ຂຶ້ນສູງເຖິງ 2.220 ໂດລາສະ ຫະລັດຕໍ່ຄົນຕໍ່ປີ ແລະ ໃນສົກ ປີ 2015-2016 ເຖິງວ່າການ ຈັດເກັບລາຍຮັບເຂົ້າງົບປະມານ ຈະມີຄວາມຫຍຸ້ງຍາກຢູ່ບໍ່ໜ້ອຍ ແຕ່ກໍສາມາດຈັດຕັ້ງປະຕິບັດໄດ້ ຫລາຍກວ່າ 1.200 ຕື້ກີບເທົາ ກັບ 81% ຂອງຕົວເລກແຜນ ການ ແລະ ສະເພາະ 5 ເດືອນ ຕົ້ນປີ 2017 ນີ້ ສາມາດປະຕິ ບັດໄດ້ແລ້ວຫລາຍກວ່າ 520 ຕື້ ກີບເທົ່າກັບ 38% ຂອງແຜນ ການປີ. ເຊິ່ງຕົວເລກດັ່ງກ່າວ ໄດ້ຮັບການເປີດເຜີຍ ຈາກຄະ ນະປົກຄອງແຂວງ ດັ່ງກ່າວ ເມື່ອມໍ່ໆມານີ້.

ທ່ານ ເຈົ້າແຂວງໃຫ້ຮູ້ວ່າ: ຄຽງຄູ່ກັບການເອົາໃຈໃສ່ວຽກ ງານພັດທະນາເສດຖະກິດ ຂອງແຂວງໃຫ້ເຕີບໃຫຍ່ຂະ ຫຍາຍຕົວແລ້ວ, ແຂວງຍັງໄດ້ ສຸມໃສ່ແກ້ໄຂຄວາມທຸກຍາກ ຂອງປະຊາຊົນຢ່າງມີຜົນສຳ ເລັດ, ເຊິ່ງມາຮອດປັດຈຸບັນທົ່ວ ແຂວງຍັງມີຄອບຄົວທຸກຍາກ ເຫລືອຢູ່ພຽງ 743 ຄອບຄົວ, ເທົ່າກັບ 0,6% ແລະ ສາມາດ ລຶບລ້າງເມືອງທຸກຍາກໄດ້ 100%, ດ້ວຍການສົ່ງເສີມໃຫ້ ເຂົາເຈົ້າມີຄວາມຕັ້ງໜ້າເຂົ້າສູ່ ການຜະລິດຄື: ການປູກເຂົ້ານາ ປີໃນປີນີ້ບັນລຸໄດ້ຫລາຍກວ່າ 150.000 ເຮັກຕາ, ສ່ວນ ການປູກພືດເປັນສິນຄ້າບັນລຸ ໄດ້ ເກືອບ 40.000 ເຮັກຕາ, ໂດຍສະເພາະແມ່ນພືດຜັກ ແລະ ໄມ້ໃຫ້ໝາກ ແລະ ພົ້ນ ເດັ່ນກວ່າໝູ່ແມ່ນຂະບວນການ ປູກກາເຟລວມມີເນື້ອທີ່ຫລາຍ ກວ່າ 50.000 ເຮັກຕາຄືໃນ 5 ເດືອນຕົ້ນປີນີ້ຈຳປາສັກສາ ມາດສົ່ງອອກກາເຟມີມູນຄ່າ ສູງເຖິງ 61 ລ້ານກວ່າໂດລາ ສະຫະລັດທຽບໃສ່ໄລຍະດຽວ ກັນຂອງປີຜ່ານມາເພີ່ມຂຶ້ນ 19%.

