ທາງ 18 A ພັນທະນາຍທຶນຂຸດຄົ້ນແຮ່ບົກຊິດສ້າງ 10 ປີບໍ່ແລ້ວ ດຽວນີ້ລັດສັ່ງໂຈະ

ການກໍ່ສ້າງເສັ້ນທາງ 18 A ນັບເປັນໂຄງການໜຶ່ງທີ່ເປັນພັນທະຈາກການຂຸດຄົ້ນແຮ່ບົກຊິດ ແລະສ້າງຕັ້ງໂຮງງານອາລູມີນຽມຂອງບໍລິສັດຊີໂນລາວອາລູມີນຽມຄໍປໍເລເຊີນຈຳກັດມີມູນຄ່າປະມານ 400 ຕື້ກີບ ພາຍຫຼັງທີ່ກໍ່ສ້າງມາ 10 ປີຮອດປະຈຸບັນສຳເລັດບໍ່ ຮອດ 10% ຊ້າກວ່າສັນຍາຫຼາຍ ລັດຈຶ່ງສັ່ງໂຈະກໍ່ສ້າງເປັນທີ່ຮຽບຮ້ອຍໃນຂະນະນີ້.

ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະການລົງທຶນ ໄດ້ຊີ້ແຈງຕໍ່ຄຳຖາມເຈາະຈີ້ມຂອງສະມາຊິກສະພາແຫ່ງຊາດໃນວັນທີ 23 ຕຸລາຜ່ານມາວ່າ: ການກໍ່ສ້າງເສັ້ນທາງ 18 A ເລີ່ມແຕ່ທາງແບ່ງຫຼັກ 48 ຫາ ທາງແຍກ 13 ໃຕ້, ມີຄວາມຍາວ 116 ກິໂລແມັດ, ທີ່ເມືອງປາກຊ່ອງ, ແຂວງຈຳປາສັກຫາເມືອງສາມັກຄີໄຊ ແຂວງອັດຕາປື ທີ່ໄດ້ເຊັນສັນຍາກັບລັດຖະ ບານມາແຕ່ປີ 2008 ແລະໄດ້ດັດແກ້ສັນຍາໃນປີ 2013 ເປັນໂຄງການທີ່ພົວພັນກັບການຂຸດຄົ້ນແຮ່ບົກຊິດ ແລະສ້າງຕັ້ງໂຮງງານປຸງແຕ່ງອາລູມີນຽມ ແລະອາລູມີນຽມມີມູນຄ່າການກໍ່ສ້າງປະມານ 50 ລ້ານໂດລາ ຫຼື ປະມານ 400 ຕື້ກີບ ເບື້ອງຕົ້ນຈະໃຫ້ສຳເລັດພາຍໃນ 3 ເດືອນ ແຕ່ຮອດປະຈຸບັນນັບເວລາກໍ່ 10 ປີ ມີການປະຕິບັດໄດ້ພຽງແຕ່ 9,4% ຊຶ່ງເຫັນວ່າບໍ່ສາມາດປະຕິບັດໄດ້ຕາມທີ່ລະບຸໄວ້ໃນສັນຍາ.

ຕໍ່ກັບບັນຫາດັ່ງກ່າວ, ທ່ານລັດຖະມົນຕີກະຊວງແຜນການ ແລະການລົງທຶນຊີ້ແຈງຕື່ມວ່າ: ທາງກະຊວງແຜນການ ແລະການລົງທຶນກໍໄດ້ມີການຂໍທິດຊີ້ນຳຈາກຂັ້ນເທິງ ແລະໄດ້ອອກໜັງ ສືແຈ້ງເຕືອນໃຫ້ແກ່ຜູ້ລົງທຶນໄປແລ້ວ, ສ່ວນຄວາມຫຼ້າຊ້າຂອງການຈັດຕັ້ງປະຕິບັດພຽງ 9,4% ນັ້ນ, ຫຼ້າສຸດກໍໄດ້ມີການແຈ້ງການ ໂດຍລະບຸໃຫ້ກະຊວງແຜນການ ແລະການລົງທຶນມີການຫາລື ກັບທາງບໍລິສັດທັງດັດແກ້ປັບປຸງສັນຍາວ່າດ້ວຍການຂຸດຄົ້ນແຮ່ບົກຊິດ ໂດຍໃຫ້ຍົກເລີກສິດພຽງຜູ້ດຽວຂອງບໍລິສັດກ່ຽວກັບການກໍ່ສ້າງເສັ້ນທາງດັ່ງກ່າວ ແລ້ວມອບຄືນໃຫ້ລັດຖະບານເພື່ອເປັນເຈົ້າການກໍ່ສ້າງເສັ້ນທາງດັ່ງກ່າວ.

ກ່ຽວກັບການຊີ້ນຳຂອງລັດຖະບານ ນັ້ນທາງບໍລິສັດກໍເຫັນດີປະຕິບັດຕາມ ແລະປະຈຸບັນກຳລັງດຳເນີນການດັດແກ້ສັນຍາ” ທ່ານລັດຖະມົນຕີກະຊວງແຜນການ ແລະການລົງທຶນກ່າວຢໍ້າ.

ຂຽນໂດຍ: ໄພບູນ

ใส่ความเห็น

อีเมลของคุณจะไม่แสดงให้คนอื่นเห็น ช่องที่ต้องการถูกทำเครื่องหมาย *