ປະທານປະເທດ ເນັ້ນອັດຕະປື ເອົາໃຈສ້າງຊັບພະຍາກອນມະນຸດ ເພື່ອເປັນກຸນແຈ ໃນການສ້າງສາພັດທະນາ

ວັນທີ 19-20 ຕຸລາ ນີ້ ສະຫາຍ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ພ້ອມຄະນະໄດ້ເຄື່ອນໄຫວຢ້ຽມຢາມ ແລະ ຊີ້ນຳວຽກງານຢູ່ແຂວງ ອັດຕະປື ໂດຍໄດ້ຖືກການຕ້ອນຮັບຢ່າງອົບອຸ່ນຈາກ ທ່ານ ປອ ນາມ ວິຍະເກດ ກຳມະການສູນກາງພັກ ເລຂາພັກແຂວງ ເຈົ້າແຂວງ ອັດຕະປື ພ້ອມຄະນະນຳຂອງແຂວງ ເຊິ່ງການຕ້ອນຮັບແມ່ນຢູ່ທີ່ສະໜາມບິນສາກົນ ແຂວງ, ຈາກນັ້ນ ກໍ່ໄດ້ເດີນທາງເຂົ້າຮ່ວມພົບປະໂອລົມພະນັກງານຫຼັກແຫຼ່ງ ແລະ ພະນັກງານບຳນານ ທີ່ຫໍປະຊຸມໃຫຍ່ຂອງແຂວງ.

ກ່ອນການພົບປະໂອ້ລົມພະນັກງານຫຼັກແຫຼງທົ່ວແຂວງ ອັດຕະປື ສະຫາຍ ເລຂາທິການໃຫຍ່ປະທານປະເທດ ບຸນຍັງ ວໍລະຈິດ ກໍ່ໄດ້ຮັບຟັງການລາຍງານໂດຍຫຍໍ ກ່ຽວກັບສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ຈາກທ່ານ ເລຂາພັກແຂວງ.

ຫຼັງຈາກນັ້ນສະຫາຍ ເລຂາທິການໃຫຍ່ ປະທານປະເທດ ບຸນຍັງ ວໍລະຈິດ ກໍ່ຍັງໄດ້ເນັ້ນໃຫ້ຄະນະພັກຂອງແຂວງແຕ່ລະຂັ້ນ ຈົ່ງສືບຕໍ່ເອົາໃຈໃສ່ເພີ່ມທະວີສຶກສາອົບຮົມວຽກງານການເມືອງແນວຄິດໃຫ້ມີຄວາມເຂັ້ມແຂງ, ໜັກແໜ້ນ, ມີຄວາມສາມັກຄີປອງດອງພາຍໃນພັກ, ວຽກງານປ້ອງກັນຊາດ-ປ້ອງກັນຄວາມສະຫງົບຕ້ອງມີຄວາມຮັບຜິດຊອບສູງ ຕໍ່ໜ້າທີ່ວຽກງານ ແລະ ເປັນແບບຢ່າງໃນການນຳພາ ຕ້ານປະກົດການຫຍໍ້ທໍ້ຕ່າງໆທີ່ເກີດຂຶ້ນ;

ເອົາໃຈໃສ່ພັດທະນາຄຸນນະພາບການສຶກສາໃຫ້ເລິກເຊິ່ງ ແນໃສ່ສ້າງຊັບພະຍາກອນມະນຸດໃຫ້ເປັນຄົນທີ່ມີຄວາມຮູ້ ຄວາມສາມາດ ເພື່ອເປັນກຸນແຈ ໃນການສ້າງສາພັດທະນາປະເທດຊາດໃນອະນາຄົດກ້າວໄປສູ່ຄວາມຮຸ່ງເຮືອງສີວິໄລຢ່າງແທ້ຈິງ, ພ້ອມກັນເອົາໃຈໃສ່ສຶກສາອົບຮົມຄົນຮຸ້ນໜຸ່ມ ເຮັດແນວໃດ້ໃຫ້ຮູ້ຈັກອະນຸລັກຮັກສາວັດທະນະທຳທີ່ເປັນເອກະລັກຂອງຊາດ, ພ້ອມກັນເອົາໃຈໃສ່ພັດທະນາແຂວງ ອັດຕະປື ໂດຍເລັ່ງໃສ່ການນຳໃຊ້ທ່າແຮງຂອງທ້ອງຖິ່ນ ລວມທັງ ການສ້າງສະຕິ ຄວາມເປັນເຈົ້າ ເຄົາລົບລະບຽບກົດໝາຍ ແລະ ເອົາໃຈໃສ່ຕໍ່ວຽກງານ ຮັກສາສຸຂະພາບ ຂອງປະຊາຊົນ ຕາມຫຼັກອະນາໄມ 3 ສະອາດ;

ປັບປຸງລະບົບການເມືອງຢູ່ຮາກຖານ ໃຫ້ມີຄວາມໜັກແໜ້ນ, ເຂັ້ມແຂງ ບົນພື້ນຖານຄວາມເປັນເອກະພາບ ຂອງຄະນະພັກ-ຄະນະນຳທຸກຂັ້ນ ແລະ ຄວາມສາມັກຄີພາຍໃນ ຢ່າງແໜ້ນແຟ້ນຕາມແນວທາງຂອງພັກວາງອອກ.

ການມາຢຽມຢາມ ແລະ ເຮັດວຽກ ທີ່ແຂວງ ອັດຕະປື ຂອງເລຂາທິການໃຫຍ່ເທື່ອນີ້ ຍັງໄດ້ທ່ຽວຊົມສະຖານທີ່ທ່ອງທ່ຽວ ແລະ ສັກກະລະບູຊາ ພະເຈົ້າໄຊຍະເສດຖາທິລາດ ທີ່ວັດທາດ ເມືອງໄຊເສດຖາ ເຊິ່ງເປັນສະຖານທີ່ກະກຽມເປີດງານນະມັດສະການໃນປີທ່ອງທ່ຽວ 2018.

ຂ່າວ: ແຂວງອັດຕະປື

Be the first to comment

Leave a Reply

Your email address will not be published.


*