ຊີ້ນໍາໃຫ້ບັນດາດ່ານເຂົ້າ-ອອກ ແຂວງໄຊຍະບູລີ ເອົາໃຈໃສ່ກວດກາລົດບັນທຸກສິນຄ້າຢ່າງເຂັ້ມງວດ

ທ່ານ ປອ ນາງ ສຸວັນເພັງ ບຸບຜານຸວົງ ລັດຖະມົນຕີປະຈໍາສໍານັກງານນາຍົກລັດຖະມົນຕີ (ລມຕ ປະຈໍາ ສນຍ) ໄດ້ເນັ້ນໃຫ້ບັນດາດ່ານສາກົນທາງບົກ, ດ່ານທ້ອງຖິ່ນ ແລະ ດ່ານປະເພນີຢູ່ແຂວງໄຊຍະບູລີ ເອົາໃຈໃສ່ເກັບກໍາຂໍ້ມູນ ແລະ ກວດກາບັນດາລົດບັນທຸກ, ບຸກຄົນທີ່ເດີນທາງເຂົ້າ-ອອກຜ່ານດ່ານຕ່າງໆພາຍໃນແຂວງຢ່າງເຂັ້ມງວດ ເພື່ອສະກັດກັ້ນການລັກລອບນໍາເອົາສິ່ງຂອງຜິດກົດໝາຍເຂົ້າ-ອອກປະເທດ ແລະ ກວດຄົ້ນບັນດາລົດບັນທຸກສິນຄ້າຕ່າງໆ ເພື່ອຊອກຫາວັດຖຸສິ່ງຂອງຕ້ອງຫ້າມຕ່າງໆທີ່ຊຸກເຊື່ອງມານໍາລົດບັນທຸກສິນຄ້າ.

ໃນພິທີ, ທ່ານ ປອ ນາງ ສຸວັນເພັງ ບຸບຜານຸວົງ ກ່າວວ່າ: ໂດຍປະຕິບັດຕາມມະຕິກອງປະຊຸມລັດຖະບານສະໄໝສາມັນ ປະຈຳເດືອນຕຸລາ 2017 ກ່ຽວກັບທິດທາງການແກ້ໄຂບັນຫາການຂົນສົ່ງທາງບົກ ແລະ ດ່ານສາກົນພາຍໃນປະເທດ ເພື່ອອຳນວຍຄວາມສະດວກໃຫ້ແກ່ການຂົນສົ່ງ ຈຶ່ງໄດ້ສືບຕໍ່ເຄື່ອນໄຫວເກັບກຳຂໍ້ມູນຢູ່ບັນດາດ່ານສາກົນທາງບົກ, ດ່ານທ້ອງຖິ່ນ ແລະ ດ່ານປະເພນີຢູ່ແຂວງໄຊຍະບູລີ ເປັນຕົ້ນແມ່ນ: ດ່ານສາກົນນໍ້າເງິນ, ດ່ານສາກົນປາກມອນ, ດ່ານສາກົນນໍ້າເຫືອງ ແລະ ດ່ານສາກົນພູດູ່; ສະນັ້ນ, ໃນຕໍ່ໜ້າບັນດາດ່ານພາຍໃນແຂວງໄຊຍະບູລີ ຈົ່ງພ້ອມກັນເອົາໃຈໃສ່ເກັບກໍາຂໍ້ມູນ ແລະ ກວດກາບັນດາບຸກຄົນ, ກຸ່ມຄົນ, ລົດບັນທຸກ-ລົດໂດຍສານທຸກຄັນທີ່ເດີນທາງຜ່ານແຕ່ລະດ່ານຂອງແຂວງຢ່າງເຂັ້ມງວດ ເພື່ອຊອກຫາສິ່ງຂອງຕ້ອງຫ້າມ ເປັນຕົ້ນແມ່ນ: ຢາເສບຕິດ, ອາວຸດເສິກ, ໄມ້ທຸກຊະນິດ, ສັດຕ້ອງຫ້າມ, ເຄື່ອງຂອງໜີພາສີ ແລະອື່ນໆ; ເກັບກໍາ
ແລະ ກວດກາບຸກຄົນທີ່ລັດຖະບານສັ່ງຫ້າມ ຫຼື ຂຶ້ນບັນຊີຫ້າມເຂົ້າ-ອອກນອກປະເທດ ໃຫ້ໄດ້ຕາມເປົ້າໝາຍ, ບໍ່ໃຫ້ບຸກຄົນເຫຼົ່ານັ້ນຫຼຸດລອດເຂົ້າ-ອອກດ່ານໄດ້ແບບງ່າຍດາຍ ເພື່ອນໍາເອົາຕົວບຸກຄົນເຫຼົ່ານັ້ນມາລົງໂທດຕາມກົດໝາຍ; ນອກຈາກນີ້, ບັນດາສະຫາຍຕ້ອງເພີ່ມທະວີໃນການປ້ອງກັນບັນດາດ່ານຕ່າງໆພາຍໃນແຂວງ ເພື່ອຮັບມືກັບປະກົດການຫຍໍ້ທໍ້ຕ່າງໆທີ່ຈະເກີດຂຶ້ນຢູ່ພາຍໃນດ່ານ ສາມາດຮັບມື ແລະ ແກ້ໄຂໄດ້ຢ່າງທັນການ; ຖ້າບັນດາສະຫາຍຢາກເຮັດໄດ້ຄືແນວນີ້, ບັນດາສະຫາຍຄະນະພັກ-ຄະນະບັນຊາ ຕ້ອງເພີ່ມທະວີໃນການລົງໃກ້ຊິດຕິດແທດກັບພະນັກງານ-ນັກຮົບຢ່າງເປັນປົກກະຕິ, ນໍາພາອ້າຍນ້ອງເຮັດໜ້າທີ່ຢ່າງເປັນລະບົບ, ມີຄວາມລະອຽດໃນການເຊັກຂໍ້ມູນຂອງບຸກຄົນ, ລົດເຂົ້າ-ອອກຜ່ານດ່ານ ເພື່ອພ້ອມກັນສະກັດກັ້ນບຸກຄົນ ແລະ ກຸ່ມຄົນບໍ່ດີທີ່ຈະສວຍໃຊ້ຊ່ອງວ່າງຕ່າງໆນໍາເອົາຄວາມບໍ່ສະຫງົບເຂົ້າມາໃນປະເທດ.

