ຫາລືພາກທຸລະກິດຂອບການຮ່ວມມືແມ່ນ້ຳຂອງ-ສ ເກົາຫຼີ

 

ກະຊວງ​ການ​ຕ່າງປະເທດ ​ສປປ ລາວ ຮ່ວມ​ກັບ​ກະຊວງການ​ຕ່າງປະເທດ ສ ເກົາຫຼີ ເປັນເຈົ້າພາບ​ຮ່ວມ​ຈັດ​ກອງ​ປະຊຸມ​ປຶກສາ​ຫາລື​ພາກ​ທຸລະ​ກິດ ​ຂອບ​ການຮ່ວມ​ມື​ແມ່ນ້ຳ​ຂອງ-ສາ​ທາ​ລະນະ​ລັດ​ເກົາຫຼີ ຄັ້ງ​ທີ 5 ພາຍ​ໃຕ້ຫົວຂໍ້​ການ​ສົ່ງເສີມ​ທຸລະ​ກິດ​ຂະໜາດ​ນ້ອຍ ແລະ ກາງ ແລະ ອຸດສາ​ຫະ​ກຳ​ທ່ອງ​ທ່ຽວ​ອາຫານ ແລະ ກະສິກຳ ໃນ​ບັນດາ​ປະເທດແມ່ນ້ຳ​ຂອງ ແລະ ສາທາລະນະລັດ​ເກົາຫຼີ​ຂຶ້ນ ວັນ​ທີ 19-20 ຕຸລາ 2017 ທີ່​ໂຮງແຮມ​ດອນ​ຈັນ​ພາເລດ ເປັນ​ປະທານ​ຂອງ​ທ່ານ ທອງ​ຜ່ານ ສະຫວັນ​ເພັດ ຮອງ​ລັດຖະ​ມົນຕີ​ກະຊວງ​ການ​ຕ່າງ​ປະເທດ​ລາວ ແລະ ທ່ານ Yun Kang Hyeon ຮອງ​ລັດຖະມົນຕີກະຊວງ​ການ​ຕ່າງປະເທດ ສ ເກົາຫຼີ ມີ​ຜູ້​ແທນ​ຈາກ​ສະ​ຖາ​ບັນ​ແມ່ນ້ຳຂອງ ແລະ ອົງ​ການຈັດຕັ້ງ​ສາກົນ ແລະ ພາກສ່ວນ​ທີ່​ກ່ຽວຂ້ອງ ເຂົ້າ​ຮ່ວມ.

ກອງ​ປະຊຸມ​ປຶກສາ​ຫາລື​ພາກທຸລະ​ກິດ​ຄັ້ງ​ນີ້ ໄດ້​ເນັ້ນ​ໃສ່​ການ​ປຶກສາ​ຫາລື​ດ້ານ​ນະໂຍບາຍ​ການ​ສົ່ງເສີມ​ທຸລະ​ກິດ​ຂະໜາດ​ນ້ອຍ ແລະ ກາງ ໂດຍ​ສະເພາະ ການ​ແລກປ່ຽນ​ທັດສະນະ ແລະ ຄຳ​ຄິດ​ເຫັນຮ່ວມ​ກັນ​ກ່ຽວ​ກັບ​ສິ່ງ​ທ້າ​ທາຍ ແລະ ກາລະ​ໂອກາດ​ຂອງ​ການດຳເນີນ​ທຸລະ​ກິດ​ໃນ​ບັນດາ​ປະເທດ​ແມ່ນ້ຳ​ຂອງ ພ້ອມ​ນີ້ ກອງ​ປະຊຸມ​ຍັງ​ໄດ້​ແລກປ່ຽນ​ປະສົບ​ການຕົວ​ຈິງ​ຂອງ​ການ​ດຳເນີນ​ທຸລະ​ກິດ ຢູ່​ບັນດາ​ປະເທດ​ແມ່ນ້ຳ​ຂອງ ໂດຍສະເພາະ ສິ່ງ​ອຳນວຍ​ຄວາມ​ສະດວກ ຂໍ້​ຫຍຸ້ງຍາກ ແລະ ການວາງ​ແຜນ​ຮ່ວມ​ມື​ກັນ​ໃນ​ອະ​ນາຄົດ.

ໃນ​ໂອກາດ​ດັ່ງກ່າວ ເພື່ອ​ເປັນການ​ສົ່ງເສີມ ແລະ ຂະຫຍາຍເຄືອ​ຂ່າຍ​ການ​ຮ່ວມ​ມື​ດ້ານ​ທຸລະກິດ ລະຫວ່າງປະເທດ​ສະ​ມາຊິກ​ແມ່ນ້ຳ​ຂອງ ແລະ ສ ເກົາຫຼີ ພາກ​ເອກະ​ຊົນ ກໍ່​ຄືບັນດາ​ບໍລິສັດຫ້າງ​ຮ້ານ​ຕ່າງໆ​ຂອງ​ສອງ​ຝ່າຍ ຍັງ​ໄດ້​ມີ​ການ​ຈັບ​ຄູ່​ກັນ​ທາງ​ທຸລະກິດ ໂດຍ​ສະເພາະ ການ​ຈັບ​ຄູ່​ທຸລະ​ກິດ​ທີ່​ປິ່ນ​ອ້ອມ​ໃນ​ອຸດ​ສາ​ຫະກຳ​ທ່ອງ​ທ່ຽວ​ກະສິກຳ ແລະ ອາຫານ ນອກຈາກ​ນີ້​ ບັນດາ​ຄະນະ​ຜູ້ແທນ​ຈາກ​ພາກ​ເອກະ​ຊົນ ​ຍັງ​ໄດ້​ມີໂອກາດ​ໄປ​ຢ້ຽມ​ຊົມເຂດ​ນິຄົມອຸດສາຫະກຳ​ວຽງ​ຈັນ-ໂນນ​ທອງ ພະ​ທາດຫຼວງ ແລະ ປະຕູ​ໄຊ. ຂ່າວ: ຫນັງສືພິມວຽງຈັນໃຫ່ມ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *