ຈັບຄາບ້ານພັກພ້ອມຂອງກາງ ຢາບ້າ 42.000 ເມັດ ທີ່ແຂວງບໍ່ແກ້ວ

 

ກໍາລັງຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງບໍ່ແກ້ວ ໄດ້ເຂົ້າຈັບຕົວກຸ່ມລັກລອບຂົນສົ່ງຢາບ້າ ຢູ່ເຮືອນພັກແຫ່ງໜຶ່ງ ບ້ານປ່າອ້ອຍ ເມືອງຫ້ວຍຊາຍ ແຂວງບໍ່ແກ້ວ ຢຶດຢາບ້າໄດ້ 42.000 ເມັດ ພ້ອມກັກຕົວຜູ້ຖືກຫາໄດ້ 3 ຄົນ ໃນຂະນະທີ່ພວກກ່ຽວກໍາລັງນັດສົ່ງໃຫ້ກັນ ໃນວັນທີ 19 ຕຸລາ 2017 ເພື່ອໄປສອບສວນຂະຫຍາຍຜົນຫາຜູ້ຮ່ວມຂະບວນການນໍາກັນ ເພື່ອຕິດຕາມຕົວໄປດໍາເນີນຄະດີຕາມກົດໝາຍ.

ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງບໍ່ແກ້ວ ເປີດເຜີຍວ່າ: ຜູ້ຖືກຫາທັງ 3 ຄົນ ຊື່ທ້າວ ຈາຊິຕິ ອາຍຸ 40 ປີ ຢູ່ບ້ານຕາເລືອ ແລະ ທ້າວ ບູນ ອາຍຸ 30 ປີ ຢູ່ບ້ານປຸງ ທັງສອງຢູ່ເມືອງທ່າຂີ້ເຫຼັກ ແຂວງຈຽງຕຸງ ປະເທດມຽນມາ ແລະ ທ້າວ ສົມສີ ອາຍຸ 23 ປີ ຢູ່ບ້ານທ່າເດື່ອ ເມືອງໄຊຍະບູລີ ແຂວງໄຊຍະບູລີ.

ຜ່ານການສືບສວນ-ສອບສວນ ທ້າວສົມສີ ສາລະພາບວ່າ: ເບື້ອງຕົ້ນ ມີຄົນໂທລະສັບສັ່ງຊື້ຢາບ້ານໍາ ຈໍານວນຫຼາຍ; ຈາກນັ້ນ, ໄດ້ຕິດຕໍ່ໂທລະສັບຫາ ທ້າວ ບູນ ທີ່ເປັນເຄືອຂ່າຍດຽວກັນ, ຮອດວັນທີ 16 ຕຸລາ 2017 ທ້າວ ບູນ ໄດ້ຂ້າມມາຈາກປະເທດມຽນມາ ເຂົ້າມາລາວ ແລ້ວພາກັນຂີ່ລົດໂດຍສານ ຈາກເມືອງຕົ້ນເຜິ້ງ ມາເມືອງຫ້ວຍຊາຍ ພາກັນໄປພັກຢູ່ເຮືອນພັກ ພາຍໃນເທດສະບານເມືອງ ເພື່ອລໍຖ້າຮັບຢາບ້າຈາກຜູ້ຮ່ວມຂະບວນການນໍາກັນອີກ.

ມາຮອດວັນທີ 19 ຕຸລາ 2017, ກໍມີຜູ້ຊາຍຄົນໜຶ່ງຂັບຂີ່ລົດວີໂກ້ສີຂາວ (ບໍ່ຮູ້ໝາຍເລກທະບຽນ) ມາຮັບໄປນອນຢູ່ເຮືອນພັກບ່ອນໃໝ່ ເຂດບ້ານປ່າອ້ອຍ ເມືອງຫ້ວຍຊາຍ ແຂວງບໍ່ແກ້ວ ເມື່ອໄປຮອດຫ້ອງພັກກໍ່ເຫັນ ທ້າວ ຈາຊິຕິ ຢູ່ໃນຫ້ອງ ພ້ອມກັບຖົງເຄື່ອງ 1 ຖົງ ທີ່ຊຸກເຊື່ອງຢາບ້າຈໍານວນ 21 ມັດ ເທົ່າກັບ 42.000 ເມັດ ສ່ວນຜູ້ຊາຍຄົນທີ່ມາຮັບໄປບ້ານພັກດັ່ງກ່າວ ໄດ້ຂັບລົດອອກໄປ. ຈາກນັ້ນ, ກໍມີເຈົ້າໜ້າທີ່ຕໍາຫຼວດເຂົ້າມາຈັບຕົວພວກກ່ຽວທັງສາມ ພ້ອມດ້ວຍຂອງກາງຢາບ້າ ຈໍານວນ 21 ມັດ, ໂທລະສັບມືຖື 4 ໜ່ວຍ, ແຫວນຄໍາ 1 ວົງ ແລະ ໂມງ 1 ໜ່ວຍ ເພື່ອນຳໄປທໍາການສືບສວນ-ສອບສວນຂະຫຍາຍຜົນຫາກຸ່ມແກ້ງຄ້າຂາຍຢາເສບຕິດລາຍນີ້ ມາດໍາເນີນຄະດີຕາມລະບຽບກົດໝາຍຕໍ່ໄປ.

ທີ່ມາ: ນສພ ຄວາມສະຫງົບ

Be the first to comment

Leave a Reply

Your email address will not be published.


*