ການຊີ້ນຳໃນຄັ້ງນີ້, ມີຂຶ້ນໃນວັນທີ 14-15 ທັນວາ 2017, ເພື່ອເກັບກຳກ່ຽວກັບສະພາບການຈັດຕັ້ງ ແລະ ການເຄື່ອນໄຫວຂອງບັນດາດ່ານສາກົນ, ດ່ານທ້ອງຖິ່ນ ແລະ ດ່ານປະເພນີພາຍໃນແຂວງ ເປັນຕົ້ນແມ່ນ: ໂຄງປະກອບກົງຈັກການຈັດຕັ້ງ, ສິດ, ພາລະບົດບາດ ແລະ ໜ້າທີ່ຮັບຜິດຊອບຂອງພະນັກງານແຕ່ລະຂະແໜງການທີ່ປະຈຳຢູ່ດ່ານ; ກົນໄກການຄຸ້ມຄອງ ແລະ ຂອດປະສານງານຂອງບັນດາຂະແໜງການທີ່ປະຈຳຢູ່ດ່ານ; ບັນຫາງົບປະມານບໍລິຫານດ່ານ; ໂຄງສ້າງພື້ນຖານໂຄງລ່າງທີ່ເປັນສິ່ງເອື້ອອຳນວຍໃນການຄຸ້ມຄອງບໍລິຫານດ່ານ; ຂໍ້ສະດວກ, ຂໍ້ຫຍຸ້ງຍາກໃນຂອດການຈັດຕັ້ງປະຕິບັດວຽກງານໃນໄລຍະຜ່ານມາ, ວິທີແກ້ໄຂໃນຕໍ່ໜ້າ ແລະ ບັນຫາອື່ນໆ.

© LSecurityNews

10 ເຫດການຄາດຕະກຳສະເທືອນຂວັນປີ 2017

ນສພ ຄວາມສະຫງົບ ລາຍງານວ່າ: ປີ 2017 ທົ່ວປະເທດມີສະພາບປະກົດການຫຍໍ້ທໍ້ຕ່າງໆເກີດຂຶ້ນຢ່າງຫຼວງຫຼາຍ ເປັນຕົ້ນແມ່ນສະພາບປຸ້ນຈີ້ຊິງຊັບ, ລັກຊັບ, ຂ້າເຈົ້າເອົາຂອງ. ໃນນັ້ນ, ກໍມີຄະດີຄາດຕະກຳເກີດຂຶ້ນຫຼາຍລາຍ ອັນໄດ້ສ້າງຄວາມບໍ່ສະຫງົບ, ຄວາມບໍ່ ເປັນລະບຽບຮຽບຮ້ອຍໃຫ້ແກ່ສັງຄົມ. ພ້ອມກັນນັ້ນ ກໍໄດ້ສ້າງຄວາມສູນເສຍໃຫ້ແກ່ຊີວິດ ແລະ ຊັບສີນເປັນຈຳນວນ ບໍ່ໜ້ອຍ. ເຊິ່ງໃນນີ້, ໜັງສືພີມຄວາມສະຫງົບ ໄດ້ນໍາສະເໜີ 10 ເຫດການ ຄະດີຄາດຕະກຳທີ່ສະເທື່ອນຂວັນໃນສັງ ຄົມເພື່ອເປັນອຸທາຫອນສອນໃຈໃຫ້ແກ່ຫຼາຍຄົນ ຈະເຮັດຫຍັງລົງໄປ ຄວນຄິດໄຕຕອງໃຫ້ດີກ່ອນຈະເສຍໃຈຕາມຫຼັງ ດັ່ງຄະດີດັ່ງລຸ່ມນີ້.

10. ຖາມໜີ້ບໍ່ໄດ້ ໃຊ້ມີດແທງຈົນເສຍຊີຊີວິດ. ເຫດການເກີດຂຶ້ນໃນກາງເດືອນ ມັງກອນ 2017 ຜູ້ກໍ່ເຫດ ຊື່ທ້າວ ແສງທະວີ ຫຼື ຊ້າງ ອາຍຸ 26 ປີ ຢູ່ບ້ານໂພນຕ້ອງ ເມືອງໄຊທານີ ນະຄອນຫຼວງວຽງຈັນ ຍ້ອນຜິດຖຽງກັນເລື່ອງໜີ້ສິນ 300.000 ກີບ ເພາະວ່າທັງສອງແມ່ນໄດ້ພົວພັນກັບຢາເສບຕິດມາຕະຫຼອດ ແລະ ເຄີຍຜິດຖຽງກັນຈົນເຖິງລົງໄມ້ ລົງມືຕົບຕີກັນເປັນປະຈຳ, ສືບເນື່ອງມາຈາກຜູ້ເສຍຊີວິດ ໄດ້ຢືມເງິນນໍາທ້າວ ຊ້າງ ຈຳນວນ 300.000 ກີບ ແຕ່ບໍ່ສົ່ງຄືນ. ມື້ເກີດເຫດ ທັງສອງໄດ້ຜິດຖຽງກັນ ໂດຍທ້າວ ນະ ໄດ້ລົງມືຕີທ້າວ ຊ້າງ ກ່ອນຈຳນວນຫຼາຍບາດ ຈຶ່ງເຮັດໃຫ້ທ້າວ ຊ້າງ ອົດບໍ່ໄຫວນຳເອົາມິດທີ່ພົບຕິດຕົວມານໍານັ້ນ ແທງໃສ່ກ້ອງຂີ້ເຮ້ ເບື້ອງຊ້າຍ ທ້າວ ນະ ຈົນເສຍຊີວິດ.


9. ຄາດຕະກຳຢູ່ກ້ອງລາງຮ້ານເສີມສວຍ ບ້ານ ໂພນທອງ. ເຫດການເກີດໃນວັນທີ 8 ພະຈິກ 2017 ຜູ້ເສຍຊີວິດຊື່ ທ້າວ ກົງ ອາຍຸ 55 ປີ ແລະ ນາງ ງ່າຍ ອາຍຸ 42 ປີ ທັງສອງຄົນ ຢູ່ບ້ານໂພນທອງ ເມືອງໂພນທອງ ແຂວງຈຳປາສັກ, ເຊິ່ງ ທ້າວ ກົງ ແມ່ນຖືກຂອງມີດແທງ 2 ບາດ ເຂົ້າບໍລິເວນໜ້າທ້ອງ 1 ບາດ ແລະ ສ້ວງຂ້າງຊ້າຍ 1 ບາດ ແລະ ນາງ ງ່າຍ ແມ່ນຖືກຂອງມີດແທງ 3 ບາດ ເຂົ້າບໍລິເວນໜ້າເອິກ ໂດຍທັງສອງລັກຄົບຫາກັນແບບບ່າວສາວ ທັງໆທີ່ ຕ່າງຄົນຕ່າງມີຄອບຄົວແລ້ວ.


8. ຄະດີໄວລຸ້ນຕີກັນຈົນເສຍຊີວິດ ຢູ່ຮ້ານສະນຸກເກີ່. ຜູ້ກໍ່ເຫດ ຊື່ທ້າວ ເຢີມົວ ອາຍຸ 22 ປີ ຢູ່ບ້ານຢອນ, ທ້າວ ກໍລີ ອາຍຸ 21 ປີ ຢູ່ບ້ານໂພນມີ ໄຊ, ທ້າວ ເຢັ່ງວື່ ອາຍຸ 24 ປີ ຢູ່ບ້ານໂພນສະຫວ່າງ, ທ້າວ ຈາຢ່າງ ອາຍຸ 17 ປີ ຢູ່ບ້ານ ໂພນງາມໃຕ້ ແລະ ທ້າວ ເຕັງມົວ ອາຍຸ 20 ປີ ຢູ່ບ້ານໂພນງາມເໜືອ ທັງ 5 ຄົນ ແມ່ນຢູ່ເມືອງແປກ ແຂວງຊຽງ ຂວາງ ກໍ່ເຫດອາລະວາດຕີທ້າວ ບຸນຜອງ ອາຍຸ 21 ປີ ຢູ່ບ້ານໂພນງານໄຕ້ ເມືອງແປກ ແຂວງຊຽງຂວາງ ຢູ່ຮ້ານສະ ນຸກເກີ່ ບ້ານໂພນສະຫວັນໄຊ ເມືອງແປກ ໃນວັນທີ 31 ເດືອນພຶດສະພາ 2017 ຈົນເສຍຊີວິດ ຍ້ອນມີຄວາມ ແຄ້ນມາດົນນານ ເຊິ່ງຜ່ານມາພວກກ່ຽວເຄີຍມີການຜິດຖຽງກັນຢູ່ຮ້ານສະນຸກເກີ່ ແລະ ໄດ້ລົງມືຕີກັນມາແລ້ວ 2 ຄັ້ງ.


7. ໃຊ້ພ້າຟັນເມຍ ຈົນເສຍຊີວິດ ອ້າງວ່າມີຊູ້. ຜົວຊື່ທ້າວ ນິດ ອາຍຸ 25 ປີ ລົງມືຄາດຕະກຳເມຍຊື່ນາງ ນັດ ອາຍຸ 22 ປີ ຢູ່ບ້ານນາໂພ ເມືອງປາກລາຍ ແຂວງ ໄຊຍະບູລີ ໃນວັນທີ 26 ເມສາ 2017 ພາຍຫຼັງສ້າງຄອບຄົວກັບນາງ ນັດ ແຕ່ປີ 2013 ອາໃສຢູ່ນໍາພໍ່ເຖົ້າ-ແມ່ເຖົ້າ ທີ່ບ້ານນາໂພ ເມືອງປາກລາຍ ມີລູກນຳກັນ 1 ຄົນ. ປີ 2017 ຜົວລະແວງ ສົງໄສເມຍຫຼິ້ນຊູ້ ຈຶ່ງເກີດຄວາມຫຶງຫວງເມຍ ແລະ ລົງມືຄາດຕະກຳເມຍ ແລ້ວຫຼົບໜີໄປເມືອງຄຳເກີດ ແຂວງບໍລິ ຄຳໄຊ ແລະ ຈຶງຖືກກັກຕົວ.


6. ຄະດີຍິງຕໍາຫຼວດ ອ້າງວ່າບໍ່ພໍໃຈນໍາໄປບໍາບັດຢາເສບຕິດ: ທ້າວ ຄຳຫຼ້າ ອາຍຸ 42 ປີຢູ່ບ້ານວົງໄຊ ເມືອງໄຊ ແຂວງ ອຸດົມໄຊ ສາລະພາບເປັນຜູ້ລົງມືຄາດຕະກຳຕຳຫຼວດຊື່ ທ້າວ ວິໄຊເຮີ ອາຍຸ 52 ປີ ຊັ້ນພັນຕີ ເຊິ່ງເປັນພີ້ນ້ອງດຽວກັນ ໂດຍອ້າງວ່າ ບໍ່ພໍໃຈທີ່ຜູ້ຕາຍນຳຕົວໄປບຳບັດຢາເສບຕິດ 2 ຄັ້ງ, ໃນມືກໍເຫດວັນທີ 5 ພຶດສະພາ ແມ່ນຂີ່ລົດວີໂກ ສີປອນທອງ ໝາຍເລກທະບຽນອຸດົມໄຊ ກກ 0655 ໄປເຮືອນຜູ້ຕາຍ 2017 ເມື່ອໄປຮອດໄດ້ລໍ່ຖ້າຜູ້ຕາຍອອກມາ ອັດປະຕູ້ເຮືອນຈຶ່ງໃຊ້ປືນກາບິີນບັນຈຸລູກໃສ່ 4 ລູກ ຍິງໃສ່ຜູ້ຕາຍ 1 ນັດ ເຂົ້າທີ່ບໍລິເວນຫົວ ແລ້ວຂັບລົດໄປບ້ານ ຫ້ວຍຫຍຳ ນຳປືນເຊື່ອງໄວ້ ຈຶ່ງຖືກເຈົ້າໜ້າທີ່ກັກຕົວ.

5. ຄົນຮ້າຍໃຊ້ປືນຍິງເຈົ້າຂອງສູນການຄ້າ ສີໄຄພຣາຊາ. ເຫດເກີດຂຶ້ນໃນເວລາ 9:27 ໂມງ ວັນທີ 7 ຕຸລາ 2017 ທ້າວ ຊູຫວັງທຽນ ອາຍຸ 60 ປີ ນັກທຸລະກິດ ເຊື້ອຊາດຈີນ, ສັນຊາດລາວ ເປັນເຈົ້າຂອງສູນການຄ້າ ສີໄຄພຣາຊາ ຢູ່ ບ້ານນາແຮ່ ເມືອງສີໂຄດຕະບອງ ນະຄອນຫຼວງວຽງຈັນ ໄດ້ຂັບລົດເລັກຊັດ ສີດຳ ປ້າຍທະບຽນ ກຕ 6289 ກຳແພງ ນະຄອນ ເຂົ້າໄປຈອດຢູ່ດ້ານຫຼັງຂອງສູນການຄ້າ. ຈາກນັ້ນ, ຜູ້ເສຍຊີວິດລົງຈາກລົດດັ່ງກ່າວ ແລ້ວໄປໄຂປະຕູທ້າຍ ລົດ. ໃນຂະນະນັ້ນ, ໄດ້ມີຄົນຮ້າຍ ຈຳນວນ 2 ຄົນ ເປັນເພດຊາຍ ຂີ້ລົດຈັກໂຄລາວສີຂາວ-ແດງ ບໍ່ມີປ້າຍທະບຽນ ນຸ່ງເສື້ອສີດໍາ ໃສ່ໝວກກັນກະທົບສີດໍາ ທັງສອງຂັບຂີ່ເຂົ້າມາທາງຂ້າງຜູ້ເສຍຊີວິດ ແລ້ວຜູ້ຊ້ອນທ້າຍຈົກປຶນສັ້ນ ບໍ່ຊາບຊະນິດ ຍິງໃສ່ໄລຍະໃກ້ຊິດ ປະມານ 8-9 ລູກ ແລ້ວຂີ່ລົດຈັກໜີໄປ ສ່ວນສາເຫດແມ່ນເກີດຈາກການຂັດ ແຍ່ງຜົນປະໂຫຍດດ້ານທຸລະກິດ.

4. ຮັກທີ່ມີສອງທາງ ເປັນເຫດຄາດຕະກໍາແຟນໃໝ່ໂດຍບໍ່ຕັ້ງໃຈ ຄະດີດັ່ງກ່າວນີ້: ຜູ້ຖືກຫາຊື່ນາງ ອ້ອມໃຈ ອາຍຸ 19 ປີ ທີ່ມາສຶກສາມະຫາວິທະຍາໄລແຫ່ງໜຶ່ງໃນນະຄອນຫຼງວຽງຈັນ ທີ່ໄດ້ຮ່ວມກັບແຟນເກົ່າຊື່ທ້າວ ພັດສາຄອນ ອາຍຸ 24 ປີ ພັກເຊົ້າຢູ່ບ້ານຊຽງດາ ເມືອງໄຊເຊດຖາ ນະຄອນຫຼວງວຽງຈັນ ຄາດຕະກຳທ້າວ ໃຫຍ່ ແຟນໃໝ່. ຄະ ດີມີຢູ່ວ່າ: ໃນວັນທີ 9 ເມສາ 2017 ທ້າວ ໃຫຍ່ ໄດ້ຊັກຊວນນາງ ອ້ອມໃຈ ອອກໄປຫຼີ້ນຕາມພາສາບ່າວສາວ ແຕ່ ນາງອ້ອມໃຈປະຕິເສດ ແລ້ວບອກໃຫ້ທ້າວ ໍເພັດສາຄອນ (ແຟນເກົ່າ) ໄປຮັບຢູ່ຫໍພັກ ພາກັນມາຢູ່ຫ້ອງແຖວແຟນ ເກົ່າເຂດບ້ານຊຽງດາ ເມືອງໄຊເສດຖາ.


ຈາກນັ້ນ, ທ້າວ ໃຫຍ່ ໄດ້ໂທລະສັບໃຊ້ຄຳເວົ້າຂົ່ມຂູ່ຫຼາຍຢ່າງຕໍ່ນາງ ອ້ອມໃຈ, ທ້າວ ເພັດສາຄອນ ຈຶ່ງບອກໃຫ້ ທ້າວ ໃຫຍ່ ມາຫາຢູ່ຫ້ອງແຖວ ແລ້ວໄດ້ມີການຜິດຖຽງກັນ ພ້ອມທັງລົງມືຕີກັນຈົນ ເສຍຊີວິດ ແລ້ວເອົາຮ່າງທ້າວໃຫຍ່ ໃສ່ລົດຕູສະຕາແລ໋ກ ສີປອນ ທະບຽບ ກລ 1133 ກໍາແພງນະຄອນ ທີ່ທ້າວ ໃຫຍ່ ຂັບຂີ່ມານັ້ນ ໄປຝັງຢູ່ເຂດເມືອງຫີນເຫີບ ແຂວງວຽງຈັນ, ສ່ວນລົດແມ່ນຈູດທຳລາຍຖີ່ມຢູ່ເຂດພູຄູນ ເມືອງກາສີ ແຂວງວຽງຈັນ ເພື່ອອຳພາງຄະດີ ແຕ່ກະຖືກຈັບມາດຳເນີນຄະດີ ໃນມາວັນທີ 27 ເມສາ 2017.


3. ໃຊ້ປືນຍິງເຈົ້າຂອງເຮືອນ ແລະ ແມ່ບ້ານ: ຄົນຮ້າຍບຸກດຽວເຂົ້າເຮືອນ ໃຊ້ອາວຸດປືນບໍ່ຊາບຊະນິດ ຍິງເຈົ້າຂອງ ເຮືອນຊື່ນາງ ຈັນທະວີ ຫຼື ອ້ອມ ອາຍຸ 38 ປີ ຢູ່ບ້ານສາລາຄຳ ເມືອງຫາດຊາຍຟອງ ນະຄອນຫຼວງວຽງຈັນ ຈໍານວນ 3 ລູກ ເຂົ້າບໍລິເວນທ້ອງ 1 ລູກ ແລະ ໜ້າເອີກ 2 ລູກ ແລ້ວຍິງແມ່ບ້ານຊື່ນາງ ໂມະ ອາຍຸ 40 ປີ ເຂົ້າຂະໜັບ 1 ລູກ ເສຍຊີວິດຄ່າທີ່ ໃນວັນທີ 1 ກັນຍາ 2017 ສ່ວນສາເຫດຂັດແຍ່ງທາງທຸລະກິດ.


2. ຄາດຕະກໍາຜົວແຍກຊີ້ນສ່ວນ: ເຫດເກີດຂຶ້ນໃນເວລາປະມານ 22:00 ໂມງຂອງວັນທີ 1 ທັນວາ 2017 ຢູ່ຕູບ ນ້ອຍ ເຂດບ້ານໂຄກສະອາດ ເມືອງໄຊທານີ ນະຄອນຫຼວງວຽງຈັນ, ຄາດຕະກອນຊື່ນາງ ສອນ ອາຍຸ 43 ປີ ໃຊ້ພ້າຂໍ ຄາດຕະກໍາຜົວຊື່ ທ້າວ ກາ ອາຍຸ 41 ປີ ແລ້ວຕັດແຍກຊິ້ນສ່ວນ ເຊັ່ນ: ຕັດຄໍ, ມືເບື້ອງຊ້າຍ, ເບື້ອງຂວາ, ນິວໂປ້ ຕີນເບື້ອງຊາຍ ແລະ ອະໄວຍະວະເພດ ຍ້ອນຄວາມຫຶງຫວງ ແລະ ໃຈຮ້າຍ ສຶບເນື່ອງມາຈາກການຜິດຖຽງກັນ ເລື່ອຍໆມາ ຈົນນຳໄປສູ້ການຄາດຕະກໍາໃນຄັ້ງນີ້.


ເຊິ່ງຜູ້ເສຍຊີວິດ ເປັນຜົວຜູ້ທີ່ສອງ ທີ່ຄາດຕະກອນລາຍນີ້ ກໍເຫດ ລັກສະນະເກົ່າ ພາຍຫຼັງພົ້ນໂທດຈາກການຖືກ ດໍເນີນຄະດີ ຄາດຕະກໍາຜົວຜູ້ທີ່2 ຈາກທັງໝົດ 3 ຜົວ.

1. ຄາດຕະກຳຍົກຄອບຄົວ 6 ສົບ: ເຫດເກີດວັນທີ 16 ພຶດສະພາ 2017 ທ້າວ ໄທຢ່າງ ອາຍຸ 21 ປີ ຢູ່ບ້ານດົງ ເມືອງບໍລິຄັນ ແຂວງບໍລິຄຳໄຊ ທີ່ລົງມືຄາດຕະກໍາສະມາຊິກໃນຄອບຄົວ ແລະ ຍາດພີ່ນ້ອງ ຈຳນວນ 6 ສົບ ຢູ່ສ່ວນຢ່າງພາລາ ເປັນເຫດການສະເທືອນຂັວນ. ສ່ວນສາເຫດ ແລະ ເເຮງຈູງໃຈກໍເຫດໃນຄັ້ງນີ້ ແມ່ນຍັງບໍ່ສາ ມາດສະຫຼຸບໄດ້ເພາະຜູ້ກ່ຽວມີອາການເສຍຈິດ.

©ນສພ ຄວາມສະຫງົບ